Chanchin Ṭha hril – Lalchuangliana

Lal Isuan amah ringtute hi “khawvel eng” min ti a (Mat. 5;14),  ama enna lantirtu (reflector) kan ni..Chu chuan  Lal Isua chanchin hriattir pawimawhzia hi a tilang a. Kan Zoramah Mizo puitling chin ngat chu Chanchin tha hre lo hi kan awm a rinawm loh. Mahse ‘tihharh thar’.(revival ) hi kan thupui ber emaw tih turin kan Kohhran lian liante hian Mizoramah hian  ‘ Chanchin tha hriltu’ aiin ‘ Revival Speaker’ kan ngah zawk niin a lang.  Hei hi a  tul em em pawh a ni ang. Mahse Pathian  hian ringtu kalbote hruai kir ai mah hian Chanchin tha la hre lote hi chhandama an awm theih nan, ‘thim’- a awmte tana ‘eng’ nih hi a ngai pawimawh zawk ni hian a hriat theih.

Isaia 49:5,6 (lehlin thar) ah chuan heti hian kan hmu a. “Lalpa chuan heti hian a ti: Jakoba thlahte tungdinga, Israel la damte hruai kir tura ka chhiahhlawh nih hi nep tak a ni. Chu aia hna ropui zawk tih tur i nei. Khawvel pum pui hi chhandam a nih theih nan hnam tin tan eng i ni ngei bawk tur a ni.”

India ram hmar lamah hian mihring an tamzia, mi maktaduai 500 chuang karah Lal Isua ringtu 1% em pawh an la awm loh thu leh Chanchin tha hril a tulzia hi kan sawi chamchi a, kan tih theih erawh a va tlem thin em! Keini CONCERN Network inti te hian he rama mi zawng zawng hian vawi khat na reng reng chu Lal Isua leh a Chanchin tha hi han hre ve ngei se tih hi thupuiah kan nei a. Chutih karah  thil hrang hrang han tih kualte a ngai a. Sawrkar leh min enthla reng tuten sakhaw buaipuia min puh thin avanga inven nan Education leh Medical, social work dangte kan ti tel thin bawk a. Mahse kan tum leh awm chhan ber chu Chanchin tha hril hi a ni reng a ni. Hmasawnna kawng hrang hrang kan tih thinte pawh hi a innghahna Lal Isua a nih loh chuan a lo tlo lovin mihring nun a tidanglam thei tak tak  lo ve. Kan nunin awmzia ‘ meaning’ a neih theihna hi Lal Isuaah chauh hian a lo ni.

“Chanchin tha hi hril lo ila ka chung a va pik dawn em!” (1 Kor.9:16)