Tirhkohte Thiltih Zirlai 50-na. Tirhkohte 9:31-43

TIRHKOHTE 9:31-43 MIZOVBSI Chutichuan, kohhranhote chu Judai ram vêlah te, Galili ram vêlah te, Samari ram vêlah te chuan an nghet deuh deuh va, muang takin an awm ta a; tin, Lalpa ṭih dêkin, Thlarau Thianghlim thlamuanin an awm a, an lo pung ta telh telh a. 

[32] Tin, Peteran khua vêl a fan pahin Ludda khuaa mi thianghlim awmte hnênah a zuk kal bawk a. [33] Chutah chuan mi pakhat a hming Ainia, a zen avânga kum riat khuma mu reng a hmu a. [34] Tin, Petera chuan a hnênah, “Aini, Isua Krista chuan a tidam a che; tho la, i âwngphah zial rawh,” a ti a. Tichuan, a tho ta nghâl a. [35] Tin, Ludda khua leh Saron phaia awmte zawng zawng chuan Ainia chu an hmu a, Lalpa lam an hawi ta hlawm a.

[36] Tin, Joppa khuaah a hming Tabithi, zirtîr pakhat a awm a (A Grik hming chu Dorki a ni a, ‘sazuklâ’ tihna a ni). Chu hmeichhia chuan thil tihṭhat leh thilpêk a ngah hle a. [37] Tin, chûng lai chuan a damlo va, a thi ta a; tin, an bual fai a, pindan chungnungah an zalh a. [38] Tin, Ludda khua chu Joppa khaw kiang a nih avângin, zirtîrteho chuan chutah chuan Petera a awm tih an hria a, “Rei rial lovin kan hnênah lo kal ang che,” tia ngên chiam tûrin a hnênah mi pahnih an tîr a. [39] Tin, Petera chu a tho va, an hnênah a kal ve ta a. Tin, a thlen veleh pindan chungnungah chuan an hruai a; hmeithai zawng zawng chu a kianga dingin, Dorki an hnêna a awm laia a kawr siam te, a puan siamte entîr chungin an ṭap hlawm a. [40] Nimahsela, Petera chuan an zain a chhuahtîr vek a, a ṭhingṭhi a, a ṭawngṭai ta a; tin, a ruang lam a hawi a, “Tabith, tho rawh,” a ti a. Tichuan, a mit a han meng a, Petera chu a hmuh veleh a ṭhu ta hlawl a. [41] Tin, Petera chuan a kut a pe a, a kai tho ta a; tin, mi thianghlimte leh hmeithaite chu a ko va, damin a kawhhmuh a. [42] Tin, chu chu Joppa khua zawng zawng chuan an hre ta vek a; mi tam takin Lalpa chu an ring ta a. [43] Tin, Petera chu Joppa khuaa Simona, savun siamtu inah ni tam tak a châm a.

Sawi zauna : ‘An nghet deuh deuh a, muang takin an awm ta a,’ tih a ni. Isua rinnaa ngheh, Pathian Thua chian hi muang taka an awm chhan a ni. ‘Lalpa tih dekin Thlarau Thianghlim thlamuanin an awm,’ tih kan hmu bawk. Lalpa an tih a thlamuanin an awm, Lalpa tih chu engkim ata thlamuana awmna kawng a ni tihna a ni. Lalpa tih, Pathian hlauh hi muang taka awmna, hlauh neih lohna a ni. Hla phuahtu chuan tihian a lo sawi a: A mi thianghlimte u Lalpa hlau, fear rawh u, tichuan engmah dang in hlau dawn lo nia, tiin. Heng muanna leh hlau lo a an awm theihna chhan hi buaina leh harsatna a awm tawh miah lo tihna a ni hran lo. Pathian an tihna leh Isua rinnaa an nghehna chuan hlauhawm leh buaina dangte a hmuh tet tir ta vek zawk a ni. Innghahna dik leh hlauh tur dik hriatna chuan a ti huaisen a, manganna karah pawh thlamuanna a pe mai zawk a ni. (The fear of the Lord is not a crippling fear that paralysed but a healthy fear that encouraged.)

Ngaihtuah zui atan. 50/1 Ainia, zen vanga kum riat khuma mu tawh chu Petera chuan, “Aini, Isua Krista chuan a tidam a che; tho la, i âwngphah zial rawh,” a ti a. Tichuan, a tho ta nghal a, tih kan hmu a. A awlsam ang reng hle mai. Tabithi kaihthawh chungchangah chuan : ‘Nimahsela, Petera chuan an zain a chhuahtîr vek a, a ṭhingṭhi a, a ṭawngṭai ta a; tin, a ruang lam a hawi a, “Tabith, tho rawh,” a ti a. Tichuan, a mit a han meng a, Petera chu a hmuh veleh a ṭhu ta hlawl a,’ tih kan hmu bawk. Isua hming avanga dam leh ta an nih a chiang hle mai. A tih dan lam emaw Petera thu chham lam emaw a ni lo. Heng na leh thi tawh hnu tho lehte hian Isua nihna leh thiltihtheihna an tarlang chiang khawp mai. Kan thlarau zenna leh thihna ata Isuan min ti dam a, min chhandam tih a taka a lanna pawh a ni.

Dam lo damna turin, mitthite kaitho tur hian enge pawimawh ni a i hriat? Heng atang hian Pathian rilru leh thil tum, a purpose i zir thei em? Eng hmachhuanin nge, tu/eng rinnain nge i feh chhuah ve thin?