Tirhkohte Thiltih Zirlai 32-na. Tirhkohte 5:40-42

TIRHKOHTE 5:40-42 MIZCLBSI

[40] Tichuan, a thu chu an zâwm a, tirhkohte chu an ko va, an vua a, Isua hminga thu sawi tawh hauh lo tûrin thu an pe a, an chhuah ta a. [41] Chutichuan, chu Hming avânga mualpho tuar tlâka ruat an nih avângin, lâwm êm êm chungin Sanhedrin ata chu an chhuak a. [42] Ni tin, Tempulah leh in lamah Isua kha Mesia chu a nih thu hril leh zirtîr an bâng chuang lo.

Sawi Zauna: Roreltute hian ngaihtuahna fim hmang a thu lai latu Gamaliela thu an zawm han tih hian tirhkohte tih hlum an tum an thulh mai a ni. An huatna a reh lo va, Pathian tirh an nih leh nih loh pawh finfiah duhna an rilruah a awmin a lang lo. Eng thil mahin Isua an huatna leh a chanchin puangtu tirhkohte   hnawk an tihna hi a tih reh a rinawm lo. Sanhedrinah hian saruaka mi vawi 39 vuak hi inhremna lar tak a ni. Zirtu thenkhat an vuak nat viau ring an awm a, a nat lam aia in tihmualphona thil zawk a nih ring an awm bawk. Isua hminga thu sawi tawh hauh lo turin thu an pe a, an vau nawn leh a ni. Mualpho taka vuak an nihna te, khauh taka thupek a vau an nih-te chuan anmnahni a ti zam lo chang a ni lo a, Isua hming avanga chutiang thilte tuar an nihna chuan a ti lawm ta em em zawk a ni. Pathian thlamuanna rilru reng renga hriatsen loh khan anmahni a luah tlat tih a hriat a ni. An vuakna hnuhma, a vualte chu Isua ta an nih chhinchhiahna a lo ni ta hlauh zawk a ni. An awmna hmun apianga chanchin tha hril an bang chuang lo.

A hnu zelah tihduhdahna hi Juda hruaitute atang mai ni lo, Rom sawrkar atangin a punlun chho ta zel a. Nero (AD 54-68) chuan ringtute chu tan inah a khung a, mi tam tak a tihlum a. Domitian (AD 81-96) chuan pathiana a inchhalna ringtuten an pawm ve duh loh avangin a nekchep nasa hle a. Johana pawh kha a hunlai hian Patmos thliarkara tan tir ni a ngaih a ni. Marcus Aurelius (AD 161-180) chuan Kristiante chu mi hlauhawm leh bawlhhlawh taka nungah a puh a, khawtlangin kohhrante dik lo taka an sawisak pawh thelh a tum ngai lo. A hnu zelah pawh tihduhdah an ni ta zel a ni. ‘Tihduhdahna karah hian kohhran a thang chak ber,’ tiin an sawi thin. Ringtu hmasa Tertullian chuan Rom lal, emperor-te hnenah, ‘Min that u la, thiam loh min chantir u la, min rawt sawm rawh u. Min tih chimit in tum zawh pauh leh kan thang chak mai dawn a ni; a chi (kohhran thanna) chu Kristiante thisen hi a ni,’ tiin a sawi a ni (Tertullian, Apology, chapter 50).

Ngaihtuah zui atan: 47. Isua hming avangin tih duhdah, mualphona, sawi chhiat, nuihzat enge maw i tuar tawh em? Eng hian nge i rinna tha tir thin? Lawmna leh hmuingilna hian nge buai leh harsatnain i rinna ti nghet thin?