Tirhkohte Thiltih Zirlai 25-na. Tirhkohte 5:1-11

TIRHKOHTE 5:1-11 MIZOVBSI

Nimahsela, mi pakhat a hming Anania, a nupui Saphiri nên an awm a; Anania chuan ram a hralh a, [2] a nupui hriatin a man a ṭhen a zêp ta a; tin, a ṭhen a rawn keng a, tirhkohte ke bulah chuan a dah a. [3] Nimahsela, Peteran, “Anani, Thlarau Thianghlim bum tûr leh, ram man a ṭhen zêp tûrin engati nge Setanan i thinlung a tihkhah le? [4] A awm chhûng zawng khân i ta a ni reng lo vem ni? I hralh hnu pawh khân i thû thûin a awm lo vem ni? Engati nge hêng thu hi i rilrua i ngaihtuah? Mihring bum i ni lo ve, Pathian bum i ni zâwk e,” a ti a. [5] Tin, Anania chuan chûng thu chu a hriat veleh a tlu a, a thi ta a; tin, a hria apiangin an hlau ta êm êm a. [6] Tin, tlangvâlhote chu an tho va, an tuam a, an zâwn chhuak a, an phûm ta a. [7] Tin, dârkâr thum lai emaw chinah chuan a nupui chu, thil awmzia chu hre lovin a lo lût a. [8] Tin, Peteran a hnênah, “Mi hrilh rawh, ram chu heti zât chauhvin maw in hralh?” a ti a. Tin, ani chuan, “Aw, heti zât chauh hian a ni,” a ti a. [9] Tin, Peteran a hnênah, “Engati nge Lalpa Thlarau fiah nân in inthurual ni? Ngai teh, i pasal phûmtute kephah chu kawngka bulah a lo awm ta, nang pawh an zâwn chhuak ang che!” a ti a. [10] Tin, thâwklehkhatan a ke bulah chuan a tlu ta nghâl a, a thi ve ta a; tin, tlangvâlhote chu an lo lût a, ani chu thiin an rawn hmu a, an zâwn chhuak a, a pasal kiangah chuan an phûm ta a. [11] Tin, kohhranhote zawng zawng leh chûng thu hria apiangte chuan an hlau ta êm êm a.

 Sawi zauna : ‘Nimahsela’ tih kan hmu a, a hmaa in ziak enge tih chhiar ngei ngei tur a ni. Bung 4 tawp lamah khan ringtuten an neih ram te, in te an hralh a, an hralhna chu an rawn keng a, Josefa, tirhkohten Barnabaa an tih chuan ‘a lo neih chu hralhin a man a rawn keng a, tirhkohte ke bulah a dah a,’ tih kan hmu a ni. Barnaba thil tih hi a lar viau a ni maithei.

Anania leh Saphiri chuan hming that ve an duh a ni ngei ang. An ram an hralh ve a, a then an zep a, a then an rawn hlan ve a ni. A then zep, kept back tih tawngkam hi Akanan Joshua 7:21 a ‘ka awt a, ka la ta mai a ni, tih tawngkam tho kha a ni. Tirhkohte bu a Anania thil tih leh Joshua bu a Akana thil tihte hi Pathian mite hmasawnna (Pathian Thu darhna) tura daltu lian tak a ni ve ve a ni.

Kohhran tiak tirte a ni a (Joshua buah Israelten ram an la tan dawn chauh a ni). A tir atanga hlemhletna, dawt, duhamnain bu a khuar ngheh nghal mai chuan a dik lo ang. Zirtu pakhat chuan, ‘ mihring hi sum hmangaihnain a hneh tawh chuan thil tih hreh a nei tawh thin lo,’ a lo ti a ni.

Ngaihtuah zui atan:

40. Pathian hian a ti lutukin i hria em, enge awm tawk vel i tih? A tir atangin hetiang hi kohhranah pawm nghal ni maise enge a that lohna awm thei ni a i hriat?

(Pe vek angin lan tum talh lo se, an pek phal zat zep miah lovin sawi ta se, pawm tho an ni ngei ang. Phal chin ui lo taka pek hi Pathian lawm zawng a ni.)