Tirhkohte Thiltih Zirlai 24-na. Tirhkohte 4:32-37

TIRHKOHTE 4:32-37 MIZOVBSI

Tin, a ringtu mipuite chu rilru hmun khat leh ngaihtuah hmun khatin an awm a: an zînga pakhat mahin an sum neih, “Ka ta bîk a ni,” an ti lo; thil zawng zawng an inṭâwm zâwk ṭhîn. [33] Tin, tirhkohte chuan awihawm takin Lal Isua thawhleh thu an hriattîr ṭhîn a; an zaa chungah khawngaihna nasa tak a awm a. [34] Tin, an zîngah pawh tlachham tu mah an awm lo; ramte, inte nei apiangin an hralh a, an thil hralhte chu a man an rawn keng a, [35] tirhkohte ke bulah an dah ṭhîn a; an châkkhai daih tâwk ṭheuhvin an sem ṭheuh ṭhîn a. [36] Tin, Josefa, tirhkohten Barnaba an tiha chu (chu mi hming awmzia chu, “Thlamuanna Fa” tihna a ni a), Levia chi, Kupra thliarkâra mi a ni a, [37] a lo neih chu hralhin a man a rawn keng a, tirhkohte ke bulah a dah ta a.

Sawi Zauna: Thlarau Thianghlim hnathawh lo lan chhuahna pakhat chu rilru leh ngaihtuahna (heart and soul) hmun khata an awm hi a ni. Thil (things) aiin mihring (people) an ngaipawimawh zawk a ni. Awihawm takin (with great powers) Isua thawhleh thu an hril, tih a ni a. Thusawi thiam, thu chhep nalh lampang aiin anmahni tawn ngei, an hriat ngei, an neih ngei an sawi vanga an thusawi awihawm, a powerful ta ni zawkin a lang.

Thil neih hralh a a man rawn ken khawm hi ringtu an lo pun tak chiam avang hian a ngai niin a lang. Thlarauvin hna a thawk a, phal takin an pe thei a ni. Pathian khawngaihna an chungah a awm a tumah tlachhamin an awm lo, tih hi lehlin thenkhatah chuan sentence pakhat a ni.

Barnaba hi Levi, puithiam chi a ni a, Israel-ah ram an nei ve thei lo (Deut. 18:1,2). A lo neih a hralh hi Israel ni lo, ram danga a neih a ni thei a. A nupuiin a chhawm a ni thei a. Khang hun, kum zabi pakhatna-ah chuan Levia chite ram neih an phal tawh a ni thei bawk.

Ngaihtuah zui i la:

38. Ringtute kan in pumkhatin, kan in hmangaih tlangin i hria em, in pumkhatna daltu engte nge ni a i hriat?

39. Tirhkohte 2:42-47: Tin, tirhkohte zirtîrin, inpâwlin, chhang phelin, ṭawngṭaiin ṭhahnemngai takin an awm reng a. [43] Tin, mi tinin an hlau ta a; tirhkohte chuan thilmak leh chhinchhiahna tam tak an ti a. [44] Tin, a ring apiang chuan engkim an inṭâwm hlawm a, [45] an rote, an sumte an hralh a, an châkkhai daih lek ṭheuhvin an zaa hnênah chuan an sem ṭhîn a. [46] Tin, ni tin rilru hmun khatin Pathian biak inah chuan ṭhahnemngai takin an awm ṭhîn a, an in lamahte pawh chhang an phel a, hlim tak leh lungawi takin an chaw an ei ṭhîn a, [47] Pathian an fak a, mi zawng zawng lawm zâwngin an awm ṭhîn. Tin, a chhandam mêk apiangte chu Lalpan ni tin an hnênah a teltîr zêl ṭhîn.

Vawiina kan chhiar bung 4:32-37 thu leh a chunga thute khi chhiar la, a danglamna engte nge, engte nge a sawi nawn?

Bung 5 ah hian Anania leh Saphiri thu a sawi dawn a, enge hre hmasa tura min duh, a context enge ni ta le?