TT Zirlai 5-na, Tirhkohte 1:15-20 – Dr. A. Zothansanga

TIRHKOHTE 1:15-20 MIZOVBSI

Tin, chûng ni chuan unaute zîngah Petera a ding a, an za chuan za leh sawmhnih lai an ni a, [16] “Unaute u, Thlarau Thianghlimin Davida kâa, Isua mantute hruaitu Juda thu a sawi lâwk kha, kha Pathian Lehkha Thu kha lo thleng tur rêng a ni. [17] Ani chu kan zînga chhiar tel a ni a, hêng rawngbâwlnaah hian chan pawh a nei ve si a. [18] (Tin, chu mi chuan a sual manin hmun pakhat a lei a, bawkkhupin a tla a, a laiah a puak keh a, a rîl zawng zawng a chhuak vek a. [19] Tin, chûng thu chu Jerusalem khuaa awmte zawng zawngin an lo hria a; chutichuan, chu hmun chu anmahni ṭawngin ‘Akeldama’ an ti a, chu chu ‘Thisen Hmun’ tihna a ni.) [20] Fakna Hla Buah hêng thu hi ziak a ni: ‘A awmna tihramin awm rawh se, A chhûngah tu mah awm suh se,’ tih leh, ‘A hotu nihna chu mi dangin chang rawh se,’ tih hi.

Sawi Zauna: Petera a rawn ding a, hruaitu dinhmun a rawn la hi a mak lo. Lalpa dam lai pawh khan an zinga phusa ber, Lalpa pawh kawm nasa ber, a hauh leh zilh pawh tawk zing ber a ni. Chanchin tha bu pali-ah te hian Lalpa Isua tih lohah chuan Petera thusawi hi ziak lan tam ber a ni.

Hemi tuma Petera thu a danglam takna chu Thuthlung Hluia thu ziak, fakna leh Sam bu a ziakte chu Isua chungchang sawina a ni tih a rawn sawi ta hi a ni. Juda-te hian Isua hi an beisei Mesia, Pathian hriakthih a ni tih an hriat chiah hian Thuthlung Hlui an lo bel em avangin Pathian Thu an man nghalin midang zirtir thei khawpin an hriam nghal thin.

‘A awmna tihramin awm rawh se, A chhûngah tu mah awm suh se,’ tih hi Sam 69:25 a ziak a ni a, ‘A hotu nihna chu mi dangin chang rawh se,’ tih hi Sam 109:8 atanga lak a ni. Heng Samte hi Davida phuah an ni. Sam 69 hi Davidan Pathian a auhna, a hmelma leh a chunga thil tha lo thleng thin laka humhim a dilna a ni. Davida khan hmelma a ngahin thil tha lo tam tak a tuar ngei mai. Sam 69:21 a, ‘ka chaw atan englo kha min pe a; ka tuihal lahin in atan uain thur min pe,‘ a tihte hi chu Davida chunga thil thleng niin a lang lo. Pathian Thlarauin a puihnain ama chunga thil thleng piah lamah Isua lo kal tur a lo thlir lawk thin a lo ni. An sawi thin; Isua chauh hi Sam a famkima sa theitu a ni. A chanchin, a chunga thil thleng ziakna a ni vangin.

Zirtur kan neih tak chu; Thuthlung Hlui kan chhiarin keimahni tan, kan chunga thleng ve ang maiin kan chhiar nghal maiin, malsawmna inziakte kan chunga thleng tur angin kan ngai mai tur a ni lo. Isua chungah engtiangin nge kha thu kha a thlen dik a, a tlanna zarah keini chungah engtin nge a lo dik zel tih rilru puin kan chhiar thin ang. Isua kal tlang lovin a hranin Pathian thu hian kan chungchang a sawi lo tih hriat reng a tha.

A hotu nihna chu midangin chang rawh se, (Sam 109:8) : Juda Iskariota hmun luah thina midang dah hi anmahni, zirtirte duh dan a nih vanga ti an ni lo va, Isuan a duh dan, Sam buin a lo sawi vanga ti an ni. Pathian Thuin a lo sawi lawk tawh a, Pathian duh dan ngei a ni tih hriatna chuan zirtirte a ti huaisen thin a ni.

Ngaihtuah zui atan:

7. Isua zuitute pungkhawm zinga Pathian Thlarauin hna a thawh chhoh dan hi uluk takin chhiar la. Thil zir chhuah i nei em? (In lungrualin, thahnemngai takin an tawngtai, Petera a rawn ding chhuak, Sam a Isua chungchang a rawn sawi chho…)

8. Juda chunga thil thleng hi ngaihtuah chiang la, i rilru a ti buai em, eng zawhna nge i neih?

9. Isua kal tlang lovin Pathian Thu hi i chungah emaw midang chungah emaw thleng dikin i hre thin em, i huat zawngte Pathianin haw ve ngawt turin i beisei thin em? Ngaihdan, tih dan thlaka sim tur enge i neih?