TT Zirlai 4-na; Tirhkohte 1:11-14 — Dr. A. Zothansanga

TIRHKOHTE 1:11-14 MIZOVBSI

([11] chu mite chuan, “Galili rama mite u, engati nge vân lam ena in din reng? He Isua, in hnên ata vâna hruai chhohva a awm hi, vâna a chho in hmu ang bawk hian amah ngei hi a lo kal leh ang,” an ti a.) 

[12] Tin, Olivet tlâng an tih ata chu Jerusalem khuaah an kîr leh ta a; chumi tlâng chu Jerusalem khaw kiang a ni a, Chawlhnia kalna tâwk chauh a ni. [13] Tin, an luhin, an awmna pindan chungnungah chuan an chho va, Petera leh Johana nên, Jakoba leh Andria nên, Philipa leh Thoma nên, Bartholomaia leh Matthaia nên, Alphaia fapa Jakoba leh Simona, Zelot pâwla mi leh Jakoba fa Juda nên an ni. [14] Chûngho zawng zawng chu hmeichhia tute emaw leh Isua nu Mari nên, Isua unaute nên, rilru hmun khata ṭhahnemngai taka ṭawngṭaiin an awm reng a.

Sawi Zauna: Olivet tlang (Mount of Olives) Isua vana a chhohna (ascension) hmun hi Jerusalem leh Bethany inkara awm a ni. Zakaria 14:4 ‘Tin, chumi nîah chuan Olive tlâng chhak lama, Jerusalem rawn chhawngah chuan a ke a nghat ang a. Tin, Olive tlâng chu chhak leh thlang zâwngin, A laiah a phel ang a, ruam nasa tak a awm ang; Tin, tlâng tiave chu hmâr lamah a insawn ang a, A tiave chu chhim lamah,’ tih kan hmu a. Vantirhkohte khan, Isua vana a chho in hmuh ang hian amah ngei a lo kal leh ang, an ti bawk a. Hei vang hian Isua lo kal leh, second coming hian he Olivet tlangah bawk hian a rawn chhuk/tum ang, tih ring zirtu tam tak an awm phah a ni.

Chawlhnia kalna tawk (Sabbat day’s walk) hi Kilometre 1.1 vel a ni an ti. Juda-ten Sabbat ni an serh dan kawng khat chu an awmna hmun atanga hla tak kal loh a ni. Rabi-ho hian Sabbat ni a an kal hlat theih zawng hi an chhut a. Puithiam Levi ho awmna, humhimna khua, tum miah lo a mi that palhte tlanna khua an siam khua-in a huam chin hi km 1.1 vel niin an ngai a (Numbers 35:5). Sabbat ni a hla tak kal a theih lohna hrim hrim hi thlalera mana Sabbat a chhar a rem loh (Exodus 16:29) atang te a lak a ni. Jordan an thlen a Israel mite riahhmun atanga an chhuah khan thuthlung bawm zawntu puithiamte leh mipuite inkar kha tawng sanghnih (1.1 km vel) a ni bawk (Joshua 3:4).

Zirtirte zing a Bartholomaia hi Johana hian Nathanaela tiin a dah a. Zelot pawl hi Israel zinga mi firfiak, Rom sawrkar atanga tharum thawh a Israel zalenna tura bei tute an ni.

Hmeichhiate hi zirtirteho nupui an ni thei a. Isua khenbeh a nih laia thlir tute Matthaia 27:55,56 a ziak lante kha an ni thei bawk. Chang 14 Bible a Mari, Isua nu hming a lanna hnuhnung ber a ni.

Ngaihtuah zui atan:

6. Tute nge thahnem ngai taka tawngtaiho thinte hi, enge i zir chhuah le?