Arsite Zingah Khian Nunna Nei Thil Dang Hmu Ta Ila – Robert L Chongthu IAS

“…chu mi pawh chuan khawvelte chu a siam a” – Hebrai 1:2
 
Mihringten van thengreng chanchin kan hriat dan tidanglam vek thei thu thar hi tuk khat kan zing thovin han dawng ta thut mai ila. Hla taka thla pakhat, vurin a bawh khah vek hnuaiah nunna nei thil hmuhchhuah han ni mai se. A nih loh leh kan chenna khawvel hnaiha ni hualtute piah lam aṭangin signal han dawng mai ila, hai rual lohvin thiamna lama sang tak thil nung an awm tih hriat theihna ni se. Khawvel hmun hrang hranga mite chuan mak ti takin an phone leh TV an thlir ngei ang. Chutah khawia mi emaw chuan Kristianten kan lo hlauh ruk deuh zawhna a rawn zawt bawk ang a: Engtin nge kan rinna hi a awm tak ang?
 
Heti zawng hian zawhna zawt ila a ṭha zawk ang: Thilsiam dangte hmuh chhuah an nihna chuan eng vangin nge Siamtu chu a tihnep ngawt ang?
 
Hebrai lehkhathawn hi kan hriat chin piah lam daih thil hmangin a bul ṭan a ni a. Pathian chuan a Fapa kal tlangin kan hnenah thu a rawn sawi a, ani chu engkim rochungtua a ruat leh amah kal tlanga khawvel a siama chu a ni. Lehkhathawn ziaktu hian keini leh Krista inlaichinna lam a sawi hmain Krista leh thil dang zawng zawng inlaichinna lam a sawi hmasa a. Amah chu mihringte anga mihringte zinga lo awma chu niin thilsiamte lo awm theihna bawka chu a ni.
 
“Khawvelte” tia lehlin tak Grik thumal hi aiōnas a ni a, aiōn tih thumal aṭanga lak a ni. A awmzia tak chuan hun bik tih emaw, engtik emaw lai hun tih lam emaw a kawk daih mai. Chu vang chuan a lo lanna apiangah “engkim” sawina a ni tih ringawt chi a ni lo. Chutih rualin Hebrai 1:2 ah hi chuan khawvelte emaw universe emaw a huap nia ngaih a ni tlangpui a, he’ngte hi hun eng emaw chen awm tawh leh kalphung fel tak nei thilsiam an ni. A huam chin pawh kan ke hnuaia lei piah lam daih hi a ni tihna a nih chu.
 
Hei hi khawvel piah lamah nunna nei thil an awm tih lo rin lawkna inthup a ni hran lo. Bible chuan he thu hmang hian planet dangah mi cheng an awm tih pawh a sawi a ni hran lo. He thu bulṭhum hi a sawi a ni mah zawk e: thilsiam zing ami tawh phawt chu Pathianin a Fapa kal tlanga a siam a ni. Khawvel dang daihah mi nung dang an lo awm a nih pawhin anni chu thilsiam zinga tel chu an ni ang. Chu’ngte chu kan hmu chhuak a nih pawhin thilsiam chungchanga kan hriatna a tizau a ni mai, Krista thuneihna chin va tihzauh belh hranpa ngai lovin.
 
A chang hi chuan mihringin kan hriat thiam phak piah lam hi chu Pathian thuneihna pawna awmah hian kan ngai ngawt ṭhin a. Mahse kan hriat lohna hian a lalram chinah dai a theu pha chuang lo. A thla kan lak thiam hma daihin galaxy tam tak an awm tawh a, a hmuh theihna kan siam chhuah hma daihin mita hmuh tham loh thilnung tam tak an awm tawh a, tui thuk taka kan luh theih hma daihin tuifinriat mawngah thilnung tam tak an awm tawh. Thil hmuhchhuahte hian kan hriatna an tidanglam mai a ni. Kan thil hmuh chhuahte siamtu chu an tidanglam chuang lo.
 
He thlir dan tho hi kan khawvel piah lama nunna awmah pawh hman tur a ni ang. Thilnung ho te kan hmu chhuak emaw, mahnia ṭawng nei, hriatna nei leh thiamna ropui tak nei kan va hmu chhuak emaw pawh ni se Siamtu nei lova awm tawp thei an ni lo ang. Thiamna sang zawk nei pawh ni se mahnia lo awm tawp thei an ni tihna a ni lo ang. Tuifinriata zin thei kan nihna chuan pathianah min siam lo ang bawkin arsite pela zin theihna chuan thilsiam chu pathianah a siam bik hauh lo.
 
He hriatna hi Grik thumal pakhat ringawta innghat a ni lem lo. Chanchin Ṭha Johana ziak chuan thilsiam zawng zawng hi Thu kal tlanga lo awm an nih thu a sawi a. Kolossa pawhin thilsiam vana awm te, leia awm te, hmuh theih leh hmuh theih lohte chu Krista kal tlanga Krista tana siam an nih thu a sawi bawk. Hebrai lehkhathawn pawh hian Fapa chu hetiang dinhmunah tho hian a dah a ni. Bible ṭanchhante hi an inrem thlap mai: thilsiamah hian Fapa hian pawn lam mi nihna emaw, tel lohna emaw a nei lo reng reng.
 
Chutih rualin tuna kan chhan nghal mai theih loh tur zawhna hi chu an awm em em ang. Hriatna nei thilsiam dangte hian Pathian hi an hre ve ang em? Sualah an tlu ve ang em? Isua mihringa a lo changa min chhandamna leh an chanchin te chu engtin nge a inhnek rem ve ang? Hebrai 1:2 hian he’ng zawhnate hi a chhang hran lova, kan rinna chuan he’ng a chhan lohte hi mahni duh thua lo phuah chawp ve mai lo turin min beisei bawk. An thlarau dinhmun lam pawh hre vek anga awm kher lovin tu nge an Siamtu chu a nih tih erawh kan puang thei ang.
 
Kristian inngaihtlawmna chuan mak tihna tur hmun a kian ve tur alawm. Kan universe-ah hian kan beisei lawk sa thil chauh a awm tur a ni hran lova, kan tawnhriatin a chim chinah chauh hian Pathian pawh thilsiam siam tur a ni bik lo. Mihringte hlutna pawh hi a bik taka siam kan nihnaa innghat tur pawh a ni kher lo e. Pathianin min hmangaih avangin hmangaih kan ni mai, midang hmangaih tur a neih loh vang ni lovin.
 
Ni hnuaiah hian nunna leh hriatna nei thil dang kan lo tawng a nih chuan nia kan lo hriat ṭhin thilte hi chu a chawk buai ngei ang. Kan thurin erawh a tihdanglam kher a ngai lo. A kea Galili vaivut raptu Isua kha Galili-ah chauh a nung lo. Kan tisa ang pu Fapa kha kan zinga a lo pian hma daih khan a awm tawh. Kan hmuh hlatna entlangten van thengrenga thil an zawn hma daih khan thilsiamte chu Fapa ta an lo ni tawh.
 
Hetiang a nih chuan chu’ngte chu lo hmu chhuak ta pawh ni ila Kristiante chu buai tur emaw, pawm duh lo tur emaw kan ni lo, Pathian chawimawina atan hmang mai tur kan ni ang. Siamtu themthiamzia tak tak hre phak hauh lovin a thilsiam dang kan hmuh belh a ni leh maia.
 
Kan map piah lamah, kan hmanraw neihte piah lamah, kan ngaihruat thiam bak piah lamah pawh ni se, thilsiamte hi Siamtu khawih phak chin piah lam aṭanga lo awm ringawt thei an awm lo. Arsite hian theihna tam tak an thup ngei mai; siamtu dang erawh an thup lo e.