Bible-in Rinna A Tih Hi Eng Nge? – Robert L Chongthu IAS

 Rinna tih hi khawngaihna, tlanna leh chhandamna tihte nen hian Kristiante thumal hman uar pawl tak a ni a. Chutih rualin a tam zawk hi chuan eng nge a awmzia tak tak tih hi kan ngaihtuah ngai meuh lo. Rinna chungchanga Bible bung ropui tia sawi thin Hebrai bung 11 hmang hian a awmzia tak tak a hriat theih a ni.
 
Hebrai 11:1 chuan heti hian a ti a:
 
“Tin, rinna hi thil beiseite awm ngeia hriatna, thil hmuh lohte hriat fiahna a ni.”
 
“Hriatna” tia lehlin tak Grik thumal hi “thupui”, “bulthut” emaw “nihna tak tak” tia lehlin theih a ni a. Tin, “hriat fiahna” tia lehlin tak pawh hi “finfiahna” emaw “chianna” tia lehlin theih a ni bawk. A awmzia chu, rinna hi kan rilru chhungrila thil kan hriatna mai chu a ni lo deuh a ni. Thil chiang lo hre chiang anga va lan tlat pawh a ni chuang lo. Bible-in rinna a tih chu nakina lo la awm tura Pathianin a tiam tun huna kan lo tawnhriatna hi a ni.
 
Hebrai 11 hi miin sakhaw lam rilru pua thil an ngaihtuahna chungchang a ni lo. A tak taka thil an va tihna chungchang a ni. Nova’n lawng a tuk a. Abrahama’n an khua a chhuahsan a. Mosia’n Aigupta hausaknate a hnawl a. Rahabi’n enthlatute a lo hum a. An rinna kha thuawihna hmangin a lang chhuak a ni.
 
Kristian rinna hi rinna mitdel a ni lo tih hei hian a tifiah a ni. Rinna mitdel, ngaihtuahna tel miah lo hi Bible-in rinna a tih chu a ni lo. Sari’n Pathian a rin tlatna chhan chu a rinawmzia a lantir tawh vang a ni. Abrahama pawhin fapa Isaka petu chuan thihna ata pawh a kaitho leh thei ang tih a ring a. An rinna chuan an hriat fiah tawh Pathian nihnaah zung a kai nghet tlat a ni.
 
Rinna hi chu thlasik rei tak tawpa pangpar rawn par chhuak ve ve ang deuh hi a ni a. Vur chu a la tla pawh a ni thei e, mahse thlasik a ni chatuan dawn lo tih pangpar chuan a tichiang a ni. Chutiang bawkin Kristiante tan chuan Isua thawhlehna kha sual leh thihnain thu tawp an nei dawn lo a ni tih chhinchhiahna ropui a ni. Krista chu a thawh leh tak tak avangin Pathian thutiam rin ngamna chhan tur kan nei a ni.
 
Chutih rualin rinna chu rilru ngaihtuahnaah a tawp mai tur a ni lo. Mi chuan thutphahin a dawl zo ang tih chu a rilruin a ring thei a, mahse a thut hnuah chiah a tak takin a ring (trust) chauh dawn a ni. Rinna chu mahni atanga Pathiana rinna (trust) kan va nghahna hi a ni. Ani chu a rinawm tih pawmna leh chutiang mila nunna chu a ni.
 
Rinnaa nun awmzia chu Pathian Lalram lo la thleng turin a ngaihhlut zawng mila tuna lo nun hi a ni a. He khawvelah hi chuan ngaihdamna, thianghlimna, inngaihtlawmna, thilphalna leh hmelmate hmangaihna tihte hi atthlak angin an lang mai thei. Mahse Pathian thilsiam thar chu a lo thlen chuan he’ngte hi atthlak an ni tawh hauh lo. He’ngte hi hun lo la awm tur thil chhinchhiahna, tun huna rawn inlar an ni.
 
Rinhlelhna leh zawhnate hi rinna hmelma an ni lo. Kristianna hi Isua nun, a thih leh thawhlehnaa innghat tlat a nih vangin hriat duh tak takna atanga chhuak zawhna chuan rinna hi a tinghet deuh deuh thei a. Rinna chuan ngaihtuahna hmang tawh lo tawp turin min beisei lo. Thuk taka ngaihtuah a, dik taka ring a, huai taka thu zawm turin min beisei zawk a ni.
 
Chu vangin rinna pawh hi rinawm taka pawmna ang zawng pawhin a sawi theih ang. Pathian chungchanga ngaihdan va pawm ngawt hi chu a ni lo deuh. Ani’n hun a tih leh keini’n hun kan tih a lo inan loh chang te, kan tawngtainate min chhang har kan tih deuh chang te leh a rilru kan pawh phak loh deuh chang te pawha a laka rinawm tlat reng hi a ni zawk.
 
Matthaia 8 ah khan Isuan Rom sipai za hotu rinna kha a fak a, a fak chhan pawh kha pa khan Krista thuneihna kha a hriat chian em vang a ni. Isuan tawngkam khat chauh pawhin a tidam thei tih a ring a. Khatiang rinna kha rilru hnip ngaihtuahna ngawt chu a ni lo. Isua nihna tak tak va hriat chiana va rinna a ni.
 
Bible-in rinna a tih chu ngaihtuahna fim hman hnua rinna, thuawih taka thiltih hmanga tihlan a ni. Finfiahna hmangin bul a tan a, thuawihna hmangin a thang lian a, Pathian Lalram lo la thleng tur tem lawkna min pe a ni.
 
Hun lo la awm tur Pathianin min tiam hi tun hunah a lo thleng mek tawh ang maia vawiin kan lo nun hi rinna chu a ni – a chhan chu Isua thawhlehna kal tlangin a lo thleng mek tawh chu a ni si a.