Arab Sunni Muslim hovin an tih fo ṭhin pakhat chu an thlahtute ṭobul chhui chhuah leh chumi-ah chuan an zawlnei Muhammad-a thlah zi ding kal zêl an nihzia chhui luh chu a ni a. Hetianga Muhammad-a thlah kal zêlte zînga tel ngeite chu ‘chhungkaw zahawm bîk shorafa’ tiin an invuah ṭhin a ni. Mizote zingah pawh thlahtu bul chhui taima tak tak kan awm ve ṭhin a, a ṭangkaina tam tak pawh a awm ve awm e. Chutih lai chuan kan thlahtute zingah mi awmherh leh sual tak te, leh hnam chawm leh hnam dangte an lo tel ve a nih hlauh pawhin midangte hriat kan duh vakin a rinawm lo va. Chutiang mi chu kan ziak lang tel lo duh zawk ngeiin a rinawm.
Lungleia kan awm laiin English Worship Service-ah sipai hotu pakhat, piangthar hlim deuh chauh hi a lo inkhawm ve ṭhin a. A rinna kawnga a ṭhan lenna turin Bible chhiar turte kan inkawhhmuh a. Ni khat chu, “Brother Rema, Bible hi ka chhiar peih tawh lo, a boring em mai,” a ti hlawl mai a. Chronicles 1-na kha a lo chhiar thleng chiah a. ‘Chumi chuan chumi chu a hring a…’ tih hlir mai a han chhiar chu a lo ning em em mai hi a lo ni a. Chutih mek lai chuan Evangelical Union of India Vice President nihnate pawh lo chelh tawh ṭhin Paul Sadhukar tia hming invuah ta, Brahmin chhungkuaa seilian chuan Isua zuitu a lo nih dan a sawi a. Luka bung 3 a han chhiarin, Isua chu a awm tak tak a, a thlahtu zawng zawng pawh chhui chian theih vek a ni tih a hmuh chuan Pathian tak a nihzia a hriattir a. An sakhuaa pathiante chu an bul leh tawp pawh chhui hleih theih loh an nih ṭhinziate ngaihtuahin Isua Krista zuitu-ah a inpe ta a ni. Bible-a thil ninawm leh pawimawh vak lo nia kan ngaihte pawh hi a lo pawimawhin, Pathian thu a nih ang ngei hian thil a tithei em em a ni.
Isua Krista thlahtute chhuinaah hian Juda ho tinzawn deuh bika Isua chanchin leh a thlahtute chhuitu Matthaia hian hmun danga kan hmuh ngai loh hmeichhe hming panga lai a telh a, chungte chu Tamari, Rahabi, Ruthi, Bathsebi leh Mari te an ni. Heng hmeichhe panga zinga pathumte hi Jentel mi an ni a. A tam zawk hi chu tunlai chhana hmeichhe nungchang ṭha leh zahawm tia han sawi chi pawh hi an ni meuh hlawm lo.
Jakoba’n fapa sawmpahnih a nei a. An fapate hian nupui an neih a lo hunin an hnam an la tlem avangin hnam dang mi nupuia an neih ngei kha a ngai a. Juda fapate nupui Tamari pawh kha Jentel a ni. Tamari pasal pahnihte an thih hnu khan nawhchizuar anga incheiin a pasala pa/father-in-law chu a mut pui a, chuta ṭang chuan Juda fapa pahnih an lo piang a. Pharesa thlah kal zelah Salmona a lo piang a. Israel fate zinga Jeriko kulh enthlatute kha nawhchizuar inah ber kher an thleng tlat mai a. Khualbuk thlenna remchang awm chhun a nih vante pawh a ni mahna. Chu nawhchizawrhna in neitu chu Rahabi kha a ni. Salmona leh Jeriko khaw nawhchizuar Rahabi te kha an innei ta niawm tak a ni a, an thlahte zingah Ruthi pasal Boaza pawh kha a tel a ni.
Ruthi kha Moab hmeichhia a ni a. Moab hnamte kha Pathianin a mite pungkhawm zingah chhuan sawm thlenga tel lo tura anchhia a lawhte an ni a (Deut 23:3-4). Moab ho chu Lota nupui chi khawna a chan hnua a fanu pahnihten an hrai ruih a, an mut puina aṭanga lo piang pung ta zelte an ni. Ruthi chu a nu/mother-in-law tan fanu fel tak niin, Israelte Pathianah rinna nghatin, a sakhua pawh a thlak a. Ruthi’n fapa Obeda a hrin khan an vênga hmeichhiate chuan a hming an saksak a, “Naomi tân fapa a lo piang,” tiin Obeda an sa a. Ani chu Davida pa Jesaia pa a ni a (Ruthi 4:17).
Ruthi tupa Davida chuan Uria nupui uirein, a pasal a thah sak a. Matthaia hian Bathsebi hi a ngaisang lo hle a nih hmel a, a hming pawh a tarlang duh lovin, “Davida’n Uria nupui lakah Solomona a hring a,” ti chauhin a thai lang a. Chutiang chuan ngaisang lo hle mahse, Isua thlahtute zingah hian a lan tel a ngai tlat bawk si a ni. Bathsebi hi 1 Chronicles-ah Ammiela fanu tiin chhinchhiah a nih laiin, 2 Samuel 11:3-ah chuan Eliama fanu tiin kan hmu thung a. Israel mi ngei chu a ni nain, hnam dang, Hit mi pasala neitu a ni.
Pathianin suala tlu mihringte a chhandamna turin khawvela thil awm sa leh thil awm lote, leh mi fel pakhat te mah kan awm loh avang hian misual berte nen lam a thlang a. Chu’ng misualte chu Pathianin fela a pawm theihna awm chhun chu amah rinna chu a ni. Abrahama pawh kha Sema thlahte zinga mi, Kaldai ho chenna Ur khuaa mi a ni a. Pathianin a kohna chu thuawih takin a zawm a. Chu a rinna chu Pathianin felnaah a pawm sak a ni. Kan thih aia thi a, tho leh tur leh nunna leh chhandamna min pe tura lo kal Isua Krista Chanchin Ṭha chu mi tin, chi tin hnam tin tan a ni. A lo pianna atan pawh Juda hnam ngawt ni lovin, hnam hrang hrang mi a hmang tawh sa reng a ni.
Pathian chhungtea kan lo tel ve na leh a rawng kan bawl ve theihna hi kan zir san deuh vang te, kan zai thiam vang te, eng emaw talent kan neih ṭhat deuh vangte hi a ni ngai lo va. Chu’ng talent zawng zawng siamtu leh petu chu Amah Pathian chu a ni zawk a. Tirhkoh Paula chuan, “Tu-in nge mi dang aia danglam bîkah siam che? A thlâwna in dawn tih loh eng nge in neih? Chuti a nih si chuan i dawn ni lo ang maia engtizia nge i uanpui le?” (1 Korinth 4:7) tiin a lo sawi diam tawh a ni. Pathian khawngaihna avang chauha inthawina nung leh thianghlim, Pathian lawm tlak ni tura kan taksa inhlan phal sak kan ni tih hre reng ila. “A khawngaihna famkim aṭangin khawngaihna kan dawng ṭheuh, khawngaihna hlîr khawngaihna hlîr,” (Johana 1:16) tia kan hmuh angin, he khawngaihna Chanchin Ṭha hi berampute ang khan mite hnenah i hrilh chhawng ve zel ang u.
Discover more from NUN HRUAITU
Subscribe to get the latest posts sent to your email.