America rama evangelical nihphung tam tak lo danglam tak em em chhan hi eng nge ni ta ang le? – Alan Storkey [1]

America rama Evangelical Kristian nihphung lo danglam tak em em chhan hi chhui chian chuan thil ho te a ni hauh lo mai. Trump-a nen an inzawmnaah leh an ngaihdan hrim hrimah hian America rama Evangelical (a hming ringawt pawh hi sawi tham fe a awm) te hian Krista zirtirna an hnualsuat nasat tawh em avangin Kristian rinna awmzia pawh hi an hrethiam ta lo emaw tih mai tur a ni. Zalen taka silai leklam an sawi mawi a, mahni hmasial takin lar an khel a, hausakna an um a, mipat hmeichhiatna lamah an tlan a, huaisar taka midangte hnehchhiah an zir a, zawlnei der leh an thupuan te an um dul dul a, chi leh chi inthliarna an la vung a, rorelna dik lo pawh pawisa tawh lovin huatnain an khat a, mi lian leh thil tithei deuh an tlawn huam huam mai a ni. Engtin nge hetiang hi a thlen theih? Hun rei tak lo inmung tawh a nih a rinawm.

A bul berah chuan sum hi a nih hmel. America rama Kristianna hi hun eng emaw ti atang khan sumdawnna a ni ta deuh tlat a. Pawl anga awmin an pawl brand bik te, milar te, media inthlunzawmna te, insumdawntawnna te leh dik bik riaua inhriatna te an nei chawk. An lo hausak chhoh zel avangin sum luhna kawng an hawn belh zel a \ul a, inhralh dan tur kawng an zawn reng a ngai a ni. Kum tam tak chhung chu hei hi an kal dan a lo ni tawh a, a lawmman ropui ber nia lang ta chu politics a thiltithei tak nih chhoh a President chung thlenga thuneihna eng emaw neih ve a ni. Billy Graham-a leh midangte pawh khan a tirah chuan fimkhur takin hei hi an kalpui a, amaherawhchu thiltithei nih duhna te, media leh sum te hian kum tam tak chu hnehna an chang tawh zawk a nih hi. Hruaitute chuan ennawm siamin mi an hui a, zuitute lah chuan an dik leh dik loh an ngaihtuah tawh si lo.

Republican Party nena an inthlunzawmna pawh hi a rei tawh khawp mai, McCarthy-a[2] te hunlai daih tawh kha a ni mai thei. Khatih lai khan Right Wing Republican ho khan Cold War mei chhem alh nan Evangelical tam tak kha USSR a ‘Pathian tel lohna’ Communist kalphung te bei turin an fuihpawrh a. Democrat Christian Franklin D. Roosevelt-a thupui “Temple atangin pawisa thlengtute chu kan hnawtchhuak ang” tih kha sual lailet dera chhuah an tum a, hei hian an sum hnar a tichhe thei miau si a. Kum 1950 bawr chho atang khan an kalphung chu a rawn lang fiah ta telh telh a. Evangelical ho chuan Eisenhower-a, Protestant ruh tak te, Nixon-a, ‘Tricky Dicky’[3] tia a hminglem an phuah hial te kha an thlawp ta zel a. Nixon-a phei hi chu Billy Graham nen pawh inpawh tak an ni. Billy Graham chuan Nixon a kha, “Kan ram hruaitu tura ruat” tiin a lo sawi hial a, a hnuah hetia a sawi hi a inchhir ve mai thei. Tichuan Republican ho chu Protestant an ni tlangpui a, Democrats ho chu Ireland leh Italy atanga pem te thlah kal zel niin Catholic an lo ni fur thung a. Ram dang atanga pem lut British, German, Dutch leh Scandinavian ho te chuan Republican lam an awn a. Hetianga an dinhmun inthliar dan hi chi leh chi inthliarna nen pawh a inzul chho ta zel a. Evangelical ni si midum ho, Paul Robeson-a te chu Communist tih niin lehlam pawla chhiar an ni thung a. Tichuan hemi hunlai hian Kristian te chuan hetianga inthenna hi lo pawmin mahni pawl pawlah an kal ta zel a. U.S.A. ram a lo zau angreng bawk nen, Kristianna chu then fel a lo ni deuh der mai a ni.

Tricky Dicky hmanga Catholic pa Kennedy-a an beihna chu kum 1960 khan a hlawhchham a. Amaherawhchu hetih hunlai hian a hnu lawka megachurch ni mai tur Kristian rawngbawlna pawl ho leh kohhran hote, Kristian College tha tak tak te chuan khawpui daifemah Kristianna zung an lo kai mek a. Biak Inah te, inkhawmnaah te leh khawtlang thiltihnaa an sawi uar ber chu America ram hmangaihna a ni. An ngaihdanah chuan America ram chu a ropui a, khawvel tan hmahruaitu a ni a, tin American capitalism[4] an tih chu khawvel tan pawh thil \ha a ni. Hetih lai hian thuneihna leh sum chungchang Bible-in a sawisel te leh Isua zirtirna te chu an bo tial tial thung a. Ka la hriat reng chu tlangval pakhat nen kan inkawmna kha a ni. Hetih hunlai hian a pa chuan Kristian radio show a nei thin a, a Kristian thlirna atanga a han thlir khan a pa thusawi te kha dik a ti thei lo a ni. Republican nih a, Kristian Evangelical nih kha thil kal dan tur ni a ngaihna a lo lian chho zel a. U.S. a kohhran reng reng te pawh hi capitalist model veka din chhoh an lo ni ta zel a. Member an inchuh a, mi hip thiam thiam te chu a thang duang ber ber an ni chho zel a, than len zel an duhna rilru erawh a tha lo vek kher awm lo e. Helaia felhlel ta zawk chu Kohhran hi hruaitu zeizia, entu mipuite leh programme lian tham buatsaih ringawt anga ngaihna hi a ni. Hei hi Chanchin |ha a tling zo lo. College te pawh an tha, an inang tlang pet pet, an inel viau, amaherawhchu anmahni tihdan te te chhungah chauh khan an awm thiam tlat tawh. Chutih lai chuan United States chuan khawvel hi Communist lakah a venghim a, sawisel phak a ni lo.

Kennedy unaute chu rawng taka thah an lo ni a. Martin Luther King-an American kohhran hrang hranga chi leh chi inthliarna nasa tak, an sawi chhuah zen zen loh te chu rawn sawi chhuak ve bawk mah se ani pawh dah\hat a ni leh ta mai si. American Evangelical nihna chu radio leh T.V. network, kohhran leh mimal lar tak tak nena inthlunzawmna nei ten a zung an rawn tinghet chho zel a ni ta ber a. Heng milar zingah hian Oral Roberts, Jimmy Swaggart, Hal Lindsey, Garner Ted Armstrong, Jerry Falwell, Pat Robertson te pawh an tel a. Rimawi lam pawh a bang chuang lo. Jim Reeves, Elvis, Dolly Parton, Johnny Cash leh church music group tha deuh leh tha lo deuh te thlengin an tel. A lehlamah chuan an thlir dan chu a awlsam angreng a. An ngaihdanah chuan “I piangthar tur a ni” tih hi Kristianna laimu-ah an dah tawp mai a, a dik reng bawk a, chutih rual chuan Isuan thinlung thlak danglam hlawkna a sawi te erawh kha chu hnualsuat a ni leh daih thung a. Kristian College te pawh U.S. zirna kawngah an thawhhlawkin an pawimawh chho viau mai, khawvel mi thiam chhuanawm tak tak te an rawn chhuah zut a; chutih rualin engmah ngaihtuah lem lova American Dream rawn chen ve tawp pawh an chhuah hnem narawh e. Kum 1980 khan Calvin College ah chuan mi hausa tawntaw DeVos/Amway (American way of life/America mite tihdan tihna a ni deuh ber), sum hmanga rawn tanpui thintute leh an zirtirtu zinga Kristian thlir zau leh an kal dan fuh lo hmu thiam te inkarah buaina a chhuak deuh hial a. Khatih hunlai, kum 1980 leh 90 chhova an course[5] hrang hrang, business studies, technology, media, ralthuam and management te pawh kha thiltih dan inzirtirna an ni deuh vek mai a, ngaihtuahna fim taka hman dan lam kha chu ngaih pawimawh a ni hauh lo. Chuvang te pawh a ni ang, Evangelical leh an sangawi zawnpuite tan chuan dik leh tha tih lam leh midangte thlirna engnge tih lam ai chuan eng pawh kha mahni ngaihdan anga tih tur a ni tawp zel mai a ni.

A awlsam apiang hian min hip ve bawk a ni, a bik takin media ah. TV ah te hian fakna hi a inkahpukchaw chho zut a, keini lah chuan chik lem hlei lovin kan lei leh ringawt zel lehnghal. Han en mah ila, Trump-a hi chu fakna tha lo tak, hlawhtling zet si a ni. Kristianna pawh hi a awlsam turah kan ngai a, chuvangin Kristianna awlsam tak min pe a. Politics lama Kristiante ha hawlh zawng chu nau tihtlak chungchangah hian a ni. Liberal lama invaivung deuhte tan chuan nau tihtlak chungchangah hian ngaihdan chu dang ve bawk awm a ni. Mipaten hmeichhia te chunga hleilenna an lantir theihna kawng a ni a, fa enkawl mumal hleih theih si loh titamin, sex in a ken tel thil zawng zawng a hnualsuat vek a, nau insiam mek hmangaihna leh a nunna ngei ngei pawh a diriam a ni. A nau tihthlak duhtu rilru hriselna lam erawh a ngai pawimawh hauh lo. Amaherawhchu sum um vanga midang chunga hleilenna te, sal chhawra inchhawr te, indo rapthlak tam tak te, mi nawlpui retheihna te, sipai leh ralthuam lama intlansiakna te, mimalin ram rorelna pumbilh te leh politics lama America buaina zawng zawng te nen huang khata dah a ni a. Kristian politics hi ketaminu ke pakhat chauh nei ang a ni lo. Mahse Evangelical tam tak tan chuan hriamhrei ropui tak niin pawla rinawmna teh nan ber te hman a la ni zui.

Tunah chuan Nixon-a tlakdan te pawh kan lo hmu tawh a, khami kha conservative /evangelical /fundamentalist /capitalist intelkhawm te Watergate trick tenawm taka an tawlhthlukna a ni. A hnuah Carter-a, evangelical ah pawh mi rinawm tak a lo lan khan evangelical/ fundamentalist pawl ho te kha an pute ho khan an insawn mai em? Insawn hauh lo, a chhan chu Republican nihnaah khan thil tam tak, sum te, thawhhona te, mipui beiseina te leh politician tam tak te chunga thuneihnaah te an lo inseng ve tawh laklawh si a, kalphung pangngai angah an lo nei ve tawh laklawh a ni. Chuvangin Carter-a kha an dawh hram hram a. Ralthuam lama sumdawngtute khan an hua asin, a chhan chu remna umin ralthuam tihtlem kha a duh tlat a, chuvangin tihtlak an chak zek zek a. Reagan-a, tun hmaa lemchang thiam lo ni thin a, ralthuam siamtu company General Electric tana TV a vawi duai lo thu lo sawi tawhtu khan tum khat communist chungchang a han khak fuh tak zauhah khan evangelical ho chuan an mi duh tak chu an chhar ta ah an inngai hmiah. Biak Inah hian khawi lam hi nge a kawngkapui lam ni a, khawi lam hi nge kawmchar lam tih pawh hre hrang lo tur khawpa inkhawm tlem ni si kha Republican ho hmachhuan ber a ni ta a, Carter-a chu paihthlak a ni ta.

Tunah chuan thil felhlel a awm chiang ta. Kum 1980 a inthlanpui a hnaih khan Reagan-a pawlte chuan Paris ah palai tirin Iran lam mite nen an inhmu a, an thu ken chu Iran-in a mi hrente inthlan a zawh hmaa chhuah lo tura tih a ni. Ni e, Carter-a tihtlak a nih theih nan America mi leh sate chhuah rih lo turin an han nawr a nih chu! Hemi an remti a nih chuan Iran chuan sipai ralthuam an dawng dawn a, hei hi “Iran-Contra deal” intanna niin Nicaragua-a sorkar laka hel pawlte hnenah sum thawn a ni ta thin a ni. Reagan-a President-a lakluh a nih rualin Iran hote chuan an mi hrente chu an chhuah a, khawvel mithmuhah an mi man te kha Reagan-a thlan tlin a nih leh nih lohvah a innghat emaw tih mai theih turin an ti ni awm tak a ni. Chumi letling chiah chuan Reagan-an Bible a kut a nghah chiah khan an mi hrente chu chhuah an ni tih thu a han darh ve leh nghal a. Chutiang te i awih a nih chuan eng pawh i awih thei ang. Hetiang thu mak tak tak hi a lar duh nek ania!

Reagan-a chuan evangelical ho hmuiah chuan chithlum a han tat vel a, eng teh ual a tihsak hlei lova. Ani chu hmachhuan bera hman mah ni se a hna tak tak chu a team ten a phenah an thawk a, anni ho chuan evangelical thil lam an ngaihsak vak lo. Kum 1988 khan Pat Robertson-a chuan President chuh ve a duh a, zuitu ngawt pawh mi maktaduai 3 vel neiin sum lamah a buai lo bawk, amaherawhchu politician lo zet mai a nihna kha a tlak phah a, primary pawh a paltlang zo ta lo a ni. Bush Sr. leh Bush Jr. ten evangelical ho an han tlawn ve leh a, an lawmman pawh vote hmangin an dawng leh tawk bawk a. Tunah zet chuan evangelical, right-wing, capitalist ni thin kha pawl ropui tak, media leh lalram zau tak nei an ni ta mai a. Zawlnei tam tak an lo chhuak a, Kristianna leh khawvel thil thleng te chhut dan tur zirtirtu ber an lo ni ta. Anni ho lah chu kum tam tak Kristian sakhaw zirna tha tak tak te leh Kristian mi thiam, thlir zau leh fing, mahse media lama lar khel ve vak lo te ngaihdan nen an inpersan nasa mai si. Lehkhabu chhiar hnualsuat tam tak an awm phah a, an pawl rilru mil lam inziakna lo chu an chhiar peih lo a, chutiang pawh tlai khata chhiar zawh theih tawk bak an chhiar peih lo. Reagan-a hunlai atang khan Republican lam hotute chu America ram mipui inrelbawlnaah duhthalin an che thei tawh reng a ni.

Politics khawl inher vel te, US a Democrat leh Republican ten Washington chunga thuneih an inchuhnaah te Evangelical Kristian te rinna chu a buk a rit hle tih thup rual a ni ta lo. Vote bawmah hman an ni a, anmahni tak erawh chu hnualsuat an ni. Sum leh pai chuan a duh dan danin ro a rel vel a ni ber a. Chutiang zingah chuan khawvel sik leh sa danglam chak tak sawi bo te a tel a, hei hi sumdawng lianten an sumdawnna an chan loh nana tih a ni. Middle East a indona tihchhuah te pawh a tel a, chumi avang chuan US sipaiten tantu an ngah a, US chuan superpower a nihna dinhmun pawh a sawhnghet a ni. Healthcare, rethei leh hausa inkar thu leh America rama a chhia zawng zawng te pawh hi a tel vek mai. Danin a phal anga silai kawl te a tel a, a tira an kawl duh chhan sal lah an awm tawh si lo. Evangelical thupui chuan Republican capitalism chu a nih ang angin a pawm a, Left lam lah chu hmelma ah puangin Kristian mita an politics khelhna ber pawh nau tihtlakah bawk chuan a la ni. Obama te kha mi chengvawng, mi thiam leh kristian President a ni chung khan midum a nihnaah leh Democrat a nihnaah khan an hnawl leh tlat a, thu puarpawleng mai mai hmanga beihah te an tlak mai mai. An zinga hotute, Franklin Graham-a te thleng hian, an thlahtute lem nuihzatthlak taka chang mai an lo ni chho a, chu chuan Trump-a tan kawng zau takin a hawng ta a ni.

President chuh turin a hausa ve tawk a, Republican khawl kha a khawih thiam tlat a, Kristian hruaitute kha a han tham zeuh bawk a, anni lah chuan ngaithlatu tur beng an mamawh tawh ropui bawk si. Nau tihtlak chungchang leh Supreme Court a judge dah te kha a hmanrua atan an tawk em em tawh mai a ni. Pathian chu hnualsuatin sum a bia tih chu a chiang reng. Kristianna hi a bel lo hle a, rinna kawng phei hi chu a nun leh a chezia hian a la hel char char a, sim phei chu a la hlat hle. Chuti chung chuan Evangelical ho chuan Pathianin ring lo mi Lal Kura a hmang tho ang khan a hmang ve tho turah ngaiin an bawh huam huam tho mai. Tichuan Kristian 80% teh meuh maiin an vote a, a tling ta hial a. A thutiam a hlen loh te, thudik a sawi loh te leh a ze \ha lo tak tak te hailan a ni chung pawhin tun inthlanah pawh khan thenkhatin bansan tawh mah se a tam zawk chuan zuk la vote duh tho a! Midwest[6] a hna nei lo leh mi rethei te te te hnenah te khan a lo intiam nasa ve si a, tun inthlanah kha chuan a intiam ang a ni lo tih a tam zawkin an hmu ta niin a lang. Fakna lem a ni a, a thutiamte lah chu mipui khawngaihthlak tak tak tan chuan vut zinga vawih ang lek a ni si. Chuti chung chuan Evangelical ho chuan an en liam mai mai a. Dik tak chuan America ramah hian Kristian fing tak tak, chengvawng si, rinna kawnga rinawm tak tak an tam mai, chutiang bawkin ngaihdan leh Kristianna thlir dan inang lo pawh a tam. Kan han sawi tak Kristian te pawh hi an awn lam kan han sawi mai a ni a, pawi ta ber zawk chu he awn lam hi vote maktaduai tam tak a ni hi a ni.

Hei hi a nihna takah chuan Kristian sakhaw tan chuan chhiatna nasa a ni, indona te, khawvel pum capitalism te chawisang a, ram leh hnam sawi chamchi a mi rethei te theihnghilh leh si sorkar Evangelical ten an thawhpui tlat hi. Reformation tan tirha Catholic Kohhranin harsatna a tawh anga lian a ni hial mahna. Krista’n zawlnei derte leh hruaitu mi hip thei tak si, chhungrila mitthi ruh chauh pai a tih kha hi Trump-a hmehbel theih tak a ni. Sorkar kaltlanga mipui rawngbawlnaah hian inhnamhnawih tur a ni lo asin. Republican ho thupui hian Kristianna nen inzawmna sawi tlak a nei lo. Democrats ho pawh an bang bik chuang lo, chuvangin \ha zawk tih tur em em an awm lo; President thlanna atana fimkhur nan chauh a ni ber e. Kristian emaw, Evangelical hruaitu leh politician emaw neih ringawt te hi a tawk lo; rorelna dik leh fing, mi rethei leh chak lo ber te thleng phak, kan ram tidama tluangtlam leh tha taka kan nun ve theihna kawng hawng tura rei tak pawh beih ngai se bei mai tura kan insiam leh a ngai a ni. Tuna kan kalphung leh kan insawiselnate pawh hi thu puarpawleng infahtawn mai mai ang lek kan ni. United States hi kan inhmuh dan leh khawvel pawhin min hmuh danah chuan Kristiannaa hmahruaitu kan ni thin, amaherawhchu tunah hian kan hlawhchham let der a. He hlawhchhamna hian simna, rilru chhungril inenletna leh thiltihtheihna, hausakna leh thuneihna hnualsuat ngamna a mamawh a ni. American leh Kristian tam tak ngaihtuahna seng tawh an awm a, anni hi media te chuan an ngaihsak hran lo. A tha zawnga danglamna hi rilru natna leh chhiatna thlenlo hian a tih ve theih reng mai, mahse chumi atan chuan hun a kal liam mek zel si. American Kristian kalphung tam tak hi chuan a hma aia nasa zawka mahni inenlet chunga, ngaihtuahna leh rilru put hmang hrim hrim hi a thlitfim chhoh zel a tul. Danglamna chu a lo thleng ngei dawn e.

---

[1] Alan Storkey a hi economist leh sociologist niin Cambridge leh London School of Economics a zir chhuak a ni a. Amah hi Kristian a ni a, a lekhabu thenkhatte chu “Jesus and Politics: Confronting the powers”, “Transforming Economics” tih te a ni.

[2] Joseph Raymond McCarthy (November 14, 1908 – May 2, 1957) kha America rama politician niin kum 1947 atanga kum 1957-a a boral thlengin Wisconsin state atangin Republican Party hmingin Senator a ni. Kum 1950 bawr chho vel atanga Cold War boruak chhovah Communist lian zel tur hlauhna nasa tak a chhuah laia America rama mi challang ber pawl a ni a. America ram sorkarah te, university-ah te, film industry-ah te leh hmun dang dangah Communist leh Soviet enthlatute leh anmahni hum duhtu tam tak an inphumru tawh tia dawt thu vawrh darh a, mipui tichiaitu bera ngaih a ni. A tawpah phei chuan hetia dawt a vawrh chiam thin avang hian U.S. Senate pawhin a khap ta hial a. A thiltih te avang hian kum 1950 bawr chho vel atang khan dawt hmanga communist dona lam kawng reng reng chu a hming lemah ‘McCarthyism’ tih te an lo phuah vel. Tunah chuan mahni hmasial taka mipui rilru sukthlek hruai kawih te, finfiahna awm lova midangte a chhia zawng zawng burbun ngawt leh politics-a elpuite mizia leh ram an hmangaih dan ringhlel zawnga mipui hmaa beihna te hi ‘McCarthyism’ tia sawi an ni.

[3] Richard Nixon kha kum 1969-74 chhunga U.S. President a ni a. Watergate Scandal avangin President nihna atangin a bang a ni. June Ni 17, 1972 a Washington D.C. a Watergate Office Building chhunga Democratic National Committee headquarters-a luhruk thubuaiah a lo inhnamhnawih ve avangin leh a inhnamhnawihna thupbo tuma hma a lo lak avangin he scandal hi a lo irhchhuak ta a ni.

[4] Capitalism hi ram ei leh bar thua thutlukna pawimawh zawng zawngte chu mi hausa tlem te chauhin an siamna hi a ni. Capitalist economy ah chuan mi hausa tlem tein thuneihna tam tak an chang a, anni chuan hlawk lehzualna an um deuh ber bawk. Socialism kalphungah erawh chuan sorkarin hlawkna um em em lovin ram hausaknate chu mipuiteah a intluktlang zawka semrual a nih theihna tur kawng an dap \hin. Thuneihna chu mi tlem teah ni lovin sorkar kalphungah a awm deuh ber.

[5] He’ng an course te hian khawvel pum huapa thlir dan ngaihtuah aiin thil mal an khel \hin ta zawk a. Hei hi Evangelical te ngaihtuahnaah pawh a lut thukin an rilru a kaihruai khawp mai. Hetiang ngaihtuahna hian dikna leh felna ngaihpawimawhna kawng a tibahlah thin.

[6] Midwest tih hian America ram hmar lam leh a lai (north central) state sawina a ni deuh ber. State 12 a huam a, a tlangpuiin lo neihna leh thil siamna (manufacturing) hmunpui a ni.