Kawng Zawhna – 12

A hnung zuia Kawng zawh

Thiltum #1-na: Isua kianga awm – V

“I nun aṭangin hmanhmawhna hi i paih bo tur a ni”

Ni e, a harsat hmel khawp mai. Mahse chiang takin hei hi sawi ka duh: Isua hnuaia zir tura kohna hi ti tam zawk tura kohna ni lovin ti tlem zawk tura kohna a ni.

Belh ni lovin paih a ni.

Thil tam tak, harsa taka um lam ni lovin a ṭul chin chauh thliar thiam lam a ni.

Tihṭhan thil neih belh zel lam ni lovin thil hnar chin neih zirna lam zawk a ni.

Isua chuan dim deuh zawka kal a, i nunah a ṭul chin thliar thiam a, zuituin a tih tur pathumte ngai pawimawh zawk turin a ti che a ni: I rabbi kianga awm, i rabbi ang nih leh a tih anga tih. I nun pum chu a zirtir i nihna chheh vela vir kual ve tawh zawk tura tihna a ni.

Thil lang chiang reng chu mi tam zawk hian kan ni tin nun buai tak kara Isua han “belh” leh tur hian hmun leh hun awl kan nei meuh lo hi a ni. Pawi ka ti khawp mai a, mahse hei aia dima sawi ngaihna hi ka hre lo: Kan nuna hmanhmawhna dah bova, dim deuh zawka kal loh chu Isua zui dan kawng dang a awm lo.

Dallas Willard chuan hmanhmawhna hi “kan tunlai khawvela kan thlarau nun hmelma lian tak” tiin a lo sawi a, “I nun aṭangin hmanhmawhna hi i paih bo tur a ni,” a ti bawk. Isua hi tih takzeta zui i tum a nih chuan hmanhmawhna hi i harsatna tawh hmasak ber tur a ni ang. I hmaah a ding ngawt lo ang a, hmelma ang maiin beih tak tein a bei ang che.

Tuna ka enkawl mek hlawkna um lo pawl “Practicing the Way” (A hnung zuia a Kawng zawh) kan tih hi Bridgetown Kohhrana bul kan ṭan tirhah chuan kum nga chhunga thlarau lam dinhmun siamṭhatna anga kalpui tum a ni a. Kan ṭan hma hian rilru lam zir mi, Kristian ka hriatah chuan a fing ber pawl pakhat hi ka titipui a. Kohhran thar din tura ka ruahmannate min thlirpuia, a chhe lai min siam ṭhatpui turin ka beisei a. Kan tum dante chu Pathian thu-ah leh science-ah a innghat ṭha a tih thu min hrilh deuh ber a, min phurpui hle nghe nghe a. Chutih rualin vaulawkna angreng deuh thurawn min pe a: “I harsatna tawh lian ber tur chu hun thu hi a ni, a chhan chu mi tam zawk hi chu an buai leh lutuk a, rilru hrisel tak leh thlarau nung tak nei tur pawh hian hun an nei lo,” tiin.

Hun vanga buaiin kan nung vek a ni: Isua kianga awm kan duh a, mahse ṭawngṭaina hun kan nei lo. Hmangaihna nei mite nih kan duh tak tak a, mahse tih tur dang kan ngah em avangin hmalakna tak tak kan nei thei lo. Chawlh hi kan thlarau nun hriselna thuruk a ni tih kan hria a, mahse Sabbath (Pathianni) hi? Kan nun pum hmun sariha ṭhen hmun khat a ni daih asin! Chutih rualin kan lungawi mawlh si lo: Kan hmanhmawh a, kan mangang a, Pathian kan hlat a, kan thlarau nun a kawrawng a, mahni tana ṭha lo mize nghet takin min sal bet reng a. Pathian lalram thleng tura kan thlarau zinkawng chuan tlang chhip a thleng zo lova; zuitu Kawng pawh kal kual kal kualna turah kan chhuah a; Easter pawh kut pakhatah kan chhuah ta thawthang mai.

Heti ringawt chuan kan nung reng thei lovang. New York khawpuia pastor pakhat Rich Villodas-a chuan a lehkhabu “The Deeply Formed Life” ah heti hian a sawi a:

Kan thlarau hi tunlaia kan nun hmanhmawh tak ruala kal ve zel tura siam a ni lova. Chu vang chuan keini hi pen dan tur tawk aia chaka pen kan lo ni a, tih tur ngah em em mahse hun nei reng reng lovah kan inchhuah ta a nih hi…

Kan nun hian chauh derna kotlangah min dahpui awlsam ta em em a. Kan nun hmanhmawh hi chhiatpui rup hlauhawm a ni. Chawlh kan nei lo lutuk hi chauhpui tham a ni. Kan tha a ṭhum zo tawh. He’ng zawng zawngah hian kan hmaa harsatna lo awm ta chu, kan nun hmanhmawh lutuk ringawt hi a ni lova, kan nun hmanhmawh avanga kan nun aṭanga kan nawr chhuah tak zawk hi a ni: Pathian nena leng dun nun hi.

Chu vangin kan kal muan hret chu a ṭul dawn a ni. Kan nun bulṭhut thlir letin bul ṭan a ngai ang a, chutah chuan kan hun hman dan uluk takin kan en ang a, belh lovin paih tur kan zawng ang, Isua kianga awm kan duhna avangin.

Hei hi a nawm hmel loh tawp a, mahse chanchin lawmawm a ni – chanchin lawmawm ber a ni hial ang. Isua hi hnathawk tura min kotu, “ṭang sauh sauh teh u” tia min tur reng ang a ni lo, Sam 23 a berampu ṭha, “hlobet hring dup hmuna chawl” tura min kotu a ni.

Isuan “Lo kal ula, mi zui rawh u,” a tih khan kalsan tur kan nei a ni tih a sawi tel nghal a. “Mahni kraws puin” a tih kha inpek ral a ṭulzia sawina a ni a. Kan thihsan, kan chhuah zalen, kan paih bo ngai thil a awm a ni.

Ronald Rolheiser chuan, “Duhthlanna eng pawh hi kalsanna sangkhat ang a ni,” a ti a. A awmzia chu pakhata “Aw” kan tih hian a dang sangkhatah “Aih” kan ti a ni. Isuan a ke bula zir tura min sawmna hi “Aw” tia kan chhan chuan sawmna dang tam tak lakah “Aih” kan ti tihna a ni. 

Nun muang zawk leh awlsam zawk nei tur hian kei ngei pawh hi hna pahnih aṭangin ka bang tawh a. Tun thlenga ka inchhirna ber chu ka lo bang hma deuh lo kha a ni. I hna i ban phah ve kher a ngaih loh hram ka beisei a, mahse a ṭul tlat thei tho bawk a nia. A tam zawk tan chuan kan thil subscribe eng eng emaw cancel a tawk mai ang a, mawhphurhna eng eng emaw kan phat a tawk mai ang a, TV en tlem a tawk mai ang a, (a tuka tho hmaa ṭawngṭai tura) mut hma a tawk mai ang a, kan ni tin nunah thawk lakna, chawlh detna leh Pathiana awmna hun insiam a ngai ang.

Isua zui turin i nun hmanhmawh chu i timuang hret dawn lo’m ni?

I taksa leh rilru timuang tura Isua pawhin a lo tih ṭhin dante (he lehkhabu-ah hian kan la sawi ang a) kha i hmang ṭangkai ve dawn lo’m ni? Hmangaih taka Isuan a en lai che en ve thei tura Pathian mawizia thlir turin. He Kawng hi zawh ve chhin chu tuna i nun dan ai chuan a ṭha zawk lo’ng maw? Han ti chhin ve reng reng la.

Johana 1 ah khan Isuan a zirtir nih duhte hnenah khan, “Lo kal ula, in hmu ang,” a ti a. A awmzia chu, “Lo kal ula, Kawng zawh nun danin ka kiangah eng emaw chen chu lo nung ve ula, hmangaihna lalrama nun ho chu lalram danga nun aiin a ṭha zawk fe em tih han fiah ula, he kawng hi kawng dang aiin a ṭha zawk em tihte nen.”

Lo kal ula, han en chhin teh u…