Tiam Tlat E (I Married You) XII– Walter Trobisch

Bung 3 Chhunzawmna

Timothy-a nen kan chhuah lai chuan Maurice-a chuan, ‘A nih chuan, tunah chuan nupui tur hmeichhia chauh ka mamawh tawh a nih chu,’ a ti a.

‘I nei reng emaw ka tia.’

‘Bus stand pahnih inkara ni tin ka biak ṭhin ka tih kha maw? A, ka hre lo. I thusawi ka ngaihthlak hnuah kha chuan “tisa pumkhat” ka nihpui tur atan chuan ka chiang ngam ta hauh lo mai, i sawi dan taka “engkim ṭawmpui” tur atan.’

‘Kum sawm leh pariat zeta i upat zawk chuan i fanu rual lek tihna a nia. Chutianga en chu i tum ngei ngei ang. A ṭha berah huan thuawih thei tak a ni ṭawk ang, i thawhpui ni lovin.’

Maurice-a chu a nui huk a. ‘Hei vang hi a nih ka ring African mipate hian hmeichhe naupang tete neih kan duh chhan hi. Huan thuawih thei tak neih an duh mai mai a ni ang. Mahse ka harsatna chu maw, Pastor, hmeichhia han biak ṭan dan hi ka thiam hlawl lo a ni.’

‘Chu’ngte chu naktuk lamah sawi ila. Min lo lam leh ang tiraw? I nu pawh khawngaihin lo hruai ve la.’

‘Ka nu maw? Ngatinge? Kum sawmruk chuang a ni tawh asin. Sex leh hmangaihna chungchang chu a ngaihthlak chak pawh ka ring tawh lo e.’

‘Lo hruai tawp la a ni mai.’

A tlan liam a, Timothy-a nen chuan ka room lam kan pan a. Kan ṭhu fel te te a, kan titi ṭan ta a.

‘Vawiin chhun khan airport-ah Miriam-in min titipui a,’ ka han ti a.

‘Ni e, ka hria alawm. Hmeichhe ṭha tak niin i ngai em?’

‘A ni ngei ang. A hmel pawh a ṭha alawm.’

‘Nupuiah nei ila ka tan a ṭhat i ring em?’

‘Pasala nei tur chein i thlem thluk theih i inring em?’

‘Chu tak chu a nia. Kan inmil dawn em tih chungchangah rinhlelhna a la nei niin ka hria.’

‘A rinhlelh chhan a hrilh che em?’

‘Hrilh lo. Kan inbe khat khawp mai. Mahse ka hre thiam thei ruakin ka hria. Amah aiin inchi chanve velin ka tawi zawk a, ka hang deuh zawk bawk a.’

‘Han deuh zawk chu a pawi viau em ni?’

‘Pawi e. Ngo hi mawinaah kan ngai a.’

‘Miriam-i chuan chutiang lam engmah a sawi lo.’

‘Eng nge a sawi a?’

‘Nangmah ngeiin zawt la ka ti.’

‘Mahse Pastor, chutiang lam chu kan sawi chi a ni hleinem. Miriam-i pawh hian chu chu min hrilh la a tih vangin inkawm se min ti niin ka ngai a.’

‘Ka hria alawm. Mahse amah ngeiin hrilh che se a ṭha zawk hrim hrim. In titi dun theih chuan inneihna atana pawimawh tak pakhat in zir dun thei dawn a. Chu chu thil inhrilh tawn hi a nia.’

A ngawi vang vang a.

‘Kum engzat nge i nih?’

‘Kum sawmhnih pahnih.’

‘Miriam-i hi kum engzat nge a nih i hria em?’

‘Hre lo. Min hrilh ngai lo reng reng.’

‘A hlawh zat i hria em?’

‘Ka zawt ngai lo hrim hrim. Pawl riat ka zir zawhin school ka chawlhsan a. Tichuan sipaiah ka lut a.’

‘Tunah eng nge tih zel i tum?’

‘Eng nge i sawi awmzia chu?’

‘Eng nge i hmalam hunah tih tum i neih? Eng beiseina nge i neih?’

‘Engmah tum danglam ka nei lo. Rei lo teah sergeant-ah ka kaisang thei ang a. Chu bak chu engmah sawi tur ka neih pawh ka hre lo.’

‘Mahse Timothy, Miriam-i chuan high school a kal a. Nang aiin a hlawh hnem zawk a, nang aiin a upa zawk bawk a.’

‘A ni maw?’ a ti a, a ngaihtuahna a kawm zui rauh rauh a. ‘Chu’ngte chu inneih khamtu an ni thei em?’

‘Dan naran chuan ni hran lo e. He’ng aia lian hi chu ka hre nual mai.’

‘A nih chuan rem taka innei theiah min ngai tihna em ni?’

‘Theih tho ang a, mahse a awlsam lo ang. A remna tura in beih ve fe chu a ngai ang. Chutianga bei tur khawpin in inhmangaih em tihah thui tak a innghat a ni ber.’

Pawr angreng takin Timothy-a chuan, ‘Mahse Pastor, ka hmangaih alawm,’ a ti a. ‘Ka nei thei lo a nih chuan eng nge ka tih zel dawn pawh ka hre lo e a.’

‘I intihlum mai dawn em ni?’

‘Chutiang chuan vawi khat chu ka hrilh tawh.’

‘Chutah chiah chuan alawm thil i tihsual Timothy. I hmangaih tak tak em tih thlengin kei pawhin ka lo ngaihtuah phah asin.’

‘Engati maw?’

‘A chhan chu a rilru tihrehawm zawngin i nawr lui a. Chu chu hmangaihna a ni hleinem. Hmangaihna chuan kawppuite a nawr lui ngai lo. Hmangaihna tak tak chuan kawppuite zalenna famkim a pe zawk a, “Aih” tih theihna thlengin a pe zawk alawm. I intihhlum hlauhna vang ringawtin nei ta che se la, hlauhna avanga nei che a ni dawn asin, hmangaihna vang ni lovin.’

‘A nih chuan engtin nge ka inhmangaihtir theih ang a?’

‘I hmangaih a ni tih lantir rawh. Vau zawng ni lovin, rim taka hna thawk zawngin.’

‘Hnathawkin maw?’ Timothy-a hmel chu a dur khup a. ‘Eng hna maw?’

‘Nangmah insiamṭhatna hna.’

Ka thusawi chu a hre thiam lo tih hriat fahranin min en a.

‘En teh maw Timothy, Miriam-i nen in inlaichinnaah hian a upat zawk leh a zir san zawkna ai mahin tum mumal i neih lohna hian min tihlauhthawng a ni. Miriam-i chuan a hmalam hunah thil tam tak tih duh a nei ngeiin ka ring. Mahse nang chuan sergeant i nih mai theih thu chauh min hrilh thei a. I ni thei a, i ni lo thei bawk a. Tum mumal i nei lo alawm. Miriam-i hi lo nei ta pawh ni la hei vang hian in buai tho tho ang.’

‘Mahse ka san zawng te, ka kum te leh ka zirna te chu ka tidanglam thei si lova.’

‘I tum chu i tidanglam thei chiang alawm. I tihdanglam theih ho hi tidanglam mai la. Chu chuan Miriam-i chu i hmangaih tak tak a ni tih a tilang dawn alawm. Thil dang thil dang a ngai hran lo.’

Ka thusawi chu ngaihtuahin Timothy-a chu a ṭhu ngawi ran a. Ngaihtuah tur pawh a ngah ve viau chuan ka hria.

A tawpah chuan a hmel dur khupin a chhuak ta a. Hetiang zawng hian kan titi ang tih a ring pha lo a ni tih ka chiang. A liam hnu chuan ka chauhzia ka inhre chhuak a, rei lote chhing sek turin ka tlu zal a. Inthlak pawh inthlak lo chuan ka muhil thei mai dawn emaw ka tih laiin telephone a rawn ri a.

‘Vawiin chhuna lo betu che kha ka nia.’

‘Min lo be leh chu ka lawm hle mai. Chhunah khan i hming leh address ka lo zawh theihnghilh daih che a.’

‘Ka hming leh address chu ka hrilh duh lo che alawm. Hetiangin mi ka bia tih ka pasalin hre lo se ka duh a.’

‘Tunah khawi aṭangin nge min lo biak a?’

‘In aṭangin. Kan pa hi beer in turin a chhuak a. A lo let leh chuan telephone pawh hi ka dah nghal vat a ngai ang.’

‘A nih chu aw.’

I thusawi kha ka lo ngaithla ve a. School aṭangin ka tlan bo a, mahse ban hmain ka let leh hman tho a. Ka pasal chuan ka inkhawm ve daih tih pawh a hre chuang lo.’

‘A nih leh ka thusawi chu eng nge i ngaihdan?’

‘A ngaihnawm ka ti khawp mai. Mahse triangle i tih kha chu ka duh ve chiah lo.’

‘I duh lo maw? Eng lai nge i duh loh ber?’

‘Duh loh lai ber pawh ka nei chuang lo. Ka duh lo ve tawp. Kil te, zum te a ngah lutuk a. Mi a tina thei alawm. Mipa ang mai alawm – mipain inneihna chungchang a thlir dan; line leh kil ngil vek. A eng lai pawh kha a inkawp rem vek tur a nih hmel. A nawm loh hmel a, khatiang kha chu a phurawm pawh ka ti fahran lo.’

‘Ka lawm e.’

‘Inneih chungchang ka ngaihtuah hian kei chuan thil bial, mam leh nem deuh ka ngaihtuah ṭhin. Puan lum nuam tak ang maia inbel theih angin.’

‘A nih chuan circle hmun thuma ṭhen ziak ta zawk ila.’

‘Chu aia ṭha chu ka hria. Blackboard-a triangle i ziah ka lo en khan puan in a ang ka lo ti riau a.’

‘Puan in maw?’

‘Aw, puan in. A kaihna pathum tal a neih a ngai a, a nih loh chuan a ding nghet thei lo a. A ding tawh a nih chuan a chhungah i lut thei a, thlipui lakah pawh him takin i awm thei a. Ruah sur lai pawhin puan in chhungah chuan a lum nuam a. Chutiang chu inneih chungchang ka hmuh dan a ni.’

Chutiang zawng chuan ka lo la ngaihtuah ngai miah lo. ‘In inah chutiang chuan awmin i inhria em?’

‘Teuh lo mai. Ka puan in hi a la kim lo alawm. A chung a nei lo: a kil pakhat, kalsanna i tih kil kha. Mite hriatpui leh dan hmaa inneihna, inkutsuihna tak tak kha.’

‘A chung a neih loh chuan in puan inah chuan ruah a lut reng mai dawn a nih chu.’

‘Ni e, Pastor, ruah a lut reng mai a nih hi. A nuam hauh lo. Tu in nge min pui thei ang?’

A ṭap tih chu a thup hlei thei tawh lova.

‘I duh phawt chuan puih che ka lo tum ang.’

‘Ka nu leh pate chu ka kalsan tawh a, mahse dan anga pasal nei ka la ni lo.’

‘I kalsan tih hi Bible-in kalsan a sawi nen khan a inang lo alawm. Nu leh pate leh fa inkara inpawh tawn taka inkalsan ang kha a awm lova. Khatiang inkalsan kha chuan a tawpah mi a phuar nghet sauh ngai a nia. Nang chuan huatna vangin i kalsan a, anni’n an hlamchhiah ve tawp che a nih kha.’

‘Chu pawh ni se engati nge ka pasal hian kan puan in chung hi a tihphui ve mai loh le?’

‘I nu leh pate hnenah i kir leh thei tawh lo tih a hriat chian vang a ni mahna.’

‘Ni e, huan ang emin min en lo tal a.’

‘Chu chu engtin nge i hriat?’

‘Fa neih a duh lo a.’

‘Thlai chinna huan atan a duh lo che anga pangpar huan atan chauh a duh che a ni ang a. A hun awla nawmchenna mai mai turin.’

‘Mahse min la lei hleinem. Ka man pawh a la pe hleinem.’

‘I lehkha zirna man a tum tho sia.’

‘Amah ka rin chawtna turin hei hi ka man a pek dan chi khatah a ngai niin i hre deuh em ni?’

‘Amah ka titipui zet loh chuan ka chiang ngam lo. Mahse thil awm thei chu a ni.’

‘Bakah ka hmangaih tho bawk sia.’

‘I hmangaih tih ka hria alawm. Ni lo se min lo be hauh lovang.’

‘Ani pawhin min hmangaih alawm. Chu vang a nia ka zirna man a tum.’

‘I thusawi chu thudik ni se ka ti khawp mai. Hmangaih tak tak che se chuan in puan in chung hi a khuh ping ang a, in inneihna hi dan angin a tifel tur a nia.’

A ṭap leh ta a.

‘En teh, in telephone number min pe thei ang em, amah chu ka lo biak theihna turin?’

‘Teuh lo mai! Chu a lo haw!’ tiin a dah ri rawk a.

Puan in! Hmeichhe fel tak chu a ni phawt mai. Puan in. Inneihna chu puan in ang a ni. Ka Bible ka han la a, a tawp lama zawn awlna chu ka keu a. ‘Puan in’ tih hnuaiah chuan Bible chang za chuang zet hi a awm a. Ka han keu thuak thuak hlawm a, a tawpah Jeremia 10:20 hi ka zuk hmu fuh ta a:

Ka puan in a chhe ta, ka hrui zawng zawng a chat vek a;

Ka hnen ata ka fate an chhuak a, an awm ta lo.

Ka puan in zar tur an awm tawh lo,

Ka puanzar tungding turte.

Hei hi a chang thlan a ni ngat mai, tiin ka ngaihtuah rauh rauh a. ‘Ka puan in zar tur an awm tawh lo.’ A hming leh a telephone number te tal han hria ila aw! Tuna ka tih theih awm chhun chu engmah ti thei lote thil tih theih awmchhun tia ṭawngṭaisak mai a ni ta.

Mut a lo hun a, ka suitcase aṭangin ka mut kawr ka han phawrh lai chuan kan nu thuziak hnutchhiah a lo tla chhuak nawlh a. Ka han chhiar a: ‘Inhmangaih leh inpumkhatin. Deine Ingrid.’

Ka puan in, ka puan in tih ringawt ka rilruah a awm a. Tichuan ka lo muhil ta a.

chhunzawm tur