Tiam Tlat E (I Married You) XI– Walter Trobisch

Bung 3

Mipuiin ban hla an sak lai chuan hlawhchham riauva inhriatna ka nei tlat mai a. A tawp lamah khan an reh duk mai kha a nia. Daniel-a ka aṭanga fakna thu dawn beiseina chu ka do zo ta lo a.

‘Ka sawi rei mah mah a ni tiraw?’ ka va ti ru sar sar a.

‘Rei vak pawhin ka hre lo. An ngaihthlak uluk viau kha.’

‘A tawp lamah khan an reh duk sia.’

‘Keini ho hi chu kan rilru hneh deuh thil a awm hian kan reh duk zel alawm.’

Ṭawngkam ṭha mai mai a nih leh nih loh ka chiang si lova, chu vangin ka zawt ta phawng mai a:

‘Nang eng nge i ngaihdan? A ṭha lo viau em?’

Ka rilrua thil awmte chu hre thiam ve vek ni awm tak hian min nuih sak a, ti hian min chhang a:

‘A…Huaisen takin a pawimawh lai i khawih chat chat alawm.’

‘An hua ang em le?’

‘Huat ka ring lo. Ka sawi ni se an pawm loh tur thil tam tak a awm a, mahse i sawi a nih chuan an pawm ang. Lo hua pawh ni se eng nge pawi? Nangma thuchah sawi i ni lo a ni lo’m ni? Hei mipuite hi i chibai an ngai a nia.’

An rawn intlar a, an tih ṭhin dan angin pakhat te tein kut khinghnih meuhin min rawn chibai hlawm a. Miriam-i chuan a hnuhnung berah min rawn chibai ve a.

‘Ka pasal hual hi ka lo hmelhriattir ang che aw. Timothy-a a nih hi.’

Sipai thuam inbel tlangval pakhat hian min rawn pan a, chibai min rawn buk a. A hang angreng viau mai a, Miriam-i aiin tawi deuh mah se a sekin a taksa chu a chak hmel khawp mai.

‘I thuchah avangin ka lawm hle mai. Titipui che ka duh a ni.’

‘Hotel-ah min zui haw thei ang em?’

Maurice-a car lam panin Miriam-i leh Timothy-a nen chuan kan inzui phei a.

‘Ka thusawi chu eng nge ang i tih?’ tiin Miriam-i chu ka zawt a.

‘Ka dawngsawng fuh viau chuan ka hria. Timothy-a nen hian triangle vei lamah khan harsatna kan nei niin ka hria – invawnah khan. Kan invawnna hi chhungte kalsan thei tur khawpin a nghet em tih hi kan chiang lo a ni.’

‘A nih chu. Timothy-a nen kan titi hunah chu’ngte chu kan sawi fel theih beisei ila,’ ka ti a. A lawm hmel viau.

Timothy-a nen Maurice-a car-ah chuan kan chuang a. Hotel lam pana kan kal lai chuan nui chungin Maurice-a ti hian ka fiam a:

‘Huan nei lo huan enkawltu chu eng nge a an?’

‘A inngaihtuah nasa khawp mai. Hmeithaite chungchang i sawi kha dik ka ti lutuk – neitu nei lo huan an ni tih kha. A dik chiah a ni. Hei vang hian alawm ka nu hmeithai lakah hian bat ka la nei tlatin ka inhriat. Kalsan thei dinhmuna ka la din loh avang hian alawm mi dang ka la vawn theih loh,’ a ti a.

‘Huan leisaktu tur pa i nei lo bawk a.’

‘Nei lo, ka zirna tur tuaka inhlawh pahin ka nu ka enkawl a ngai a. Tun thleng pawh hian ka la enkawl zel turah ka ngai. Inneihnaa pawimawh hmasa chu mahni hringtu nu kalsan a nih chuan kei chu nupui nei thei ka ni dawn lo tawp mai.’

‘“Kalsan” tih khan thlahthlam tawp tihna a ni lo ka tih kha.’

‘Ni e, ka hre thiam alawm. Mahse engtin nge kan tih chuan ang? Nupui lo nei ta pawh ni ila, ka nu hi ka inah ka lak luh tho a ngai ang a. Engtin nge kalsan tho siin ka chenpui tho theih ang?’

‘A inang lo alawm. In ina awm chunga nupui i neih a, chu ina i nupui i lak luh chuan innghirnghona a thleng duh bik a. Mahse i in dan hmasak zet chuan i chhuak tawh a ni a. Chu inah chuan i nu chu i enkawl a nih pawhin harsatna thleng thei kha a tlem zawk daih asin.’

Ka hotel kawtah chuan kan ding a.

chhunzawm tur