Zirtir Inpumpek (The Radical Disciple) – John Stott* – XVI

TLANGKAWMNA

Isua zui duhtute nunzia tur pariat kan han thlir ta a, he’ngte infinkhawm hian zirtir inpumpek ka mitthla dan an din chhuak a ni.

            Kan hriat ve hrim hrimah, duh ka thlang ve deuh bawk a, ka thlan dan pawh awmze nei a ni hran chuang lo. Chutih rualin he’ngte hi zirtir nihphung, Isua zirtir tawh phawtah chuan hmuh ka duhte an ni a, a bik takin keimahah pawh hmuh ka duh a ni.

            Nang pawhin thlan chhuah tura duh i nei ve ngeiin ka ring. Bible behchhan a nih erawh ka beisei a, chutih rualin i hnam ziarang leh i tawnhriat pho lang bawk se; tin, duhsakna ka hlan nghal che a ni.

            Pindan chungnunga Isua thusawi aia ṭha hian thu tlang kan kawm thei chuang awm lo ve:

Nangnin Zirtirtu leh Lalpa min ti ṭhin; in tidik e, ka ni ngei reng a. (Johana 13:13)

Zirtir nihna bulṭhut chu zah taka Isua koh hi ni ngawt lo vin, a zirtirna thute pawm a, a thupekte zawm hi a ni.

THUBELH: DAM TAKIN!

Kum sawmriat leh pariat ka nih hnuah a tawpna atana ka pen ka han dah dawn takah chuan (computer ka thiam lo va, pen ka hmang reng a), ka thuziak chhiartute hnenah heti hian inthlahna thu ka han thawn a ni. Min tihphurna thute avang khan ka lawm e, in zinga mi tam takin heti ang thu hi min thawn si a.

            Hma lam thlirin, lehkhabu chhut leh tihchhuah zel dan tur hi chiang taka hria tumah kan awm awm lo ve. Chutih rualin kei chuan lehkhabu hmalam hun hi a chiang rengin ka hria a, eng eng emaw chuan belhchhah ve bawk mah se eng mahin a thlak tak tak ka ring lo. A chhan chu lehkhabu hian danglamna tak an nei tlat a ni. Kan lehkhabu ngainat berte hi kan tan an hlu em em a, chu’ngte nen chuan inlaichinna nung leh ngainatawm tak kan nei thei hial ṭhin. Kan han lek kang a, kan han chul a, kan han hnim vel te hi kan ngainatzia kan tihlanna a ni ti ila a awm lo viau em? A ziaktuin a thuziak chungchanga a ngaihdan ngawt sawi ka ni lo va, chhiartute leh an lehkhabu dahkhawmte chungchang pawh sawi ka ni. Ka kawl ve zet loh chuan eng lehkhabu thute mah hi sawi chhawng lo turin dan ka insiam ve a. Chu vangin lehkhabu chhiar zel turin ka han fuih ve leh teh ang che u, nangnin in chhungte leh ṭhiante in fuih chhawng ve leh ang a. Hei hi khawngaihna puan darhna kawng, ngaihthah tawh tak si a ni.

            Khawvel hmun hrang hranga Kristaa kan unaute maktaduai tam tak chuan zirtir nihna kawnga an ṭhan len theihna tur lehkhabu chhiar tur an duh ngawih ngawih a. Mahse chhiar tur an nei lo tih theih a ni, keini Khawthlang lam mite lah chuan chhiar sen loh kan nei si. Chu vang chuan ka lehkhabu hralhna aṭanga hlawknate hi Langham Literature kutah ka hlan vek a, anni hian khawvela ram rethei zawka ringtute leh an pastorten Kristian lehkhabu ṭha zawk Sapṭawng leh anmahni ṭawng pawha an chhiar theihna tur te, an rinnaa tihngheha a awmna tur leh thusawi kawnga hma an sawn theihna tur tein. Hetia ka tih hian ka thinlunga ka ngainat em em he thil leh Langham Partnership rawngbawlna dangte hriatpuia ṭanpui duhna in lo nei ve ang em tih ka ngaihtuah neuh neuh a.

            Chhiartuten in lo hriat duh takin ka thurochhiahah hian Frank Entwistle-a kaihhruaiin literary executor (ziaktu boral tawhte kuthnu enkawltu) te ka ruat a, anni hian ka lehkhabu chungchanga zawhna awm theite chhan an inpeih reng a ni. Ka lehkhabu zawng zawng sample bakah lehkhabu danga ka tha thawhnate sample leh ka paper zawng zawngte chu Lambeth Palace Library-ah him taka dah an nih theih nan librarian leh archivist ni bawk Dr. Richard Palmer-an inhawng takin phalna min pe a, he’ngte hi research beituten an duh duhin an hman phal a ni. Ka office address chu 12 Weymouth Street, London W1W 5BY a ni zel ang a, tluk rual loh leh chau ve ngai lo Frances Whitehead-an a enkawl dawn a ni.

A tawp nan, dam takin le!