ZIRTIRAHTE SIAM ULA ~ Lalchuangliana

Lal Isua hian Chanchin Ṭha hi hril turin min ti a, piantharna leh chhandamna chu ama kuta mi a ni a, khawngaih vanga thilthlawnpek rinnaa kan lo dawn a ni. Chu chu a bul em em a, hemi chhandamna, piantharna kal tlang lo hian Lal Isua kan an theih nan, rinna kalkawng, puitlinna lamlian hi kan zawh thei lo. Chumi kan zawh chhoh zelna chu ‘zirtira siam’ tih tak mai, ‘discipleship’ tia kan sawi thin hi a ni. Zirtira siam chu keimahni lam tih tur a ni ta tlat mai – Lal Isua kan thawhpuina tur a ni. India ramah chuan ‘chela’ tiin kan hria a, zirtirtu (Guru) reng reng hian anmahni zuia ṭan tlattu ‘Chela’ an nei ngei ngei ṭhin. Lal Isuan a zirtirte a koh khan an hnathawhna - an chhungte, an nihna zawng zawng thlah vek a, amah zui mai turin a duh a ni. Chhungte ṭawngṭhaa va thlah pawh ṭul a ti lo, mitthi vui hmasak pawh ṭul a ti lo. Zirtir chu thildang zawng zawng aia Lal Isua dah hmasa, a thupek zawm tlat tumtu, kan ngaihzawngte kan bula an awm loh pawha kan ngai veng veng anga Lal Isua ngaizawng veng vengtute hi an ni.

Zirtira siam hi Lal Isua min sawmna a ni loa thupek a ni zawk. Chhandam ni tur chuan, ‘Softly and tenderly Jesus is calling’ tih hi a dik reng mai. Zirtira siam tur chuan mahni inphata kraws pua Lal Isua zui a ngai, kan rah mai ni lova kan rah a awm reng a ngai, amahin min hmangaih anga midangte kan hmangaih a ngai, hnung lam hawi a thiang tawh lo, tihduhdahna, tawrhna leh thihna hial a hnai reng. Kohhrante hian chungtianga mi kan ‘tihṭhaih’ (ti mai ang) chuan kan mite kan tiṭiau zo ang a, member kan inhmu zo lovang tih kan hlau ṭhinin a lang. Lal Isuan, ‘Nangni pawh kal bo ve in duh elo?’ tiin min zawt mai ang e ! Chutianga kan zirtir lo a nih chuan “Isu ka hmangaih che ka ta i ni e,’ titu nazawng hi ‘zirtir’ (disciple) kan ni ngai lo vang.

Zirtirah kan insiam loh avangin Kohhran lian leh ropui tak tak nia lang pawh an ral leh mai ṭhin. Saprama zu kalten Biak in lian pui pui ruak hel hul a tamzia leh ṭhalaiten Biak in an ngainat lohzia an sawi ṭhin. Heng Biak inte hi engatinge a ruah tak ? Kohhran pawl hrang hrang hian Lal Isua zirtira siam aiin sipai anga inenkawl an duh ṭhin a, thawmhnaw hak tur, ei leh in tur, tihtur insem fel thlap, hmangaihna leh induhsakna aia ‘dan’ lal zawk, biak in lian leh ropui zawk duh vanga pawisa mamawh tam, pawisa hmuhna tur chuan ‘indulgence’ pawh zuar mai, biak in a mawi leh a ropui avanga rethei zawkte tel ve ngam lohna, mi liante in ‘show-off’ na ni deuh ta mai an nih hlawm vangin ṭhangtharte tan ‘challenge’ a awm lo va, tuinemaw dan a siam zawm vanga mi fel nihna mai nia an hriat chu ṭhangtharte hian an duh ta lo a ni fo. Sum leh hamṭhatna a lal a, Pathian hminga thawk inti chungin sum hmuhna tur a nih chuan kan vawkte dam lo leh theihai rah thei lote pawh Bible Society-ah kan ‘life’ vel a. Kan sum a pung a, kan thlarau a ro thung a, chu-vangin ṭhangtharte tan kan Biak in leh Kohhran hi tuipui a har ṭhin. Chutih lai chuan Lal Isua ringtute zirtirah an siam ṭhin avangin Sapram leh America, Russia ram, South America, China leh khawvel dangah Lalpa kohhrante an pung nasa a, ṭhalai tam takin an bawr huai huai a ni.

India rama biak in lian bera sawi chu Calvary Temple, Hyderabad-a mi a ni a, mi 15,000 leng biak in hi ni 52 chhungin an sa zo va, an Pastor Satish Kumar hi kum 45 mi chauh a ni. An inkhawm thlir ila (Youtube-ah lo en ula) thalai lam deuh hlir an ni. Engatinge ṭhalai an hip nasat chhut ila, zirtira siam (discipleship) hi an thupui a ni a, an kohhran member hi an inhrechhuak vek a, Birthday Card leh cake ringawt pawh hi nitin 4000 chuang an thawn chhuak ṭhin an ti. Brooklyn Tabernacle, Saddleback Church – chutiang bawk chu an ni. KTP Khawmpui hmangtu ṭhalai sing hnih chuangte kha zirtira siam ni ta vek sela, kan kohhran hi a va thangduang dawn em! ‘Kum pu-an’ tih hranpa a ngai tawh lovang. Kan sum, kan tha, kan hun kan sen mai piah lamah hian ‘discipleship’ hi a awm a ni.

Keini pawh zirtira insiam lova, vanram kai tura ‘pianthar’ ringawt hi tawkah kan ngai a nih chuan kan kohhran hi - Baptist kan inti emaw, Presbyterian kan inti emaw, Methodist kan inti emaw, CNI kan inti emaw, Pentecostal kan in ti emaw, DMI kan inti emaw - kan ral mai ang. Kan aiah Lalpan midang a din mai dawn a ni. Mizorama tuna ‘Zoram Thar’ lo dingte pawh hi keimahni inenna'n a va tha awm em!