Thil Siam Thiamna Hmanga Pathian An – Robert L Chongthu IAS

“Tichuan, Pathianin ama anpuiin mihring a siam a, Pathian anpui ngeiin a ni a siam ni; mipaah leh hmeichhiaah a siam a ni.” – Genesis 1:27

Mihringte hi Pathian anpuia siam kan ni tih thu Kristianten kan chhiar hian anpui (image) hi noun (thil hming sawina) angah kan ngai tlangpui a. Pathian anpui nihna kengtu kan ni. Zahawmna, mawina leh hlutna kan neih chhan chu Siamtu nihna keimahniah chhunleta a awm vang a ni.

He Bible thudik hi hriat thiam dan kawng dang pawh a awm thei tlat. Anpui (image) tih thumal hi verb (thiltih sawina) angin a ngaih theih ve tho mai. Pathian anpuia siam kan ni ringawt lova, kan nun danah Pathian anpui/ang tura koh kan ni. Khawvel hmaah A aiawha ding a, A nihna chhunlet a, A zia pho lang tur kan ni.

Bible in Pathian chungchanga a sawi hmasak ber chu Siamtu a nihna hi a ni.

“A tirin Pathianin lei leh van a siam a” (Genesis 1:1)

Pathian hi Roreltu emaw, Lal emaw Berampu emaw anga sawi a nih hmain Siamtu a nihzia tarlan hmasak a ni. Thu a sawi a, khawvel hi awm lo ata a rawn awm mai a. Buaina atangin thil felfai, ruak mai atangin thil mawi, thim atangin nunna a siam chhuak a ni.

Tichuan, khawvel a siam zawh tawh hnuin Pathian chuan mihringte hi a anpuiin a siam ta a.

A indawt dan hi a pawimawh a nia. Pathian chuan a siam a, tichuan siamtu dang a siam leh a.

Pathianin a siam dan ang ngo ngo chuan mihringte chuan kan siam ve thiam/thei lova. Pathian chauhvin awm lo ata awmah a siam thei a ni. Chutih rualin Pathian zia kan ṭawm zingah chuan siam thiamna (creativity) hi a pawimawh ber a. Thu kan ziak emaw, in kan sa emaw, ruahmanna kan siam emaw, kan zirtir emaw, thu leh hla kan phuah emaw, thil kan siam chhuak emaw, thil kan huaihawt emaw, thlai kan ching emaw, a enga pawh lo ti ila, Pathianin thil siam thiamna min pek chu kan hmang ṭangkai a ni.

Thil siam thiamna hi artist te, musician te leh ziakmite chauhvin an neih a ni lo. Zirtirtu chuan hriat thiamna a siam a. Lo neitu chuan lei aṭangin hnianghnarna a siam a. Nu leh paten fate ṭhan chhohna tur boruak ṭha a siam a. Entrepreneur chuan remchang a siam a. Public servant sawrkar hnathawk chuan khawtlang hmasawnna tur kalphung a siam a. Eng hna pawh hian Pathian thil siam thiamna kan chhunlet theihna tur remchang min pe a ni.

Hei hi Pathian kan an theih dan kawng khat chu a ni.

Tirhkoh Paula chuan Kristianten he kohna hi kan hman ṭangkai theihna tur kawng thui zawk min kawhhmuh a. Philippi 4:8 ah chuan heti hian a ziak a:

“A dik apiang te, a zahawm apiang te, a fel apiang te, a thianghlim apiang te, a duhawm apiang te, a thang mawi apiang te – ṭhatna reng a awma, fakna reng a awm phawt chuan – chung chu ngaihtuah rawh u.”

Kan rilruin a ngaihtuah zawng chuan kan nuna lo lang chhuakah nghawng a nei nge nge ṭhin. Dikna, mawina, ṭhatna leh ṭhat famkimna hlir kan ngaihtuah a nih phawt chuan chutiang thilte awmna kan la siam/pe chhuak nge nge ang.

Chu vangin Kristian thil siam thiamna chu mahni rilru phawrhna satliah lakah chuan a danglam viau tur a ni a. Pathian mizia lam a kawk tur a ni. Kan hna chuan dawt aiah thudik, mawi lo aiah mawi, beidawnna aiah beiseina, chhiatna aiah ṭhatna a tilang tur a ni.

Khawvel hian content tam zawk a mamawh belh ringawt lo. Thudik tam zawk a mamawh a ni. Thawm bengchheng satliah a mamawh belh lo. Finna tam zawk a mamawh a ni. Thim a mamawh belh lo. Eng a mamawh belh zawk.

Tichuan Isuan amah zuitute chu lei chi leh khawvel eng anga a sawina (Matthaia 5:13-16) kan lo thleng ta a.

Chi chuan thil a vawng ṭha reng ṭhin.Êng pawhin thudik a hai lang ṭhin. An pahnih hian an chhehvelah nghawng an nei.

Isuan Kristiante hi khawvel aṭanga inhnukdawk mai turin a ti lo. Inhnamhnawiha tidanglam turin min ko a ni zawk. Kristiante chu khawiah pawh chengin hna thawk se, Pathian ṭhatna ṭhenkhat hi chu hmunah chuan an keng lut zel tur a ni. Kan ṭawngkam, kan chetzia, kan inlaichinna leh thil siam chhuah thiamna hmangin Pathian mizia hi kan tilang tur a ni.

Ringtuten thil mawi an siam a, thawnthu awmze nei tak an phuah a, sumdawnna rintlak tak an din a, khawtlang rawng an bawl a, chhungkaw chhenfakawm tak an din a, rinawm leh ṭha taka an hna an thawh chuan chi leh eng angin an awm tihna a ni. Pathian an ang a nih chu.

Sual pumpelh ngawt hi Kristiante rilruah a lian duh khawp a. Thianghlimna chu a pawimawh teh meuh mai, chutih rualin Bible-in a tum chu a la zau zawk. Pathian hian sual kalsan ringawt turin min ko lo; ṭhatna, mawina, dikna leh rawngbawlna rah chhuah nei lamah min ko a ni.

Siamtu hian khawvelah hna a la thawk reng, chu a hna chu a mite kal tlanga thawh a thlang bawk.

Rinna lama thil siam thiamna kan hman eng pawh hi – a lian emaw a te emaw – Siamtu kan chhunletna a ni. Eng hna pawhin thudik, mawina, dikna, khawngaihna leh mihringte ṭhatna tur lam a hawi phawt chuan a anpui nihna kan ken Pathian lam min kawhhmuh a ni.

Pathian anpuia siam tih hi kan nihna sawina ṭawngkam satliah a ni lo. Kan nun dan tidanglam thei kohna a ni. Ni tinin Pathian hi ang tur kan ni a, chumi kan tih theih dan kawng chiang tak pakhat chu keimahnia thil siam thiamna hmang hian a ni.

Siamtu anpui nihna kengtu kan nih angin, khawvelah A ṭhatna tilang thei thil siam tura koh kan ni