Zawhna Pahnih

Bible-ah hian Tirkohte Thiltih bu hi lekhabu ngaihnawm ber pâwl niin ka hria a. Kristian hmasa ten an rinna an tih lan dân Luka hian a rawn ziak chhuak a, an rinna kawnga an huaisenzia a ngial a ngana a rawn târ lan rualin harsatna an tawh zawng zawng, mualpho thlâk tak tak te pawh a rawn pho chhuak a ni. An chanchin hian mi a ti phûr lo thei loin ka hria a ni.

Kan hriat vek angin Tirhkohte Thiltih buah hian Isua zuitu hmasa ten Thlarau Thianghlim an chan thu aṭangin bul a ṭan a. Heta ṭang ngawt pawh hian zir tûr tam tak kan nei a ni. Vawikhat chu Korean pastor pakhat hi America ramah a zuk zin a, America a Kristian te a hmuh dân sawi tûrin an ti a, a sawi chu hei hi a ni: ‘Thlarau Thianghlim tel lo hian thil hi an va ti hnem êm!’ Keini pawh hi Thlarau Thianghlim tel lo hian Pathian ram zauh tum hian kan lo pên chhuak vak vak ang tih a hlauhawm khawp mai. 

Thlarau Thianghlima khah chungchang hi sawi tûr tam tak a awm a. Tûn ṭumah hi chuan thil pahnih chauh sawi kan tum dâwn a ni. Zirtir ten Thlarau Thianghlim an chan hnua Jerusalem a mi ṭhenkhatin an rui emaw an tih khân Petera khân Kristian sermon hmasa ber kan tih tâk khân a chhang a nih kha. A sawi ber chu Isua chu Messia an nghahhlel êm êm a nih thu leh Isua an khen beh thu a nih kha. Chu a thusawi chuan mipui rilru a khawih êm êm tih thu Luka hian a sawi a; a ni khawp mai, Thlarau Thianghlimin min khawih hi chuan a chângin kan ṭap zawih zawih a, kan sual ziate kan hre chhuak a, a châng leh hlimin kan lâm bawk ṭhin. Mahse, thil pakhat kan theihngilh fo ṭhin. Thlarau Thianghlimin Jerusalem mipui a convict/hneh khân zawhnain an chhunzawm a, chu chu hei hi a ni: “Enge kan tih tak ang le?” Thlarauin min khawih emaw kan tih a, thuawihna nun a min hruai luh si loh chuan, kan thlarau chan kha a dik lo a ni mai thei. ‘Enge kan tih tak ang?’, han tih hian, Pathian thu awih duhna, awih ngaihpawimawhna, Ama tân thil tih a ngai tih a rawn nemnghet a ni. Lungrun takin Pathian thuin min khawih a ni mai thei, ‘Lalpa a ṭha a ni’ tiin kan au vak vak te pawh a ni mai thei: mahse chumi piahah chuan kan tih tûr kan hriat theih loh emaw kan hriat duh loh emaw chuan, Pathian khawihna tak tak kan la chang lo a ni zawk maithei. Thlarau Thianghlimin a khawih chuan mawhphurhna a keng tel ṭhin a ni.

An zawhna kha Petera’n engtinnge a chhân? ‘Sim rawh u’ tiin a chhang a nih kha. Sim rawh u tih hi Kristian nunah hian ngaiah kan neih a, sawi âwm reng emaw kan ti ṭhin. Mahse, ngaihtuah chian chuan, ‘Isua hi chibai bûk rawh u, in tâna tuar a ni si a’, tih pawh a âwm viau âwm e. Mahse, ‘sim rawh u’ a ti tlat si hian, Isua zui chuan Amah biak piah a, chawimawina hlate sak piah lamah, Amah an a kawk a ni. Biak ringawt hi a tawk lo. Pathian hma a rilru tih zangkhai, saptawng a emotional emaw spiritual high neih, kan buaina zawng zawng ama kut a hlan hi chu a nuam khawp mai, mahse ‘sim rawh u’ a tih hian keini pawh hian tih tûr kan ba a ni tih a kawk tel tlat a ni. Sim rawh u tih hian, thil hrang hrang- zu, drugs, dawt sawi etc hi kan kawh tir fo ṭhin awm e. Bible scholar te sawi dân chuan, sim rawh u tih hian a Greek ṭawngah chuan ‘I rilru ngaihdan kha lo thlak rawh’ tih a kawk zawk a ni an ti. Rilru sûkthlêk, kan ngaihdan te hi thlak a pawimawh a, a har a, mahse kan sawi tâwk lo fo ṭhin. Pathian, khawvel leh kan khawtlang, mahni leh mahni laka kan ngaihdan zawng zawngte hi Pathian thu mila thlak hi a lo pawimawh a ni tih a sawina a ni. Ngaihdan thlak aṭang hian kan thil tihah a lang chhuak ṭhin. Thiltihah chauh kan ‘concentrate’ chuan, a daih rei lo. Mi ṭhenkhat hmuh laiah chauh te hian a zuzi ral ṭhin. Hna thawk mang lo a, sofa a mut pahah nupui emaw fate tirh kual kan sim a ni mai thei, mahse Pathian thu chuan ‘hmangaihnain rawng inbâwlsak tawn ṭheuh zâwk rawh u’/’serve one another in love’ emaw ‘Tu pawhin hmasa ber nih a duh chuan, mi zawng zawng aia hnuhnûng berah a awm tûr a ni a, mi zawng zawng rawngbâwltuah a awm bawk tûr a ni,’ a tih hian mi a khawih dân a ril daih mai a, nupui fanau lakah te pawh kan ngaihdan kan thlak a ṭulzia a ti lang a ni. A thar apiang neih kan tum ṭhin te pawh a ni mai thei, a leina te pawh kan nei a ni mai thei, mahse Pathian thu chuan ‘khawvel leh a thil te kan lo hmangaih lutuk’ emaw ‘ṭhenawmte kan awh vang’ te hi a lo ni fo ṭhin tih a sawi a.  Pathian thu chuan chhungril aṭangin min lo thlak thei a, sim tûra min sâwmna chhan pawh a ni. 

Kan Kristian nunah hian ‘enge ka tih tak ang le?’ tih leh tun ka nunah hian ‘enge sim tûr min sâwmna chu?’ tih zawhna pahnih te hi Pathian leh Thlarau Thianghlim kaihruainain mahni leh mahni kan in zawh fo a ṭul reng a ni.

Joy LK Pachuau