Pathian Tempul: Johana 14 leh Pathian Awmna Chungchang Thilmak Hriat Fiahna – Robert L Chongthu IAS

“Miin mi hmangaih chuan ka thu a zawm ang a; ka Pain ani chu a hmangaih ang a, a hnenah kan lo kal ang a, a hnenah kan awm reng ang.” – Johana 14:23
 
Bible-a thupui langsar tak, ril ber pawl chu Pathianin a mite zinga awm a duhna hi a ni. Eden huan aṭanga a biak buk thlengin, Solomona Tempul aṭanga Isua Krista thlengin, hmangaihna nena inpawl hona nei turin Pathian hian mihringte hi a rawn pan zel ṭhin tih Bible chuan a tar lang a. Chanchin Ṭha Johana ziakah he thupui hian ropui takin a vawrtawp a thleng a, chu chu Zanriah Hnuhnung an kil laia Isua thusawi Johana 14 ah hian a ni.
 
Isua thusawi, “Ka Pa inah awmna tam tak a awm a” (Johana 14:2) tihah hian Kristian tam tak rilruah chuan vanrama in, ringtute tana thih hnua awmna tur a lo lang nghal ṭhin. He ngaihdan hian Kristian chhuan tam tak a lo thlanmuan tawh ṭhin a, mahse a thu han bih chian deuh a, Grik ṭawng kalphung leh Bible-a he thu lanna hmun zau zawka han chhiar chuan awmze ril leh thuk zawk a neiin a lang tlat.
 
Synoptic Gospel (Chanchin Ṭha ziaka thu inhmu deuh bik ho sawina) – Matthaia, Marka leh Luka te lakah chuan Chanchin Ṭha Johana ziak hi a danglam bik riau. Johana hi chuan Isua hi Pathian a nihna aṭanga thlirna fir tak hmangin a pho chhuak a, Pathian a nihna leh chumi avanga a hnathawh chu a sawi uar bik hle. Bung 13 aṭanga 17 ah hian khenbeh a nih hmaa Isua zirtirnate ziak an ni a, hetah hian Pathian, Krista leh ringtute inlaichinna chungchang thlirna ril ber berte an awm a ni.
 
Isuan a Pa inah “awmna tam tak” a awm tih a zirtirte hnena a sawi khan “awmna” emaw “in” tia an lehlin tak Grik ṭawng thumal chu “mone” a ni a, chu chu awmna hmun emaw chenna in emaw tihna a ni. Vanrama awmna hmun nghet sawina ai mah chuan he thumal hian rei lo te atana lo awm lawkna hmun a kawk deuh mah a. He ṭawng nihphung hian heta Isua thusawi tum tak hre turin chhiartuten kan ngaihtuah nawn leh a tiṭul riau.
 
He thu hriat thiam theihna tura pawimawh lai chu “Ka Pa inah” tih hi a ni. Chanchin Ṭha Johana ziak tir lamah hian Isuan he thu tho hi Jerusalem Tempul a then fai lai khan a lo hmang tawh a. Chumi ṭum chuan, “Ka Pa in sumdawnna inah siam suh u” (Johana 2:16) a lo ti a. Hetah hi chuan “Ka Pa in”a tih hian Tempul a kawk tih chiang takin a lang a ni.
 
Amaherawhchu Johana hian he thu sawi fiahna hi a rawn dah chhunzawm nghal zat a. Isuan Tempul tihchhiat a, ni thuma a tundin leh tur thu a sawi khan Isuan a taksa in chungchang a sawi a ni tih Johana hian a sawi fiah nghal a (Johana 2:21). He sawi fiahna hi a hnu lam thute hriat fiahna tur atana thlirna tarmit pawimawh tak a lo ni ta a ni.
 
“Ka Pa in” tih hian Tempul a kawk hmasa zet a, Tempul chuan Isua a kawk ve leh a nih chuan Johana 14 a Isua thusawi hian awmze dang daih a nei thei tlat. Nakinah vanrama la awmna tur in chungchang sawina ni ringawt lovin Tempul thar, amah Isuan a taka a lantira tel ve chungchang a sawina a ni thei tlat.
 
Hetianga sawi fiahna hi a hnu lamah Johana 14 ah tihnghehin a rawn awm ve leh a. Isuan a zirtirte hnenah, “Miin mi hmangaih chuan ka thu a zawm ang a; ka Pain ani chu a hmangaih ang a, a hnenah kan lo kal ang a, a hnenah kan awm reng ang.” (Johana 14:23). Hetah hian a hma lama “awmna”tih sawina thumal ngai bawk kha Pathianin ringtute a chenchilhna sawinan a rawn lang nawn leh a ni.
 
Chutiang a nih chuan Pathian hnena cheng tawh tura ringtute an han kalna lam ni lovin Pathianin a mite a rawn chenchilhna lam a hawi tawh tlat. Hei hi Johana Chanchin Ṭha ziaka thupui lian berte zing ami a ni: inchenchilh tawnna hi. Fapaah Pa a awm a, Paah Fapa a awm a, Kristaah ringtute an awm a, Thlarau Thianghlim kal tlangin ringtuteah Krista a awm bawk a.
 
He thupui hian Johana 17 a Isua ṭawngṭainaah khan par a chhuang ta a. Trinity-ah inpumkhatna a awm angin zirtirte chu amah leh Pa nen pumkhata an awm ve theihna turin he ṭawngṭainaah hian Isuan a dil a ni. A tum chu vanrama insawn ringawt ni lovin Pathian nunna taka va tel vena a ni.
 
He thilmak hi Tempul thupui hmang khan a hrilh fiah theih a. Thuthlung Hlui tluanin Tempul hi lei leh van inkalthelhna hmun sawina a ni a, chu hmunah chuan Pathian hi a thuthlung mite zingah a cheng a ni. Chutih rualin Israel ringtute chuan hmuh theih Tempul hi chu chhinchhiahna emaw entirna emaw chauh a ni tih an hre thiam vek. Tempul an hlannaah khan Solomona pawhin “van leh vante vanah pawh (Pathian chu a)leng lo a ni” (1 Lalte 8:27) tih a lo pawm thlap bawk.
 
Thil ropui zawk, lo la thleng si lo lam kha Tempul hian a kawk a ni.
 
Thuthlung Tharah chuan chu thil ropui zawk chu Isua Kristaah a lo thleng ta a. Chanchin Ṭha Johana ziak pawh Thu chu tisaah lo changin mihringte zingah a “awm” ta tih hmangin bul ṭan a ni. A ṭawng awmzia takah phei chuan an zingah Pathian kha a rawn “biak buk” a ni. Isua hi Tempul dik tak, Pathian leh mihringte intawhna hmunpui ber, a rawn ni ta a ni.
 
He thlir dan hian awmze thui zawk a la nei. Krista thihna, thawhlehna leh Thlarau Thianghlim min pekna zarah ringtute chu Pathian chenna hmun kan lo ni ve a. Tirhkoh Paula khan he thudik hi a sawi nawn fo mai. 1 Korinth 3:16 ah khan “Pathian in in nih leh Pathian Thlarau nangmahniah a awm reng tih in hre lo vem ni?” tiin zawhna a siam a. Chutiang zelin 2 Korinth 6:16 ah, “Keini zawng Pathian nung biak in kan ni si” (2 Korinth 6:16) tiin a puang bawk.
 
Tirhkoh Petera khan hetiang deuha sawina hi a hmang ve leh a, ringtute chu lung nung, thlarau lam in sakna atana hmanrua angin. Chutianga a huhova awm kohhran chu leia Pathian chhenna a lo ni ta a ni.
 
Hetianga Tempul hrilh fiahna hian Bible-a thil dang pawh a tifiah zel a. Isuan Mihring Fapa chunga vantirhkoh chhuk leh chho a sawi kha Bethela Jakoba inlarna hmuh sawhkhawk a nia, chutah chuan lei leh van te an intawk a, leilawnin a pahnihin a zawm a ni. Chanchin Ṭha Johana ziakah hian Isua chuan Bethel dik tak – Pathian leh mihringte intawhna hmun –angin a insawi a ni.
 
Hman lai Tempul, Jakoba leilawn, Pathian biak buk, Eden huan leh lei leh van intawhna tlang te chu Kristaah an infawkkhawm a. Ani chu Bible-a lo lang, Pathian chenchilhna entirtu chhinchhiahna zawng zawngte tihfamkimna a lo ni.
 
Chutih rualin a thu hi Isuaah a tawp mai lo a. Krista nena inpumkhatna kal tlangin ringtute chu he pumkhatna thianghlimah hian an tel ve a. Thlarau Thianghlim Tempul leh Krista taksa peng an lo ni bawk a. Hmun thianghlim chu Jerusalema insak pakhat chauh a ni tawh lo. Pathian Thlarauvin a mite a chenchilhna hmun apiangah a lo awm tawh zawk a ni.
 
He thudik hian ṭha leh ṭha lo tehna ril tak a keng tel bawk a. Ringtu apiang chu Pathian chenna hmun an lo nih chuan ringtu dangte chu zahawmna nei an nih angin zah taka en tur an ni ang. Hman lai Israelten Tempul an ti bawrhbang mai mai duh lo ang bawkin Kristiante chu Pathian chenna hmun thianghlim an nih vek anga inzahtawn tura koh an ni.
 
A tawpah chuan Johana 14 hi vanrama awmna tur in angah miin a ngai emaw, Pathianin mihring a chenchilhna angah a ngai emaw, a thu ken laimu chu a ngai reng: Pathianin a mite zingah awm a duh tih chu. Tempul chu lung rem khawm insak aṭangin mi nungah a insawn tawh a. Isua Krista kal tlangin lei leh van pawh a inkalthelh leh ta a ni.
 
Kristian rinnaa beiseina ropui tak awm chu engtik emawah ringtute chu Pathian inah an la kal ang tih hi a ni ringawt lo. Tun apangin Pathianin a awmna in chu a miteah a siam mek tawh tih hi a ni zawk. Engkim siam thar a nih huna Pathianin mihringteah a chenna a siam puitlin ni thlengin he Pathian leh mihring inpawl hona hi a awm reng ang a, chumi hunah chuan Tempul luah khat vektu khan engkim a la luah khat vek dawn a ni tih hi Bible thutiam a ni.