Tirhkohte Thiltih Zirlai 57-na. Tirhkohte 11:4-18

TIRHKOHTE 11:4-18 MIZOVBSI. (Tin, Judai rama tirhkoh leh unau awmte chuan, Jentail-te pawhin Pathian thu an zâwm tih an hre ta a. [2] Tichuan, Petera chu Jerusalem khua a thlen chhoh veleh serhtanhoten a hnênah, [3] “Serhtanlote inah i lût a, an hnênah i ei vei a,” an ti a, an kalh a.) [4] Nimahsela, Petera chuan a bul aṭangin indawt zêlin an hnênah a hrilhfiah a: [5] “Joppa khuaah ṭawngṭaiin ka awm a; tin, englovin mi zêl a, mumang angin englo bâwm, puan lian tak ang, a kil lia hlina vân ata uai thla ka hmu a; ka kiangah ngei mi rawn hnaih a; [6] tin, chu chu ka en reng a, ka ngaihtuah a, leia mi fuliafate, ramsate, rannungte leh chunglêng savate ka hmu a. [7] Tin, awin, ‘Peter, tho rawh; talh la, ei rawh,’ mi tiin ka hre bawk a. [8] Nimahsela, keiin, ‘Lalpa, ni lo ve; thiang lo leh bawlhhlawh eng mah rêng ka kaah a lût ngai lo,’ ka ti a. [9] Nimahsela, vân ata aw chuan a vawi hnihnaah, ‘Pathianin a tihthianghlim tawh chu nangin thiang lo ti suh,’ tiin mi chhâng a. [10] Chutiang hlîr chuan vawi thum a lo awm a; tin, engkim chu vânah khai chhohvin a awm leh ta a. [11] Tin, ngai teh u, mi pathum Kaisari khua ata ka hnênah an rawn tîr a, kan awmna kawtah chuan an lo ding reng tawh a. [12] “Tin, Thlarauvin tu mah thlei bîk lova anmahni zui tûrin mi tîr a. Hêng unau paruk pawh hian mi zui ve a, mi inah chuan kan lût a; [13] tin, ani chuan kan hnênah, a ina vântirhkoh ding a hmuh thu leh, vântirhkoh chuan a hnênah, ‘Joppa khuaah mi tîr la, Simona, Petera an tiha chu han hruaitîr rawh; [14] ani chuan thu a hrilh ang chia, chumi thu chuan nang leh i chhûngte chu chhandamin in awm ang,’ a tihzia pawh min hrilh a. [15] Tin, thu ka sawi tirhin, Thlarau Thianghlim kan chunga a lo thlen tirh lai ang bawk khân an chungah a lo thleng ta a. [16] Tin, Lalpa thu, ‘Johanan tuiin mi a baptis ṭhin kha; amaherawhchu, nangni zawng Thlarau Thianghlimin baptisma in la chang ang,’ a tihziate kha ka lo hre chhuak leh ta a. [17] Chutichuan, Lalpa Isua Krista an rin veleh, Pathianin thilthlâwnpêk min pêk ang kha an hnêna a pêk ve ahnuin, kei tehlul hi Pathian hnial rual em ka nih?” a ti a. [18] Chûng thu chu an hriatin an ngawi ta a, “Chuti a nih chuan Pathianin Jentail-te pawh nung atân sim a phal ta a nih tak chu,” tiin Pathian an fak ta a.

Sawi zauna.

1.* Gentile-ten Isua an rin ve tak thu, Petera leh Kornelia chungchang hi chipchiar takin vawi hnih, bung 10 leh 11-ah te tarlan a ni. Thil pawimawh tak, chhinchhiah tlat tul a ni ngei ang.

2.*  Peteran hriatpuitu unau, witness mi paruk a hruai ve hi a pawimawh khawp mai.

3.* ‘Chutichuan, Lalpa Isua Krista an rin veleh, Pathianin thilthlâwnpêk min pêk ang kha an hnêna a pêk ve ahnuin, kei tehlul hi Pathian hnial rual em ka nih?” a ti a.’ He thu hian ringtu unaute a hneh a ni. Lalpa Isua tiam, ringtute chhinchhiahna Thlarau Thianghlim an chunga leih a ni. Chu chu Pathianin a pawm tihna an hmuh theih a a lan chhuahna a ni. Chu chu a tawk em em a. Thil dang tul dang a ngai tawh lo.

Ngaihtuah zui atan: 57/1. Engvangin nge Jerusalema kohhrante hian Antiokei khuaa Gentile ringtute hnenah hian Barnaba kher an tirh ni ang le, Petera te, Johana te pawh an awm si a? Juda dana a kulmuk ve loh vang a ni thei em?  Enge Barnaba ti lawmtu hi, mi chungah hian enge thleng se i lawmna ni ve ang? Barnaba hian engtiangin nge mite a fuih, mi i fuihin enge ngai pawimawh tura i tih thin?

57/2.  Barnaba hian Antiokei khuaa a rawngbawlna pawimawh tak kalsanin Tarsa khuaah Saula a zawngin a kal a ni. Heta a tawngkam, to seek him out tih hi tihtak zeta dap, zawng ruai tihna a ni. Saula zia leh a chet dan, Isua chauh a ngaihpawimawh zia langin i hria em?  Saula kher, Jerusalemah Pathian mi mi lawk tak tak an awm lai a.  Barnaba Thlarau Thianghlim leh rinna khatin Saula a zawng a ni a. Saula potential tur han chhui zui teh le. (Heng thil thleng zawng zawng phenah hian Pathianin a mite thlarau nun chawm tura a luluk zia hmuh tum bawk la. Jerusalema ringtuten Mosia dante an rawn zirtir tel maiin a rinawm. Paula hi chuan Isua chauh a rawn ti dawn a ni.)