Pathian Khawvel Aṭanga Hremhmun Lak Chhuah – Robert L Chongthu IAS

“Buh seng thlengin ṭo za rawh se” – Matthaia 13:30
 
Mi tam tak chuan “hremhmun” tih thu an hriat hian an rilruin nakin hun lo la awm tur thil, ringlote an thih hnua hrem a nihna hmun turah an ngai ṭhin. Chhuan tam tak chu he ngaihdan hian Kristian suangtuahna tlanglawn a lo luah tawh a. Chutih laiin Bible thu zau zawk chhunga Isua zirtirnate uluk taka kan en chuan he ngaihdan aia thuk leh ril daih hi kan hmu thei a ni.
 
Matthaia 13 ah chuan Isuan buh lem leh a tak tehkhin thu a sawi a. Loneitu chuan a lovah buh chi ṭha hlir a theh a, mahse zanlaiah hmelmain a lovah chuan buh lem a lo theh ve leh si a. A bawihten chu thil chu an hriatin an pu hnenah chuan buh lemte chu lak khawm mai rem a tih leh tih loh an zawt a. Mak tak maiin loneitu chuan a phalsak hauh lo. Buh lem leh tak chu buh seng hun thlengin ṭo za turin a ti tlat!
 
Han en thuak chuan khawvel tawpa rorelna chungchang thu ni maiin a ngaih theih awm e. Mahse he changah hian khawvela Pathian mission chungchang ril zawkin Isua hian a tar lang tlat.
 
Bible hian vanram leh hremhmun ni lovin vanram leh leiin bul a ṭan a. Genesis-a Pathian rilru tum dan chuan amah leh a thilsiamte lungruala an len za theih kha a ni. Mihringte kha Pathian nihna pho chhuak a, ṭha ti taka a duan khawvel enkawl tura siam an ni a. Amaherawhchu, Pathian rin aia mahnia thutlukna lo siam ve mai an thlan takah chuan thilsiamah sual a lo lut ta a. Tharum thawhna, chapona, mahni hmasialna, tihduhdahna leh thihnain an rawn zui bawk a.
 
Hetah hian a nia hremhmun chungchanga Bible rilru chu mumala a lo lan ṭan.
 
Hremhmun hi nakin hun lo la awm tur thil a ni ngawt lo. Isua leh a zirtirte thu aṭanga en chuan Pathian siam khawvelah mihringten tlukna sual vanga an chhuah a ni. Khawiah pawh miin thuneihna a hman sual a, midangte a tihduhdah a, huatna an tuh a, dawt an thehdarh a, an ṭhenawmte mihring mihrinna an hnualsuat chuan, hremhmunin thil ṭha a tih chhiatna hnathawh ah hian an tel ve zel a ni.
 
Isua khan hei hi vawi tam tak a hmachhawn a ni. A hun laia sakhaw hruaitute kha an vervekna leh an chapona hmanga “Gehenna fa(te)” siamah a puh a (Matthaia 23:15). Chutiang zelin Jakoba pawhin mihring leiin thil a tihchhiat theihzia sawiin “amah chu hremhmun tihkan a ni” a ti hial (Jakoba 3:6). He’ng thute hi kan en chuan hremhmun hi nakin huna rorelna la hmachhawn tur thil ni lovin tun hunah, Pathian laka mihring a helna hmun apianga zung lo kaih ve nghal ṭhin a ni tih a hriat theih a ni.
 
Hemi hriat fiahna hian buh lem leh buh tak tehkhin thu kan hriat thiam dan pawh a tidanglam thei awm e.
 
Bawihte kha chuan rorelna kenkawh nghal mai an duh a. A lemte kha zawn chhuah a, phawi mai an duh a ni. Loneitu erawh chuan a phal tlat lo, a chhan chu buh lem leh buh tak kha an ṭhan chhoh lai phei chuan hriat hran hleih theih loh khawpin an inang tlat a. A hun hmaa a lem lo lak khawm ngawt khan a tak tam tak a tichhe tel thei tlat a ni.
 
Isua sawi tum chu a chiang: A zuitute khan mi dik leh mi sual thliar hrang turin theihna an nei lo. Mihringte hi chuan kan mihringpuite thinlung kan hre fiah tak tak thei lo. Mite sual la vawngin mahni sual chu kan sawi nep duh viau. Midangte buh lema puhin mahni chu buh taka inngaih pawh kan awlsam viau.
 
Hei vang hian a nia Isuan sakhaw thila chapona hi a do tlat ṭhin. A dera ṭhatna ngei pawh hi he buainaah hian a tel a ni. Kohhran hi khawvel chunga roreltu tura koh a ni lo. Kohhran hi buh chi ṭha tuh mai tura koh a ni.
 
Heti zawng hian sawi teh ang, Isua zuitute hi buh lem vai tura tirh an ni lo. Pathian Lalram Chanchin Ṭha thehdarh tura tirh an ni.
 
Chu Chanchin Ṭha chu Pathianin he khawvel keh chhe tawh hi a la kalsan lo tih hi a ni. Isua Kristaah vanram chuan khawvel a luhchilh a. Pathian rilrua mihringte nih tur ang tak tak mihring chu Isua kha a rawn ni a. Sual a hmachhawn a, mihringte sual man chu a phur a, kraws-ah khan mihringte helna vanga sual phurrit zawng zawng chu ama chungah a tlaktir a ni. A thawhlehna kal tlang hian Pathianin a thilsiamte hmanga a thiltum chu hneh rual a ni lo tih a rawn puang chhuak bawk.
 
Pathian Lalram hi Pathianin hremhmun a chhan letna a ni.
 
Hetih lai hian Isuan sual chungchang hi keini ai daihin a la thutak zawk a. Keini chuan sual langsar he’ng tharum thawhna te, tihduhdahna te leh rorelna dik lote hi chu khawvel aṭanga lak bo daih kan duh reng. Isua erawh chuan a zung aṭanga phawi a duh thung. He’ng sualte hringtu chapona, tisa chakna, huatna, duhamna leh mahni hmasialna te hi lak bo vek a duh a ni.
 
Hei vang hian a nia Isua zui hi a hrehawm theih chhan. Doctor-in a natna lai zai hawnga a paih ṭhin ang hian Isua pawhin kan chhungrilah hna thawkin min tichhetu chu a paih ṭhin a. Hetia hna a thawh lai hi a hrehawm duh viau a, mahse khawngaihna thiltih a ni si.
 
Chanchin Ṭha-a beiseina chu Isua hian eng nge kan nih tih ringawt a en lo hi a ni. A khawngaihnain eng ang mi nge kan nih theih tih min hmuhsak zawk a. Kan thinlung chhungrilah hremhmun chu hmuh tur la awm fo ṭhin mah se Krista chuan keimahnia a hnathawh zawh tawhna zawk a hmu daih a ni.
 
Chu vangin he tehkhin thu hian midangte va hmu tling lo turin min ti lova, Pathian hmaah inngaitlawm turin min ti a ni zawk. Kan chhungrilah hremhmun a la awm reng tih kan puang a. Krista kal tlanga khawngaihna min pek chu kan dawng a. Kan bul a mite tan kan ṭawngṭai a. Engtik emaw-ah chuan he khawvel zawng zawng chunga Roreltu chuan engkim hi a la siam ṭha vek ang tih kan ring a ni.
 
Chumi hun a thlen hma chuan hei te mai hi kan hna a ni: buh chi theh, Pathian Lalram chanchin puan darh, leh keimahni leh a khawvel aṭanga hremhmun la chhuak zel tura Isua rin mai.
..