Tirhkohte Thiltih Zirlai 55-na. Tirhkohte 10:44-48

TIRHKOHTE 10:44-48 MIZOVBSI. Tin, Peteran chûng thu a sawi lai tak chuan, thuhretu zawng zawng chungah chuan Thlarau Thianghlim a lo thleng ta a. [45] Tin, serhtanho zînga ringtute, Petera rawn zui apiang chuan, Thlarau Thianghlim pêk chu Jentail-te chungah pawh leih a nih avângin mak an ti hle a; [46] ṭawnghriatlohtea thu sawiin Pathian fakin an hre si a. Tin, Peteran a bia a, [47] “Hêng mite, keimahni anga Thlarau Thianghlim hmu ve hi, baptisma an chan loh nân miin tui hman an khap thei em ni?” a ti a. [48] Tichuan, Isua Krista hminga baptisma chan tûr thu a pe a. Chûng zawhah chuan ni eng emaw zât châmah an ngên a.

Sawi zauna. Isua chanchin, a thiltih leh a nihna Peteran a sawi laiin a hretute chungah Thlarau Thianghlim a lo thleng ta a ni. Pathianin duhsak bik a nei lo, amah duh a zawngtute hnenah a inpuang thin a ni. Kornelia ina thil thleng hi ‘Gentile Pentecost’ tiin an sawi thin. Petera zuitu Juda ringtuten mak an ti em em a. Pathianin Juda mi ni lo a pawm ve ta tih chiang taka a lan avangin. Anmahni chan ang tho changin, tawnghriatloh-te a thu sawiin Pathian an fak an hmu si a.

Ngaihtuah zui atan 55/1. Kornelia a tawngtai a, Pathianin tihtur a hrilh a. Petera a tawngtai a Pathianin a be bawk a. An tawngtaina rah Pathian hnathawh ropui tak a lo lang a, Kornelia leh a chhungte chhandamin an awm ta a ni. An beisei phak loh thil a thleng a ni. Tawngtai pawimawhzia a lo lang tite pawhin a sawi theih awm e. Tawngtai mi i ni em, Pathian chhanna eng tiangin nge i hmuh thin? A chhan dan tur Pathian tuk sak rilruin i tawngtai thin em?

Kornelia leh Petera-te hi tum nei ranin an tawngtaiin a lang lem lo. Pathian hnenah an tawngtaina a thleng tih erawh chu kan hria a ni. Tawngtaia kan thu chham, dil thiam, thu chhep dik a that rualin Pathian hnen a thlen a pawimawh zawk tih a lang reng mai. Awm khawmnaa tawngtai tumin tu hnenah nge, tu ngaihthlak turin nge i tawngtai thin? I bula mite ngaihthlak turin a ni thin em?

Tawnhriat. Vawikhat chu zoom hmanga Pathian Thu kan zirhonaah hian a kaihruaitu-ah ka tang a. Kan zir zo chu Pastor Michaela (Delhi Bible Fellowship pastor.) hi tawngtai turin ka sawm a. A tawngtai laklawh lai chuan ka internet a chiangkuang lo va, ka chhuak ta daih mai a. Kan luh, join leh chuan a lo tawngtai zo der tawh mai a. ‘I tawngtai lai khan kan wifi a chiangkuang lo a, ka chhuak daih a, i tawngtaina pawh ka hre mumal ta lo a, a pawi ka ti khawp mai,’ tiin thupha ka chawi a. Pastor Michaela chuan awlsamte hian, ‘Pawi ti suh, Pathian engkimtithei hnenah alawm ka tawngtai, i hnenah a ni hleinem. I pray to God Almighty, not to you,’ a ti a. A buai lo ve khawp mai. Michaela min chhan dan atang hian tawngtai chungchangah keimah leh keimah zawhna tam tak ka in zawh phah thin a ni.