Tirhkohte Thiltih Zirlai 54-na. Tirhkohte 10:33-43

TIRHKOHTE 10:33-43 MIZOVBSI. ([33] Chuvângin, i hnênah mi ka rawn tîr ta nghâl a ni; i lo kal hi a ṭha e. Chutichuan, Lalpan thu a pêk apiang che hre tûrin, tûnah Pathian mit hmuhin kan zain hetah kan awm a nih hi,” a ti a.) [34] Tin, Petera chuan a sawi a: “Pathianin mi duhsak bîk a nei lo tih dik takin ka hria e; [35] nimahsela, hnam tin zîngah tu pawh amah ṭiha, fel taka ti apiang a lâwm zâwng mi an ni ṭhîn. [36] Ani chuan thlamuanna Chanchin Ṭha Isua Krista kâa hrilin, Israela thlahte hnênah thu a thawn a (Isua chu mi zawng zawng Lal a ni a), [37] Johanan a tlângaupui ṭhin baptisma zawhah khân, thu, Galili ram aṭanga lo thang ṭana, Judai ram zawng zawnga thang chhuak kha, nangnin in hre bawk alâwm; [38] Nazareth Isua chungchâng thu kha, khatia Pathianin ani chu Thlarau Thianghlim leh thiltihtheihnaa a vûrzia kha; ani chuan mi chunga tiṭha leh, Diabola tihduhdah zawng zawng tidamin a fang vêl ṭhîn a, a hnênah Pathian a awm avângin. [39] Juda-te ramah leh Jerusalem khuaa a thiltih zawng zawng hretute kan ni e; ani chu thinglêrah khaiin an tihlum ta a. [40] Pathianin ani chu ni thum nîah a kai tho leh a, fiah takin a entîr a; [41] amaherawhchu, mi zawng zawng hnênah a ni lo, Pathianin hretua a ruat lâwkate hnênah chauh a ni, keimahni, mitthi zîng ata a thawhleh hnua a hnêna eia bârte hnênah hian. [42] Ani chu mitthite leh mi nungte chunga rorêltua Pathian ruat chu a ni tih, mi hnêna tlângaupui leh hriattîr tûrin Pathianin thu min pe a ni. [43] Tu pawh amah chu ring apiang, a hming avângin sualte ngaihhnathiamin an awm ang tih, hêng a chanchin hi zâwlnei zawng zawngin an hriattîr ṭhin kha,” a ti a.

Sawi zauna  ‘Lalpan thu a pek apiang che hre turin Pathian mit hmuhin kan zain hetah kan awm a ni,’ tih hi thil chhinchhiahtlak tak a ni. Engkim mai kha Pathian remruatna, a ordain a ni tih Kornelia hian a hre chiang khawp mai. Pathian mit hmuhin, in the presence of God kan awm a ti. Petera thusawi:- Isua nun (10:38), Isua thih (39), Isua thawh leh, mi tamtakin an hmu, an witness (40,41), Isua chawisan, mi zawng zawng rorelsaktu tur (42), Isua rin avanga ngaihdamna (43).

Ngaihtuah zui atan: 54/1. Petera thusawi hi uluk takin chhiar la chhinchhiahtlak tih i neihte tar lang la. Petera tawngkam;- Dik takin ka hria e(34), hretute kan ni(39),  keimahni, a hnena eia barte hnenah hian(42), Pathianin thu min pe a ni (42). Heng tawngkam atangte hian Petera a thil hmuh leh hriat, a thusawia a chian zia i hmu thei em, Pathian hre chiang deuh deuh nun kawng i zawh mek em, engtin nge hma i sawn zel ang?

54/2. Petera thusawi hi Isua chanchin hlang a ni. A behbawm a tlem khawp mai. Eden bawhchhiat, sual thu a awm lem lo a, kross a Isua tuar nat zia a sawi lang chiam lo. Engvang nge ni ang le, Kornelia-te hian an hriat ve tho vang nge ngai a ti lem lo ni ang? Chanchin tha sawi dawn ta la engtiangin nge Isua chanchin i sawi ang?