Tirhkohte Thiltih Zirlai 53-na. Tirhkohte 10:23-33

TIRHKOHTE 10:23-33 MIZOVBSI. Chutichuan, mite chu a ko lût a, a riahtîr ta a. Tin, a tûkah chuan Petera chu a tho va, an hnênah a kal a, Joppa khuaa mi unau tute emaw pawh a hnênah an kal ve a, [24] Tin, a tûk lehah Kaisari khuaah chuan an lût ta a. Tin, Kornelia chuan a laichînte leh a ṭhian duh berte ko khâwmin, anni chu a lo nghâk reng a. [25] Tin, Petera chu a luh dâwn lai takin Kornelia chuan a lo hmuak a, a ke bulah a bawkkhup a, Pathian chibai bûk angin a bûk a. [26] Nimahsela, Petera chuan ani chu a kai tho va, “Ding rawh, kei pawh mihring ka ni alâwm,” a ti a. [27] Tin, a hnênah thu sawi chungin a lût a, mi tam tak awm khâwm chu a va hmu a. [28] Tin, an hnênah, “Juda miin hnam dang pâwl leh an hnêna kal a thian lohzia nangnin in hria e; nimahsela, tu mah thiang lo leh bawlhhlawh ka ti tûr a ni lo tih Pathianin mi hriattîr a ni. [29] Chuvângin, mi rawn koh veleh khân hnial lovin ka lo kal ta a nih hi. Tichuan, ka zâwt a che u, eng nge mi rawn koh chhan le?” a ti a. [30] Tin, Kornelia chuan, “Ni li a ni ta, tûn hun ang thleng hian ka inah, behliang mun hun ṭawngṭainaah ka ṭawngṭai a; tin, ngai teh, mi pakhat puan êng tak sinin ka hmaah a lo ding a, [31] ‘Korneli, i ṭawngṭaina kha hriatin a awm ta, mi hnêna i thilpêkte pawh kha Pathianin a hre reng a. [32] Chuvângin, Joppa khuaah mi tîr la, Simona, Petera an tiha chu, i hnênah ko rawh; ani chu tuifinriat kamah savun siamtu Simona inah a thleng a ni,’ a ti a. [33] Chuvângin, i hnênah mi ka rawn tîr ta nghâl a ni; i lo kal hi a ṭha e. Chutichuan, Lalpan thu a pêk apiang che hre tûrin, tûnah Pathian mit hmuhin kan zain hetah kan awm a nih hi,” a ti a.

Sawi zauna Petera nunah Juda mi a nihna leh Christian, Isua ringtu a nihna bukin a awm mek a. Juda-ho hian Gentile-te hi thianghlim lo, unclean an ti a, an kawm ngai lo. Gentile-te hian sa ei thiang lo an ei bakah a thisen chawpin an ei a, an sa eitur an pathian an hlui ve thin. Heng hi Juda-ho ten em em a ni a, milem biakna, idolatory a ni. Petera kha chutiang mite kawm turin an inah a luh a ngai ta a, chu chu Pathian thupek a ni. Juda mi a nihna, a zahawmna, a reputation a hlauh thei a ni. Jerusalem a thlen veleh a an sawi hmasak ber pawh, ‘Serh tan lote inah i lut a, an hnenah i ei vei a,’ tih a ni (11:3). Petera chuan Pathian thupek awih a thlang ta a ni. Juda mi a nihna aiin Isua neitu a nihna a dah hmasa a ni. Fing takin Juda ringtu mi 6 a hruai ve a, engkim thuhretu, witness ni turin.

Ngaihtuah zui atan 53/1 Isua neitu i nihna hi i nunah a lian ber em, nge thil dang i nun hruai zawktu, i ngaihpawimawh zawk a awm thin?

53/2 Kornelia hian Petera hi a ke bulah bawkkhupin chibai a buk a ni. Peteran a kai tho a, ‘Ding rawh, kei pawh mihring ka ni alawm,’ a ti a. Kornelia dinhmun emaw, Petera dinhmun emaw a din chang i nei em, (ngaihsan deuh, ngaisangtu deuh) lo ding ta la engtiangin nge i chet ve ang?