Tirhkohte Thiltih Zirlai 51-na. Tirhkohte 10:1-8

TIRHKOHTE 10:1-8 MIZOVBSI Tin, Kaisari khuaah a hming Kornelia mi pakhat a awm a, Itali pâwl an tih, chumi pâwla sipai za hotu a ni a, [2] Pathian ngaihsak mi a ni a, a chhûngte zawng zawng nên Pathian an ṭih ṭhîn a, mite hnênah thil tam tak a pe ṭhîn a, Pathian hnênah pawh a ṭawngṭai fo va.

[3] Chu mi chuan behliang mun hun lai vêlah, mumang angin fiah takin Pathian vântirhkoh pakhat a hnêna lûta, “Korneli,” tiin a hmu a. [4] Tin, Kornelia chuan ani chu a lo en reng a, a hlau va, “Lalpa, eng nge ni?” a ti a. Tin, ani chuan a hnênah, “I ṭawngṭainate leh i thilpêk thute kha hriat reng tûrin Pathian hmaah a thleng chho ta a. [5] Tûnah Joppa khuaah mite tîr la, mi pakhat Simona, Petera an tiha chu, han hruaitîr rawh; [6] savun siamtu Simona hnênah a thleng a ni, a in chu tuifinriat kamah a awm,” a ti a. [7] Tin, vântirhkoh a betu chu a kal veleh, Kornelia chuan a chhiahhlawhte zînga mi pahnih leh a rawngbâwl fote zînga Pathian ngaihsak sipai pakhat a ko va; [8] tin, thu zawng zawng chu an hnênah a hrilh zawhin Joppa khuaah chuan a tîr ta a.

Sawi zauna Kaisari khua, Ceasarea Maritima (Ceasarea Phillippi a awm bawk) hi Rom sawrkarin Judai ram, Judea khawpui a tana an siam a ni. Jerusalem chu Juda sakhaw hmunpui a nih avangin Rom sawrkar hian khawpuiah an hmang duh lo. Tul lova buaina siam an duh lo a ni. Joppa khua hi tuipui kama awm a ni a. Tunlaia Jaffa an tih, Israel khawpui Tel Aviv a veng pakhat a ni. Lawng chawlh hmun pawimawh tak a ni. (Joppa leh Kaisari inkar hi kilometre 50, mel 30 vel a ni a. Petera kha ni hnih chhung a kal). Kornelia, Cornelius hi sipai hotu mi tha tak a ni a. Gentile ringtu hmasaber ni a ngaih a ni. Gentile ‘Pathian ngaihsak’ ti a Tirhkohte Thiltihin a sawite zing ami a ni. Hnamdang, Israelte biak Pathian hi Pathian dik a ni tih ring a chibai buka, tawngtai thinte sawina a ni. Juda-te awp bettu Rom sawrkar milian a ni. Rom pathiante ni lo va an awp beh Israelte Pathian a ring zawk daih mai hi thil mak tak a ni. Tawngtai leh thil tha tiin a hun a lo hmang nasa thin a, Pathianin a puahchah a lo ni.

Ngaihtuah zui atan 51/1. Kornelia hi mi zahawm, sipai lal, neinung tak, Pathian ngaihsak, a chhungte zawng zawng nen Pathian an tih a, mite hnena thil tam tak pe thin, Pathian hnena tawngtai thin a, a tawngtaina pawh Pathian hnen a thleng a ni. Israel mi tam tak Pathian hawisan an awm laia Kornelia ang mi hnamdang zinga an awm hi a mak khawp mai. A huhova kan awm a, thil kan tih ho mup mup lai hian, mimal leh chhungkaw nun pawimawh zia a lo lang a ni.

Kornelia nunah hian enge kim lo ta le?

Kristian ni lo mi tha tak tak an awm. Heng mite hi dik zawk lek lek, awhawm zawk, nun kim nei zawka ngaih chang i nei em?  (Anni chu sawi loh Kornelia Pathian dik betu pawh hi Isua lovin a nun a famkim lo a ni.)

Isua tel lo hian nun kim, nun tha neih theih niin i hria em? Nun famkim, fullness of life tih hi han sawi zau teh le.