Tirhkohte Thiltih Zirlai 44-na

TIRHKOHTE 8:9-24 MIZCLBSI. Chu khuaah chuan mi pakhat, Simona an tih, dawithiam a awm a. Mi ropui tak niin a insawi a, Samari mite chuan a dawi chu mak an ti êm êm a. [10] Mi zawng zawngin, a lian a têin a thu chu an bengkhawn hle ṭhîn, “He mi hi Pathian thiltihtheihna, ‘Ropui,’ an tih kha a nih hi,” an ti a. [11] A mitdawivaih thiam chu hun rei tak mak ti taka a lo siam tawh avângin a thu chu an ngaichâng ṭhîn a ni. [12] Pathian ram Chanchin Ṭha leh Isua Krista hming Filipan a hril chu an rin tâkah chuan, a hmei a pain baptisma an chang ta hlawm a. [13] Simona meuh pawhin a ring ve ta a, baptisma a chang a, Filipa chu a kawp ta tlat a, chhinchhiahna leh thil mak ropui tak a tihte chu a hmu a, mak a ti êm êm ṭhîn a. [14] Jerusalem-a tirhkoh awmte chuan Samari khaw miten Pathian thu an awih ta tih an hriat chuan an hnênah Petera leh Johana an tîr a. [15] Anni chu an zu kal a, Thlarau Thianghlim an dâwn theih nân an ṭawngṭaisak a. [16] An zînga tu mahin Thlarau Thianghlim chu an la dawng rih lo; Lalpa Isua hmingin baptisma an chang chauh a la ni si a. [17] Tichuan, tirhkohten an lu chungah kut an nghat a, Thlarau Thianghlim an dawng ta a.  [18] Tirhkohten an chunga kut an nghahin Thlarau Thianghlim pêk an ni tih Simona chuan a hmuhin pawisa pêk a tum a, [19] “Hetiang thiltihtheihna hi mi pe ve rawh u, an chunga kut ka nghahna apiangin Thlarau Thianghlim an dawn ve theih nân,” a ti a. [20] Nimahsela, Peteran a hnênah, “I tangka nên hian boral rawh u: Pathian thilthlâwn pêk tangka suma lei i tum avângin. [21] I rilru put dân Pathian mit hmuhah a dik lo va, hêng thilah hian tel vena leh chanvo i nei ve lo. [22] Amaherawhchu, i sual hi sim la, Lalpa hnênah ṭawngṭai la, i ngaihtuahna sual hi a ngaidam mial mahna che. [23] Awhna rilru chhe tak i pu a, sualin a phuar tlat che tih ka hmu a ni,” a ti a. [24] Simona chuan, “I thil sawite chu eng mah ka chunga a lo thlen loh nân nangnin Lalpa hnênah mi dîlsak rawh u,” a ti a.

Sawi zauna : Petera leh Johana kut nghah a Thlarau Thianghlim an lo chang ta tih a nih rual hian Pathianin a hriattir duh ni a lang chu; mi a thliar loh zia, an hmuhsit, an ram pawh kal tlang hreh khawpa an huat Samari mite hi Pathian hian a en hrang lo va, an dawn ang tho Thlarau Thianghlim an chang ve a ni tih hi a ni. Pathianin a pawm hi an lo hnawl palh ang tih a hlauhawm a ni. Dawithiam Simona hian Pathian thilpek in tih lar nan, mahni ham that nan, mite chunga leng a ni tih tih lan nan a duh a ni. Pathian hi kan duh zawng ti tura ngiat chi, a thiltihtheihna hi kan in sawhngheh na tur atan, midangte aia kan ropuina tih lan nan hman chi a ni lo tih a zir chhuah theih awm e.

Ngaihtuah zui atan : 44/1. Simona hian Isua a ring tak tak nge Isua a rinna a puang chhuak ringawt, a danglamna awmin i hria em? Christian nih leh Isua neitu nih hi thil in ang lo ni theiin i hria em? (Entirnan: Rom 10:9; ‘I kâin Isua chu Lalpa a ni tih i ṭana, mitthi zîng ata Pathianin a kaitho tih i thinlunga i rin chuan, chhandam i ni ang,’ tih kan hmu a.)

44/2. Philipa, Simona leh Petera-te leh an rawngbawlna atang hian Pathian chungchang zir chhuah i nei em?

44/3. Thlarau Thianghlim dawng turin Petera leh Johana kut nghah enga tinge a ngaih? Philipa rawngbawlna kha a famkim lo em ni, nge Samari mite lam zawk? Thlarau Thianghlim hi tu kuta awm nge, in pek chhawn theih a ni reng em? A changin Thlarau Thianghlim hi an chang mai a, a changin kut nghahte a ngai a. Formula bik a awm lo tihna a ni a, Pathianin a duh a a pek a ni tih i zir chhuak tel em?