Tiam Tlat E (I Married You) XXIV– Walter Trobisch

Bung 6 chhunzawmna

Daniel-a lam ka hawi a, ani pawh ka bulah a la ding reng a, ti hian mipuiin an hriat theih turin ka zawt a:

‘In ṭhalaite hi eng nge an dinhmun? He’ng angle pahnihte hi a rualin an thleng ṭhin em?’

A upa lam thleng chuan an nui ta huah huah hlawm a. Daniel-a pawh hre thiam takin a nui suk suk a, mipui nui thawm a reh thlengin a nghak a. Tichuan titak hmel pu zawkin a awm leh a, a phun mual mual a. Tlar hmasa bera Maurice-a bulah chuan ka zuk ṭhu a, ani chuan Daniel-a thusawi chu ka beng bulah min lehlinsak a:

‘He’ng laia thil thlen dan chu hei hi a ni: Mipain hmeichhe hnenah, “Ka hmangaih che,” a ti a, a thusawiah chuan rinawmna kawngah inchi khat chauh a kal thung. Mahse hmeichhia kha a lawm leh lutuk a, mipat hmeichhiatna lamah inchi thum lai kal a phaltir ringawt ṭhin a.’

An han nui ri leh hum hum a.

‘Chutah mipa chuan heti hian a ngaihtuah ta. A ṭha hle mai a tiin rinawmna kawngah inchi khat dang a han kal leh a. Hmeichhiain chumi chhan nan chuan mipat hmeichhiatna lamah inchi li lai mai a han kaltir leh bawk a. An inhriat hmain sex angle ah khan an lo lut der tawh ṭhin a, chumiin a ken tel mawhphurhnate lah chu lak an la inring lo nasa mai si. Line ngil vek ni lovin line awn vek an nei ta zawk alawm.’

Daniel-a chuan line ngil vek chu nawt rehin line awnin a han thlak a:

Daniel-an awlsam tak maia a han hrilhfiah chu thiam ka ti riau mai. Min han hui a, a bulah chuan va dingin ka thuchah tlangkawmna ka va sawi chhunzawm leh a.

‘In hmuh ang hian,’ tiin triangle chhunga line awn ho chu ka han kawk a, ‘triangle chhungah hian awl, thil ruak a awm ta a ni. Hei hi Europe leh America rama inhual tam takte dinhmun a ni. Inhmangaih tawn chuan an inngai. Mahse hmanhmawh avangin an dai loh tur an dai ngawt ṭhin. An inlaichinnaah chuan eng emaw kim lo a lo awm thuai a. Inhmangaih tawna an inngaihnaah chuan an chiang lo tual tual a. An hmangaihna tihpun tumin mipat hmeichhiatnaah chuan nasa lehzualin an tlan a. An tih ngun zawh poh leh an inhmangaihnaah chuan an chiang lo zual ting mai si.

‘Chutianga an lo kal thui tawh em avang chuan lehlamah an inhualna chu tihtawp an ngam tawh bawk si lo. Tichuan an innei ta ngawt mai a, an inneihnaah chuan chu kim lohna riau chu an chhawm zui ta zel a, chu chu nakin lawka harsatna leh buaina rawn chawr chhuahna tur a lo ni ṭhin.

‘He’ng line te awn lova ngil taka awm reng tura ven tlat hi hna harsa tak a ni. Mihring finna leh chakna ngawt chuan a daih zo lo. Pathian aṭanga chhuak finna leh chakna a ngai. Inneihna duangtu ropui Pathian ngeiin a ṭanpuina a ngai a ni. Ani chuan he’ng inneihnaa thil pawimawh pathum – kalsan, invawn leh tisa pumkhat te – ṭhen hran theih lohva inhnaih taka a dah chhan chu chiang takin a hria a. Ani chu kan rin pumhlum tawp a, chutianga kan rin phawt chuan min lak ṭhensak ni lovin thil min pek a duh zawk a ni tih pawh kan hriat a ṭha – chu chu thilsiam mawi tak siam thei tura min puih a duhna a ni. Hetianga rinna leh chian ngamna hian a thupek zawm thei turin chakna min pe dawn a ni:

“Chuvangin, mipain a nu leh a pa a kalsan ang a, a nupui a vuan ang; tichuan, tisa pumkhat an lo ni tawh ang.”

‘A tawp nan, a chang dawt chiah hi i han ngaihtuah leh lawk teh ang u: “Tin, Adama leh a nupui chu an pahnihin saruakin an awm a, an zak lem lo va” (Genesis 2:25).

‘He chang Bible-a a awmna hi a mak ngawt mai. Paradise leh lei anchhedawng inkarah a awm a. Thilsiam chungchang sawina tawp lamah, suala tlukna sawi hma chiahin a awm a ni. Hetiang hian inneihna chu lei anchhedawng kara paradise tem lawkna lam a kawk ni te pawhin a sawi theih ang.

‘ “Saruakin…an zak lem lo.”

‘ “Saruak” tih hi tisa saruak tihna chauh a ni lo. A awmzia tak zawk chu saruak leh tihdanglam awm lovin, lemchan awm lovin, engmah thup ṭhen lovin, kan kawppui chu a nihna tak tak anga hmuin leh keimah ngei pawh ka nihna tak tak anga inlanin – zak chuang lem lovin tihna a ni.

“Saruakin…an zak lem lo.”

‘Mahse Bible chang hmasa lama a sawi angin he hmangaihna puitling tum ram hi nu leh pa kalsana, kawppuite vuan hnenah chauh tiam a ni, ṭawngkam dangin sawi ta ila, mipui hmaah dan anga inneite tan chauh tihna a ni.

‘Inneih hma leh inneihna pawn lama mite ni lovin, he’ng mite zawk hi tisa pumkhat chu an ni. Bible in inneihna chungchangah chauh “tisa pumkhat an lo ni tawh ang” a tih hian awmzia a nei thuk khawp mai.

‘Inneih hma leh inneihna pawn lama mite ni lovin he’ng mite hi hna harsa tak, nihna ang taka inhmachhawn a, chen dunnaah, saruaka awma zah lem lohnaah chuan an hlawhtling ang.

‘Inneih hnua zah tawh lohna a awm dawn a nih chuan inneih hmaa zah tlatna chu a awm tur a nih a rinawm.

“Saruakin…an zak lem lo.” Hei hi a ni Bible in “pawl” a tih thumal awmzia chu. “Adama chuan a nupui Evi chu a pawl a” (Genesis 4:1).

‘Pasal leh nupui chuan an puan in chhungah chauh he thu awmzia hi an fiah ang.’

‘ “Chuvangin, mipain a nu leh a pa a kalsan ang a, a nupui a vuan ang; tichuan, tisa pumkhat an lo ni tawh ang.”