Tiam Tlat E (I Married You) XXIII– Walter Trobisch

Bung 6 Chhunzawmna

‘A tawp nan fiah takin thu ka’n tlip teh ang: Mipat hmeichhiatna hi hmangaihna fiahna a ni lo.’

Hetih lai hian ka thusawi chu tihtawp a ngai a. Daniel-a chuan mipui aṭangin ngenna a awm a, he’ng fiahna paruk ka sawite hi blackboard-ah ziak turin min duh thu min lo hrilh a. Kei pawhin chu chu ṭha ka ti a. A vei lamah sapṭawngin ka ziak a, Daniel-an ding lamah an ṭawngin.

Hun a duh rei phian a. Mi tam tak chuan an lo ziak thla ve mawlh mawlh bawk a. Ṭhenkhat a ziah thlakna tur lehkhapuan nei ve lote chuan hlabu phek hnung lam an lo pawtthla chu niin, Daniel-an chu chu a hriat chuan a lawm lo angreng viau mai.

Fiahna paruk ka ziah zawh chuan a hnuaiah hawrrawp puiin lian takin heti hian ka ziak a:

SEX HI HMANGAIHNA FIAHNA A NI LO

Daniel-an engtin nge a lehlin phei chu ka hre lova, mahse nimin piah ai thlawt chuan hma kan sawn niin ka ngai a, a chhan chu maicham hmaa blackboard-ah ‘sex’ tih thumal kan han ziak ngam ta a nia!

Ka sawi fiah a:

‘Miin mipat hmeichhiatna hi an inhmangaih tak tak leh tak tak loh fiah nan hman an duh a nih chuan he zawhna hi zawh an ngai a ni: “Chuti em ema tlem chuan a ni maw in lo inhmangaih?” An pahnihin, “Zanin hian sex kan hman a ngai a ni – a nih loh chuan ka kawppui hian ka hmangaih lovah min ngai ang, emaw, aman min hmangaih loh phah ang” tih an ngaihtuah a nih chuan hlawhchham hlauhna ringawt pawh kha he en chhinna hlawhchham phahna a ni thei tawh hrim hrim. Mipat hmeichhiatna hi hmangaihna fiahna a ni lo, a chhan chu kan fiah duh bera kha kan fiahna khan a tichhe tlat alawm.

‘I mut dawna i awm dan kha hriat han tum mah teh. I awm dan i hriat chuan i muhil thei lo ang. A nih loh pawhin i muhil daih ang a, i awm dan kha i hre thei lovang.

‘Chutiang chiah chu hmangaihna fiah nana mipat hmeichhiatna hman awm dan chu a ni. I fiah chuan i hmangaih thei lo ang. A nih loh pawhin, i hmangaih chuan a fiah nan mipat hmeichhiatna hman kher a ngai lo ang.

‘Triangle hmasawnnaa a tel ve theih hma chuan tisa hmanga hmangaihna puan chhuah chu hmangaihna ngei hian a nghah theih a ngai a ni. He nghah lai tak hi hmeichhe tan ai mahin mipa tan a harsa zawk. Chu vang chuan hmeichhiain mipa a puih a ngai ta a ni, a chhan chu mipate hi insum thei lo zawk an ni a, an tum ram thleng lova an tluk mai a hlauhawm a ni.

‘A puih theihna kawng hmasa ber chu tina lo leh an inlaichinna tichhe lova “aih” tih thiamna hmangin a ni. Hei hi thiamthil dangdai deuh a ni. Chutih rualin thu leh awm lo tura tawi fel taka “aih” tih mai hi sei taka sawi fiah emaw chhuanlam siam duah emaw aiin a ṭangkaiin a thawk ṭha zawk tih pawh kar lovah a hre thuai ang. Mipain a hmangaih tak tak a nih chuan chutiang a ti ngam chu a zah phah sawt ngei bawk ang. Tin, thinlung taka fakna chu duat taka pawm aiin awmzia a nei zawk tih pawh hmeichhia hian a zirtir a ngai bawk ang.

‘A puih theihna kawng dang leh chu sen ṭawn ṭawn khawpa a zah theihna hmangin a ni. Hmanlai chuan hmeichhiate hi an zah chuan an sen ṭawn ṭawn ṭhin an ti a. Tunah chuan an sen ṭawn ṭawn chuan an zak zawk tawh a nih chu! Hetia han sen ṭawn ṭawn hi kan taksain kan zak a ni tih a tihlanna a ni ve a, chu chu thil zahthlak a ni lem lo. Invenna leh inhliah khuhna a ni kawp a. Hetianga eng emaw changa an zah theihna leh an inngaihtlawmna hi hmeichhiate hian thilpek hlu takah chhiarin hmangaihna dawm kan zel nan hmang thiam teh se.’

Biak In chhung chu a reh duk tawh mai. Khawthlang lam aiin Africa ramah te hian he zahna leh inngaihtlawmna hi a la tam zawk daih tih ka hre kar a. Film vela rei tak an han infawh te hi African ho tan chuan tenawm a tling deuh tlat. TV hmaia a lo lang kuau hian entute chuan hrehawm an lo ti a, ṭhenkhat phei chu khaw dang an hawi daih ṭhin. Chutih rualin he’ng film te hi Africa ramah chhuah an ni reng tho a, chu vang chuan zahthlak tih kha a dik lo zawk emaw ti tawk te pawh an awm tawh. Chu vang chuan zah kha a la dik zawk reng a ni tih hrilh fiah hi ka bat niin ka hre tlat.

Tlar hmasa ber hma deuh chiahah chuan Daniel-a nen chuan kan la ding reng a. Ka hun hman tawh zat ka han zawt a. Minute sawm aṭanga sawmpanga vel chu ka la sawi thei tih min hrilh a. Tichuan inhual tawhte tana thuchah hmangin ka thusawi chu a tlang kawm ka tum ta a:

‘Tunah chuan sex aṭang ni lova hmangaihna aṭanga triangle a lut nupa i han mitthla chhin teh ang. An dinhmun hi a dang daih a, chu vangin he’ng kawng pahnihte hi kan chhut ngun a ngai khawp mai.

‘Rei tak lo inhre tawh an ni. Mipat hmeichhiatna hmangin an inhmangaihna chu fiah a ngai an ti lo. Inpek tawn an thiam tawh a. An hmangaihna avang chuan phurna leh chakna an ngah sawt ve ve a. An inzah tawnna pawh a thuk telh telh a. An tihṭhan thilte an inpawmpui vek tawh a, an inngaina tak zet bawk. Hun harsa tam tak pal tlangin an lo inhnial ve fo tawh bawk. An inngaidam tawn thei tih pawh an inhre tawh.

‘Tunah chuan he thutiam: “Dam chhung atan invawn kan duh” tih hi an siam dun thei tawh reng mai. An inhual tawh tihna a nih chu. Triangle chu hmangaihna kawngka aṭangin an lut a – hmangaihna chuan invawn a duh tawh. Tunah chuan thutlukna pawimawh tak an siam a ngai: “Angle dang pahnihah hian khawi zawk hi nge kan ban hmasak ang? Kan innei phawt anga kan mu dun dawn nge kan mu dun phawt anga kan innei ang?”

Ka chawl det a, ṭhalai ho chu ka en kual a, ti hian ka zawt a: ‘Eng nge in ngaihdan?’

A thlun phelh ang mai an ni, an ṭawng thum ta mur mur mai. Daniel-an a han bei ngial a, a tawpah chuan a khap dai thei ta a. Tichuan ka han sawi nawn leh a:

‘He dinhmun hi nimin lama kan sawi “sex kawngka” nen chuan a danglam hlauh a nia. He mite hi chuan intiamkamna pawh nei lem lova tih hmasak berah mipat hmeichhiatna hi an lut lem lo. Uluk taka hun rei tak chhung an inzir hnuin inkawp turin an intiam thei tawh a. Mahni hmasialna rilru pakhat mah an nei lova, an kawppuite tan mawhphurhna an la ngam zan tawh zawk a ni.

‘Tunah chuan heti hian an inzawt ta a: “He kan inhmangaihna hi eng vangin nge kan taksa hmangin kan puan chhuah theih loh ang? Mu dun turin eng vangin nge phalna kan lak hmasak kher ang? He certificate mai hi em ni kan inneihna tichiangtu chu?”

‘A ni hauh lo mai – birth certificate hi nau pian tirtu a ni lo ang bawkin. Chutih rulain birth certificate hi lehkha them a ni ngawt lova. Dan ang thlapin mihring nun hi a hum ve tlat a ni.

‘Chutiang chiah chu inneih certificate pawh hi a ni. Dan ang thlapin inneihna chu a humhim a ni. Inneihna triangle-in hma a sawn zel dawn chuan dan anga tihfelna hi mimal inkungkaihna leh tisa inpumkhatna te nen a pawimawh dan a inang reng tih kan hriat tawh kha.

‘Innei tura inhual tawh hnua inkutsuih leh mo lawm pawh awm lova ding lam hawi tawp duhtute hian thil pawimawh tak pakhat an hmuh hmaih a ni: hringnuna hma lam hun sawi theih a nih lohzia hi. An innei ngei dawn tih chu engtin nge an hriat chian?

‘An inneih tak tak hmain pakhat zawk boral ta se engtin nge ni ang? Accident tawk se? Heart attack te nei se? Pathlawi a ni dawn nge dawn lo? Nuthlawi a inti dawn em? Ro an khawm thei ngawt em? A hming kan sawiin ‘Pi’ kan ti dawn nge ‘Nula’ kan ti ang? A nih loh pawhin lo rai ta se, a naute chuan tu hming nge a chhawm dawn? He’ng zawhnate hian inneih certificate hi lehkha them mai chu a ni lo deuh tih an tilang a ni. Dan anga thil tih an la inrin hma chuan mawhphurhna tak tak an la la ngam lo tihna a ni ber mai. Mawhphurhna lak chuan dan anga thiltih thlap a phut tlat a ni.

‘Hei vang hian an induhnate hi an thup tlat dawn tihna em ni? Maicham an pan phawt anga chutah chuan inlarna ropui chu an hmu chauh dawn tihna em ni? Ni lo, a ni lul lo. Thiltihtheihna che vel tur kha hetianga an tih chuan an dodal daih zawk ang; dan anga an tih duh lohna nen chuan a nghawng a inang reng. A thuruk zawk chu hei hi a ni: inhmangaihte chu ṭhang dun zelin chu’ng kawng pahnihah te chuan hma an lo sawn zel a, pen khat pawh an bawh kan lo a ni.’

Blackboard lam hawiin heti hian line ka han ziah belh a:

‘Rinawmna leh inkutsuih lam pana an pen zawng zawng chu an induhna leh inpawhna nen a kal kawp zel ang a, a tawpah hmangaihna kawngka aṭanga lo kalin, angle dang pahnih – inneih leh nupa nun – te chu a rualin an thleng dawn a ni.

‘Hetianga tih tumna aṭang chauh hian he zawhna hi chhan theih a ni. A sawi tum ber chu nupa nun thleng tura pen tin hi mawhphurhna leh rinawmna nen a inbuktawk chhoh zel a ngai a ni.’