Tirhkohte Thiltih Zirlai 38-na. Tirhkohte 7:22-35

TIRHKOHTE 7:22-35 MIZCLBSI

Mosia chu Aigupta ram finna zawng zawng a zirtîr a; tichuan, thu sawi thei tak leh thil ti thei tak a lo ni ta a. [23] Mosia chuan kum sawmli a nih kum khân, a unau Israel fate chu tlawh ṭûlin a hre ta a. [24] A va tlawh chuan an zînga pakhat chu Aigupta miin a lo tiduhdah lai a hmu a, a chhan a, a phuba a lâksak a, a tiduhdahtu chu a that ta a. [25] Mosia chuan ama kutin Pathianin anmahni a chhanhim dâwn tih a unauten an hria emaw a ti a; nimahsela, an lo hre si lo. [26] “A tûkah chuan mi pahnih insual lai a rawn hmu a, ṭhelh tumin, ‘Pute u, unau in ni alâwm, engati nge in insual tâk mai?’ a ti a. [27] A ṭhenawm bei hmasatu zâwk chuan Mosia chu a nam kiang a, ‘Kan chunga hotu-ah leh rorêltuah tuin nge siam che? [28] Nimina Aigupta mi i thah ang khân mi thah ve i tum a ni maw?’ a ti a. [29] Chu thu avâng chuan Mosia chu a tlân bo va. Midian ramah a va châm ta reng a, chutah chuan fapa pahnih a nei a. [30] “Tin, kum sawmli a vei hnuin Sinai thlalêrah hnimbuka meialh zîngah Vântirhkoh a hnênah a inlâr a. [31] Mosian a thil hmuh chu mak a ti êm êm a; fiah tumin a va hnaih a, Lalpa awin, [32] ‘Kei hi i pute Pathian, Abrahama te, Isaka te, Jakoba te Pathian chu ka nih hi,’ a rawn ti a. Tichuan, Mosia chu a khûr a, a fiah ngam ta lo va. [33] Lalpa chuan a hnênah, ‘I pheikhawk kha phelh rawh, i dinna kha hmun thianghlim a ni. [34] Aigupta rama ka mite an tihretheihzia ka hmu reng a, an rûm pawh ka hre reng a, anmahni hruai chhuak tûrin ka lo chhuk ta a ni. Hawh teh, Aigupta ramah ka tîr ang che,’ a ti a. [35] “Chu Mosia, ‘hotu-ah leh rorêltuah tuin nge siam che,’ tia an hnara ngei chu, Pathianin hotu leh chhanchhuaktu atân hnimbuka a hnêna inlâr vântirhkoh hmangin a rawn tîr ta a ni.

Sawi zauna :Mosia kha Aigupta lal Pharaoa inah a seilian a.  Philo leh Josephus hian Mosia inzirna that tur zia leh thil a hriat a a thiam tur zia an ziak a ni. Kum 40 a nih thlengin Aigupta lal inah a awm a. Chu mi hnuah Median ramah mikhual niin, a puzawn beram vengin thlalerah kum 40 chhung a awm a. Pharaoa hnena a inlan khan kum 80 mi a ni a. Israel fate thlalerah khan kum 40 chhung a hruai leh a. Kum 120 mi niin a thi ta a ni. Tihian an sawi thin; Mosia khan kum 40 chhung eng eng emaw a zir a, kum 40 chhung engmah nih loh a zir a, a hun hnuhnung kum 40 chhung khan Pathian chu engkima engkim a nih a zir ta a ni. Abrahama ang tho khan Gentile ramah Pathianin a bia a. ‘I pheikhawk kha phelh rawh, i dinna kha hmun thianghlim a ni,’ Mosia hnenah Pathianin a ti a. Pathian chenchilhna, a presence hi hmun ti thianghlim tu chu a ni tih Stephena hian Bible thu tan chhanin a sawifiah a ni. Eng hmun pawh, thlaler pawh, Gentile ram pawh Pathian a inlarna, a chenchilhna apiang chu hmun thianghlim a ni mai a ni.

Stephana hian Pathianin Abrahama hnena thu a tiam chu Mosia hmangin a ti hlawhtling a ni, tih a tar lang a. Mosia leh Lalpa Isua in anna a sawi a. Chu Mosia, an hnawl hnu ngei mai chu Pathianin an hnam hruai chhuaktu leh hotu-ah a ruat a ni tih a sawi a. Chutiang chiah chuan Isua, Mosia aia ropui zawk, an hnam Juda-ten an hnawl ngei chu Pathian hriak thih, Lal leh chhandamtu a Pathianin a ruat a ni, tih hi Stephena thusawi atanga hriat thiam theih chu a ni.

Ngaihtuah zui atan : 38(i). I bula awm, i thawhpuite, thiante tih lungnih loh hlauvin thutak i tarlang ngam lo thin em, enge Stephana atang hian zir chhuah i neih? Stephena hian finna nen, uluk takin Bible a chhui a, fiah fel takin an zawhna a chhang a ni tih a hriat theih awm e. A thu ngaithlatute hian naktuk an nei lo ang tih hlauhpuina nen huai takin inngaihtuah chiang turin a tur a, a thu pawh a khauh a ni. Duhsakna nen, hmangaihna avanga an huat pawh pawisa lovin thu tak mite i hrilh ve ngai em?