Tiam Tlat E (I Married You) XIII– Walter Trobisch

Bung 3 Chhunzawmna

A tuk lehah chuan hma tak maiah ka harh a, hotel chaw eina hmunah chuan tukṭhuan puar takin ka ei a. Ka room-a ka kir leh hnu lawkah Daniel-a a lo thleng a.

Ka thusawi chungchanga mite ngaihdan tam tak a lo hre tawh a.

‘A upa lam deuhten engtin nge an dawnsawn?’

‘A tlangpui chuan an dawngsawng ṭha khawp mai. A upa deuh ber zinga mi pakhat chuan heti hian a tia: “Biak Inah inneihna chungchang a sawi dawn tih ka hriat hmasak ber kha chuan pa sual tak a nih ka lo ring a. Mahse tunah chuan inneihna hi Pathian nen a inzawm dan pawh ka hmu thiam ve deuh ruak tawh.”’

‘Chu chauh pawh chu ka tan chuan hlawhtlinna a ni tawh hrim hrim.’

‘Ka lawmna ber i hre duh em? Kan kohhranah khan nau nei thei lo nupa an awm a. Nau an neih theih loh vangin tawrh pawh an tuar nasa khawp mai. Mahse an inhmangaih em em mai a, inṭhen lam chu sawi pawh an sawi duh lo. Fanaute tel lova triangle a kim thei khan a thlamuan em em a nih chu.’

‘In zingah huan thlirna ang kha a hluar ve hle a ni maw chu?’

‘Aw. Tehreng mai. Kan rin dan nghet tak a ni zawk mah ang chu. Chu bakah fanaute chu mipa chi aṭanga lo piang an ni tih te, fanute aiin fapate an hlu tih te leh huan chu lei leh hralh tur a ni tih te zawng zawng nen.’

Daniel-a hi titipui a nuam ṭhin ngawt mai. Ngaihtuahna ril tak mai a nei a, ṭawng lettu atan pawh duhthusam a niin ka hria. Amah avang chuan phurna nasa tak ka neih phah a. Ka unaupa tak tak ang mai a ni.

‘En teh maw Daniel, he khawvelah hian inneih chungchang thlir dan chi hnih: huan ang leh Bible thlir dana triangle te chauh hi an awmin ka hre ta deuh. A sawi fiah dan leh a sawi zau dan erawh tam tak a awm thei ang a.’

Daniel-a chuan a ngaihtuah vang vang a, tichuan heti hian min chhang a:

A ‘kalsan’ lai tak hi keini khawpui angah chuan a buaithlak a nih hi. Kan inneihnate hian kalsan natna an vei a ni ber mai. Fate hi nu leh pate thu lovin an kal a nih loh vek pawhin engtikah mah an kalsan lo ṭhin a. A eng zawk zawkah pawh a tuartu chu inneihna kha a ni zel ṭhin. Kan mite hian inkalsan reng chunga pumkhat la nih tho emaw, inpumkhat reng chunga inkalsan tho lai hi an hmu thiam thei lo a ni.

‘Hrilhfiah theih ni pawhin ka hre lo. Thil inkalh tlat a ni ve bawk a. He thil hi chu Krista hmang chauhva hrilhfiah theih niin ka hria. Ephesi khuaa mite hnena a lehkhathawnah khan Paula khan a sawi chiang viau mai: “Chumi avang chuan mipain a nu leh pa kalsanin…Krista a sawinaah ka ngai mai a”…Krista chuan Pa a kalsan a, an pahnih chuan pumkhat an la ni tho a. German ṭawngin hla kan nei a, heti ang deuh hian a lehlin theih ang:

“Fapa chu Pa angchhung aṭangin a chhuak a,

Chatuanin a inah chuan a awm reng tho.” ’

‘A nih leh chu chu kan mite hnenah hian i hrilhfiah thei ang em?’

‘Kan tum ang chu,’ ka ti a. ‘Mahse maw Daniel, zawhna ka zawt thei che ang em? Nizan ka thusawiah khan a mimal taka khawihtu che a awm em?’

Chhanna tur a lo nei sa thlap mai. ‘Nupa chu inhnaih ber tur tih lai kha, mi dang leh thil dang zawng zawng aia inhnaih tur tih lai kha. Ka tan chuan pastor ka nihna leh nupa kan nihna te hi inhnek remtir a harsa deuh ber mai. Ka nupui tan hian hun ka pe tam thei lo. Ka hna hi ka ngai pawimawh ber a, a dawtah ka nupui. Chaw ei rual tura rin theih ka ni lo tih a sawite kha a dik lutuk tlat. Chaw kan ei rual lai pawhin vawi hnih vawi thum ka thawhsan te a ngai a, mi an lo leng a nih loh leh telephone a lo ri chhen a.’

‘Nimin khan Esther-i kha a uang nge a thutak tih ka lo hre thiam lova.’

‘A thutak lutuk tlat, Walter. Chuan a sawi dik chiah bawk. Mahse tunah chuan thil tihdanglam dan tur pawh ka hre tawh chuang lo. Chu bakah thil inhrilh tawn chungchang i sawi khan min hneh viau mai. Kan neih ngai miah loh thil a ni. Hun kan nei lo a ni ber ang chu.’

A sawi lai mek chuan telephone a lo ri leh ral ral a. Hmeichhe pakhat bawk kha a ni.

‘Khawi aṭangin nge min lo biak?’ tiin ka zawt a.

‘School aṭangin. Tunah hian chawlhlawk kan nei mek a.’

‘Nizan chuan in pa chu min rawn hmuh chungchang i lo sawipui ta em?’

‘Aih.’

‘Nizan khan i mamawh deuh tur thil ka chhar a. Bible i nei em?’

‘Aw, kan khuaa ka awm lai, kan naupan laia ka neih pakhat chu ka la kawl.’

‘A nih chuan Jeremia 10:20 lo en teh aw. I chang tur a nih kha.’

‘Ka lo en dawn nia. A nih leh aw. Dar a ri a, class ṭan a hun leh tawh. Chibai rawn buk lawk che ka duh mai mai a nia.’

Phone chu ka dah a. ‘Ka hriat loh mi min rawn be ṭhintu ka tih kha a nia,’ tiin Daniel-a chu ka hrilh fiah a. ‘Tun kha a vawi thum min rawn biakna a ni tawh. Dan anga inneihna tifel duh lo mi pakhat nen an cheng dun a. Mahse school a kaltir thung a, chu chu a hmangaihna a tihlan danah hmeichhia chuan a ngai hmiah mai bawk a.’

‘Keini khawpui angah chuan thil mak pawh va ni suh.’ Daniel-a chuan a lo ti charh charh a. ‘Kan Biak Inah ngei pawh hian innei hi kan nei khat khawp mai. Inṭhen a tibuaithlak mai mai an tih vangin mi hian inneih hi an duh lova. Fa tam tak an pawm tawh hnuah Biak Ina inneih te hi chu an duh chauh zel zawk. He’ngah te hi chuan kan nunphung hi i triangle anga fel thlip thlep hi a ni ngai lo. A karah eng eng emaw neuh neuh hi a awm ṭun mai a nia.’

‘Min hrilh chu ka lawm hle mai. Kha nu pawh khan triangle kha a duh lova. A kil zum hian a chhun niin a ngai tlat a ni.’

‘Kei pawh min chhun alawm,’ nui chungin Daniel-a chuan a lo ti ve a.

‘A nih leh i harsatna lam chu hawi leh dawn ta ila. Zaninah thu ka sawi zawh hunah in fate mut hnuah in nu nen zanriah kil ho ila a rem ang em? In pahniha han titipui che u ka duh a ni.’

Chumi zana Maurice-an min rawn hruai dawn chuan nu upa ve tawh tak pakhat hi a rualin a lo kal a. A cherin a te viau mai a, a lu pawh puan varin a khuh vek a. A hmai chuar tawh takah chuan mit pahnih fiah tak an lo lang a.

Chibai min buk a, a ṭawng chu ka thiam ve emaw tih mai turin min bia a. Maurice-a chuan a thusawi chu min lehsak a. ‘Chibai a buk che a, neitu nei lo thil mai mai a nih thu a sawi a nih kha.’

‘I fapa hian nizan ka thusawi chungchang kha a hrilh che em ni?’

A lu a bu nghauh nghauh a, a fapa lam chu a kawk a, ‘Maurice-a pawh hi neih nei lo neitu a nih hi.’

‘Fapa fel tak i nei a nih hi.’

‘Ni e, min enkawl ṭha khawp mai.’

‘Chhuanawm i ti viau ang chu.’

‘Mahse nupui a mamawh alawm. Kei pawhin ka lo enkawlpui thei ang. Hna a thawh vak pawh a ngai lovang. An pahnih tan eirawng pawh ka lo bawl thei ang a.’

Maurice-an a thusawi hnuhnung ber a lehlin hnuah chuan amah chu ka bia a: ‘I nupui chu a hnenah i hruai lut ang a, inchhungah ro la rel turah a inngai a nih hi. Nimina kalsan chungchanga ka thusawi kha fiah fel takin i hrilh a ngai dawn a nih hi. A bik takin choka lam thilah. I nu chu i inah a lo cheng ve a nih pawhin chokaa roreltu chu tu nge tih chiang taka i hriattir a ngai ang.’

‘Chu chu nangmah zawkin hrilhfiah thei la ka ti khawp mai,’ Maurice-a chuan a ti a. ‘I sawi chuan ani pawhin a awih zawk ang. Mak ve deuh chu, kan hmelhriat ni lote thil sawi hi pawm mai a awlsam zawk chang a awm tlat a ni.’

‘Mi zawng zawngte hian “kalsan” hi kan buaipui vek niin ka hria. Mihring finna ni lovin Pathian finna chhuak a ni si a.’

Biak In chu kan thleng leh ta a. An lo khat leh ṭhap tawh mai. Daniel-a kianga pulpit-a ka han din chuan kan thuchah sawi tur chungchangah amah nen chuan inpumkhat fel vek ni hian ka inhria a.

chhunzawm tur