SONAM WANGMO Part 4

Bhutan chu tlangram a ni a, tlang sang tak tak atang hian tui thianghlim tak mai hi a rawn  chhuak thin a. Mi pakhat hian a ram tlang sang fea mi chu min zawrh leh ta tlut tlut mai a. A en turin kan han kal ta a. A ramah chuan chung lam tlang ft.13000 laia sang atanga tui lo chhuak hi a lo haw huau huau mai a. Chu tui chu sumdawn nana chantir theih a nih hi ka ring ta a, chu ram chu ka lei leh ta nge nge a. Chuta tui lo
luang chhuak chu mineral water dik tak hi a lo ni a, Laboratory- ah kan test tir vek a. Market-a Mineral Water a bottle- a kan lei thin hi chu tui naran an ‘treat’ hrep a, a bawlhhlawh zawng zawng an thli fai a. Mahse an thlit fai rual chuan tuia mineral tha zawng zawng kha a inpaih zo leh vek si a, chuvangin chutianga tui an ‘treat’ hnuah chuan mineral kha an thun tha leh a, chu process chu ‘reverse osmosis’ an ti a.
Chutia tui faiah mineral ah dah leh chu bottle- ah an thun a, Market- a Mineral Water kan lei thin ang hi a ni ta a ni. Ka ram leia tui erawh chu bawlhhlawh dang a awm ve miah loh avangin ‘reverse osmosis’ tih ngai lovin a tuia kha bottle- ah thunin a hralh chhuah nghal theih mai a. Market-a hralh tur tui chu a thianghlum tawk tia ‘certified’ vek a ngai a, kan tui chu original mineral ngei nen in mai tura hralh tlak a ni tlat mai a. Tichuan “Living Water of Bhutan Pvt. Ltd” tih Company chu ka din  leh ta a, “SONAM WATER”  hi kan siam leh ta a ni. India ramah hian kan la hralh chiah lo va, Singapore leh Hong Kong lamah chuan kan hralh tawh a, Vanneihthlak tak maiin America rama California a Kristian  Businessman pakhat hian, “US ah Sonam Water chu ka lo import ang a, ka lo hralh ang e,” a ti hlauh mai a.  US ah kan hralh dawn tih hriain Bangladesh a mi pakhat hian ninawm khawpin min rawn zar bawk a. US a thawn tur chuan a
‘packaging’ (a bottle) ber mai hi an duh tui a. Kan thawn hmasak ber chu an hnawl tlat mai a, an duh ang thala kan siam hnuin tunah hian kan shipment chu California-a thleng mek a, mahse Krismas leh Kum Thar vuak vetah hnathawk tur pawh an awm lo va, hralh chiah tur chuan hun a duh deuh mai thei. Bottle siamna tura a ‘pellet’ leh design reng reng hi Ahmedabad ah Company pakhatina min supply a ni. Kan
Company hminga ‘Living Water’ kan tihna chhan i hre mai em?

Chanchintha Johana ziak Bung 4:10 ah hian Lal Isuan ” tui nung” ( living water) a nih thu a sawi a. Hetia tui hralh tur kan buatsaih lai hian he chang hi ka rikru- ah a awm reng a. Mahse chu chu ‘ brand name’  atan a tih theih si lo va, kan company hmingah chuan “Living Water of Bhutan” kan ti ta a, mahse ka tih chhan tak zawk chu Lal Isua, tui nung hi a ni a. Mi tam tak hian kan tui hralh chhuah chungchangah hian, a
brand name-ah ‘SONAM WATER’ tih hmang mah ila ” Enge  Living Water in tih nachhan? ” ti hian min zawt thin a. Lal Isua leh Samari hmeichhe inbiak chungchang leh Lal Isua hi tui nung chu a ni ber zawk tia sawina remchang a ni thin. Hna a tam hle a, achang chuan ka tisual ta em ni tih rum rum changte ka nei thin a, mahse Pathian hnena ka tawngtai hian ka kalna tur kawng hi min kawhhmuh leh thin a ni.

TLANGKAWMNA
Sonam Wangmo chanchin tlem te, ni hnih khat lek a lo zin laia min hrilh  te ka han sawi thuak thuak a. Amah Pathian mi tak leh a rinna hi  a nun leh hnathawha tilangtu a ni hian min tilawm em em a, a chanchin tlem te lo chhiartute pawhin chu chu in hre thei maiin ka ring. Tirhkoh Paulan in awmdan chu Krista chanchin tha nen inmawi phawt rawh se ( Phil 1:27) a tih hi Sonam-i chungchangah hian a dik hlein ka hria. Hna hi a ngah em em a, mahse thawhpui tha tak tak a nei ni hian a lang a, mi ho vel a thiamin amah an zah a, a bula thawh nuam an ti niin a lang. Chu bakah Sonam-i hian sum umin hna hi a thawk lo tih hi a lang reng mai a, amah hi mi thilphal tak a ni a. An rama Pathian rawngbawltu tam tak hi a tanpuina dawng tawh leh dawng mek, dawng zel te an niin a lang. Keipawh mi pakhat rawngbawl tura inbuatsaih hi i rawn pui thei lawm ni ka han ti a, ihe lovin thei lutuk ang a rawn ti nghal mai a ni. Tuna a
Hotel leh Tours & Treks, Sonam Water a tihna zawng zawng pawh hi mi dang puih a duh vang hi a lo ni ber zawk a.

Bhutanah hian mi naran tan eizawnna hi a vang em em a, an ram a tlangram chhengchhe si a, buh leh bal, thlai leh thei lam te han tih tak tak hi a theih loh va. Chuvang chuan Bhutan atang hian mi an pem chhuak nasa em em a. Tunah hian mihring  hi nuai sarih ( 7 lakhs) vel zet awma chhiar a ni a, a nihna takah chuan mi nuai 5 vel chauh an awm hian an ring a ni. Chuvangin Sonam hian tuten emaw inhlawhna an lo neih ve hi a ngaihtuah em em a. Tuna a hna inchhawp mek pawh hi a tam tham hle a. Hemi bakah hian tunah tak hian Thimphu khawpui-ah hian in lian tak a sa mek bawk a. A Ground Level leh First Floor chu Mall tur a ni a, chumi chungah chuan chhawng hnih a la awm ang a, chutah chuan Hotel Room 18 awm thei tur a buatsaih bawk a, luah theihin a la peih chiah lo a ni. Amah hian sum tam tak a mamawh lo va, a fanu leh a pasal, an fate naupang te te kum 6 mi leh thla 10 mi chauh nen an ni mai a. A pasal Suvarna fapa lo neih pawh mahnia khawsa thei leh intodelh tak a ni bawk a. Mahse kan sawi tawh ang hian heng business a tih
zarah hian mi tam takten eizawnna lo hmu ve se tih hi a duh a ni. Pathianin rem a tih chuan tun kum thar thal laiah hian han tlawh chhuah ngei kan tum ang. Ani pawh hian hetia kan han in hre thar leh hi a lawm ve em em a ni. Kan Pathian hi “God of second chance” an tih thin hi a lo ni em em a, a hnen atanga lo
kal bo te pawh hi a hnenah a rawn hruaikir leh thin a. Chu chu Sanam- i nunah hian a chiang em em a ni. Keini pawh, mahni emaw, kan hmangaihte emaw, Pathian hlata awm mek te pawh hi Lalpan ‘second chance’ min pe duh a, chu ‘chance’ chu bawh pelh lovin a hnen i pan thuai ang u. 

Lalchuangliana
New Delhi , 2 January 2023