Tiam Tlat E (I Married You) III — Walter Trobish*

III

Tukverh lam chu panin ka va dak chhuak a. Ka room chu a chhawng linaah a awm avangin ṭhenawm building chungte chu ka hmu thei vek a. Thlawhna aṭang pawh khan ka hmu thei hlawm a. Tunah chuan ka hmu hnai hlawm tawh khawp mai. He’ng ang pakhat hnuaiah hian ka awm, ka ti rilru a. A chungah ni lo vin a hnuaiah.

Ka inbual thlan dai a, ka inthlak bawk a. Tichuan ka briefcase aṭangin ka thusawi hmasak ber tur ziakna lehkha chu ka la chhuak a, dawhkanah chuan ka han chap darh a.

Han chhiar ngial ka tum pawhin ka rilruah thu an sawi thei lo.

Tichuan phone a rawn ri ral ral a. Hotel lama thawkte niin, ‘Lo nghak lawk rawh, be duh che an awm,’ a rawn ti a. Hmeichhe aw hian ka hming sawiin ka nih leh nih loh min rawn zawt a.

‘Chanchinbu aṭangin zaninah inneihna chungchang i sawi dawn tih ka lo hria a. A dik em?’

‘Aw dik e.’

‘Zawhna pakhat zawh che ka duh a. Pasal ṭhen hrim hrim hi sual a ni vek em?’

‘Zawhna mak tak a ni!’ ka ti rilru a, tichuan, ‘Eng vangin nge ṭhen i duh a?’ tiin ka zawt a.

‘Min nei duh lo alawm.’

‘I pasal emaw ka tia.’

‘Kan inkawl reng tawh a. “Kan inkawl tawh ber chuan ka nei tawh che tihna a ni mai alawm” a ti tlat a. Min nei duh tak tak si lo va. Inneih hi chu min tiam ve reng ṭhin nain a hun a sawn hla zel a. Chu vangin pasal nei, nei si lo ka ni ber mai. Awm dan tur pawh ka hre zozai lo. Inneihna hi a eng ber hian nge ti inneihna le?’

‘Eng chen nge in inkawl tawh a?’

‘Kum khat chuang chu a ni tawh ang.’

‘Fa in nei em?’

‘Nei lo, a duh tlat lo va.’

An buaina tur chu ka mitthla thiam mai.

‘Ka chungah chuan a ṭha khawp mai. Ka zirna man te a tum a. Zingah sikul thlengin min hruai a, zan lamah min rawn lam leh a,’ a ti a.

‘Sikulah a hruai che maw? Kum engzat nge i nih a?’

‘Kum sawmhnih leh pahnih ka nia. Ka nu leh paten zirna ṭha min pe thei lo va. Tunah upat lamah ka bei ṭha leh a nih hi.’

‘I nu leh pate chu khawiah nge an awm?’

‘Helai aṭanga mel za tam taka hla khaw te reuh teah an awm.’

‘I nu leh pate hnenah chuan hawsan leh daih rih a, inneih hma chu kir leh tawh loh dante a awm lo’m ni?’

‘Teuh lo mai. Kan inkawl aṭang khan ka nu leh pate chuan min hnawtchhuak daih alawm. An duh lo va amah hi.’

‘Engati nge an duh loh a?’

‘Amah chu European mi a nia.’

Chu chuan thil tam tak a tifiah: sum a nei a, fa neih a duh lo va, nupui anga kawl theih tur hmeichhia a duh te thlengin.

‘A nih chuan i dinhmun a khirhkhan angreng hle mai. Hotel-ah hian min hmu turin i lo kal thei ang em?’

‘Thei lo, a phal teuh lo mai. Keimaha ka chhuah hrim hrim hi a phal ngai lo.’

‘A nih chuan ani pawh chu lo hruai mai la.’

A nui tawp a. ‘A lo kal duh teuh lo mai.’

‘Zanina ka thusawinaah i lo kal thei ang em?’

‘Zanin hian class ka nei dawn a. Bakah eng Biak Inah mah ka kal hi a duh lo hrim hrim.’

‘A nih chuan kar tawpah eng nge i tih ṭhin a?’

‘Inah ka awm tawp. A chhuah lahin kawngka min kalh hnan daih zel a.’

‘Khawiah nge a kal ṭhin a?’

‘Ka hre lo. Min hrilh ngai lo hrim hrim.’

Sawi tur pawh ka hre tawh lo. Tichuan a rawn ṭawng leh a.

‘Pastor, eng nge ka tih ang? Eng nge ka tih theih?’

Zawhna hlun tawh tak bawk kha a ni e. ‘Ka hre lo, ka hre bik lo tak zet,’ ka ti tawp a.

‘Min ṭawngṭaipui thei tal ang em?’

‘Ṭawngṭai a? Kristian em ni i nih a?’

Chu zawhna chu ka zawh rualin ka inchhir leh nghal a. Eng nge maw lem chuang ang ni? Min rawn chhang leh a.

‘Ni lo ve. Ka nu leh pate chu Muslim an nia. Mahse kei hi Kristian sikulah ka kal ṭhin a. Kan khuaah khan sikul dang awm hek lo.’

Ṭawngṭai! Ka zep lo, vawi khat mah telephone-ah hian ka la ṭawngṭai ngai lo, mi ka la hmuh ngai hauh loh nen ngat phei chuan ka la ṭawngṭai ngai lo lehzual.

Heti hian ka ngaihtuah ta a, Engah nge ka ṭawngṭai mai loh ang? Ani ka hriat leh hriat loh kha eng nge lem chuang? Pathian chuan kei mi hmuh leh hriat ang thovin ani chu a hmuin a hre dawn lo em ni? He hotel room-ah hian kan inhmu thei lo a nih pawhin Pathianah chuan kan inhmu thei dawn lo’m ni?

Tichuan ka ṭawngṭai ta a. A buaina chinfel dan tur ka hre lo tih ka sawi a. Pathian chu a chinfel dan tur min kawhhmuh turin ka sawm ta ngawt mai a. ‘Amen’ ka tih chuan phone chu kan dah ta a.

Chhunzawm tur

---

Walter Trobisch (1923-1979) leh a nupui Ingrid (Hult) Trobisch (1926-2007) te hi Cameroon (Africa)-ah missionary hna an thawk ṭhin a, chhungkaw nun chungchang counsellor an ni bawk. Kum 1952 khan an innei a, kum 1953 ah Cameroon hmar lama Tchollire khuaah rawngbawlna bul an ṭan a ni. Kum 1957 ah Libamba khuaa Cameroon Christian College-ah sawn an ni a, hetah hian Walter Trobisch chuan German ṭawng bakah Bible a zirtir a, campus pastor hna a chelh pah bawk. Zirlai upa lamte tan sex leh inneihna chungchang zirna class a pe bawk ṭhin a, kum 1962 khan I Loved a Girl tih lehkhabu a tichhuak ta nghe nghe a, he lehkhabu hi African Kristian tleirawl pahnih thuk taka lo inngaizawngte nen lehkha an inthawnna behchhana a ziak a ni. He lehkhabu hi hralh a tla viau a, lehkhabu dang pawh a ziak ta zel a. Chhungkaw nun chungchanga thurawn dilna an dawn tam tak em avangin Trobisch te chhungkua chuan kum 1963 khan Cameroon chhuahsanin Austria lamah an pem a. Hetah hian Family Life Mission chu dinin khawvel pumah seminar te neiin rawng an bawl a, hei bakah hian lehkhathawn hmangin counselling an kalpui reng bawk. Walter-a a boral hnuin Ingrid Trobisch chu Springfield, Missouri-a an chhungkaw inah a kir leh a, thuziak leh thusawi rawngbawlna a la chhunzawm ta zel a ni.