CHE CHHIA (Fr. faux pas – foh pah)- Lalchuangliana

Social Media kan ti a, chanchin hre hmasa leh thehdarhtu hmasa nih duhna lamah chet chhiat chang a awm zauh zauh. Mi dam lote kan lo thih tir ngawt a, Hospitalah a kal an tih chuan ICU- ah kan lo admit leh der bawk thin!

Tum khat chu ka che chhe khawp a. Kan Office-ah thian pakhat a lo lut a, mi pakhat (a hming chu sawi lo mai ila) Chennai-a a thih thu a sawi a. Chu mi hming ang chiah pu, mahse an First Name inang lo, kan Biak ina inkhawm thin hi a awm a. Amah ka hre chiang lutuk lo va, mahse an hming hi South Indian hming dangdai deuh, Bengali hming ang deuh a nih vang hian ka hre reng a, an first name lam kha ka lo bel lutuk lo va. Kan Kohhran Committee naah kan Kohhrana lawi thin ka hriat zawk chu a thi niin ka sawi a, keipawh chuan pawi ka ti khawp a.

A tuk Sunday inkhawmah (kei ka inkhawm lova) kan Pastor chuan kan member thin chu a thi tia sawiin  a chhungte tan tawngtaina te a hlan a. A thi emaw ka tih nu kha a lo inkhawm ve niin. Banah chuan Pastor chu a chhuahchhal ta a, “Khawi lama i hriat nge ni? Ka fapa hi a thi lo reng reng. Tunge thi tia lo sawitu chu?” a ti a, a thin a rim hle mai a. Pastor chuan, “Lalchuangliana sawi ka hriat a ni,” a ti a, ngaihdamte a dil a.

Zanah Pastor chuan min rawn phone ta a, keipawh chuan a ngaihna ka hre lo hle mai a. Office- a lo leng kan thianpa kha ka va zawt leh a, surname in ang, an first name in ang lo, keiin ka lo hre sual nasa mai kha a lo ni a. Kan Pastor hnenah chuan naktukah a nu hnenah kala ngaihdam dil tur a nih chu ka ti a. A tuk Monday lunch-break lai chuan kan Pastor nen a Office-ah chuan kan va kal ta a. Ani pawh a lo inngaihtuah thawl leh tawh a ni ang chu- “Keima hriat sual leh tih dikloh a ni, ka hriat tirh khan keipawh min shock deuh va, dilchhutin ka lo zawt chiang lo a ni, min ngaidam rawh,” ka han tih chuan, “Oh, forget it. I know it was a mistake,” a ti a. Kan Pastor chuan tha deuhin tawngtaina a hmang a, tumah rilru na lovin kan awm leh ta a.

Hetiang tihsual palh hi chu a awm fo va, eng ang pawhin fimkhur ila, tih palh hi a awm leh thin. Hetah hian a pawimawh ta ber chu a tisualtu hian insawithiam tum lovin ngaihdam hi dil mai ila a tha berin ka hria. Thu fel takin a tawp mai.