BEAUTY LIES IN THE EYE- Lalchuangliana

Mizo tawngin Saptawng ‘beauty’ tih hi han dah dawn teh? ‘Beautiful flower’ chu ‘pangpar mawi’  kan ti a, beautiful girl’ chu ‘nula mawi’ kan ti ngai lova, ‘nula hmeltha’ kan ti daih si a. Kan College kal laiin John Keats- an ‘beauty is truth, truth beauty’ a tih kan han zir ve ngawt te chu a ngaihna hi ka hre phak lo reng reng a. “Beauty is an attitude,”  “Beauty is what you are inside” etc – Thangkura thu hla ang maiin, ‘ka hre thiam chuang lo reng reng’ tih mai tur a ni. Chutah “Beauty lies in the eye of the beholder” – a thlirtu mit a zir a ni te an la ti ta deuh deuh va.

‘Beauty’ tih chu Mizo tawngin ka dah thiam lo ni phawt mai se, ‘beauty’ tiin dah zel phawt mai ila. Ti hian ka ngaihtuah ta a, ‘beauty’ chu mitah hian a ni (beauty lies in the eye). Tlangval kan nih chuan nulain ding taka ral deuhah pawh mit la miah lova min en kal chuan chu nula chu hmeltha ta hliah hliah hian kan hmu a, dawih deuh chuan kan mit kan la vut mai a ni. Chutiang bawk chuan nulate pawh tlangvalin khaw dang hawi hlek lova a han thlir kar chuan an mawih nghal siah siah mai a ni. Thil dang  thlir thlir chiam lovin mitah hian ‘beauty’ chu kan zu chhar mai a ni. Hmel nui sang mai (smiling face) te hi hmuhnawm ti lo kan awm lo vang, mahse an hmai a nui a ni lo va, an mit kha a nui a ni zawk. Mi huaisente chu an au thawmah mi huaisen an nih kan hre lo va, an mitah an huisenzia kan hmu thin a ni. Mi daw thei hi an mit meng atangin rin tlak an ni lo tih a hriat theih. Thu kan hrilh laia min en ngam lo chu thutak hrilh tlakah kan ngai lo. An thu tha leh ngaihnawm kan tih chu mit la lek lovin kan en a, kan ngaithla kar thin a nih hi.

Kan taksa bung hrang hrang hian anmahni mai hian min lo mawi zo hauh lo va, mit erawh hi chu min mawitu hi a lo ni hliah hliah a. Khawchhak lam mi Japheta thlah ho hi kan mit a zim tlangpui avang hian hmeltha tak hi kan tam lo va, Hama thlah Africa ram mite khu an mit a pherh avangin hmeltha tih tur an tam lo hle bawk. Shema thlah, Aryan mite hi an mit a lian a, an meng fel  tlangpui a, hmeltha tak ni hian kan hmu thuai mai a ni. An zinga mit meng zim deuh leh meng pherh chu ‘beautiful’, ‘handsome’ kan ti ngai lo.

Tun lai chu Trump-a te ang ‘mask’  hmang tha duh lo an nih loh chuan tumah hi an hmel hmai hmuh tur hi an awm lo va. Mahse  an hnar khuha ‘mask’ vuah hi han thlir ila, mit lian meng kalh mai hi an ngaihzawn awm nghal mai a ni. Chuvang chuan ‘beauty lies in the eye’ tih hi a lo dik ta ber awm e!

Suangtuahna a kal zel a. Lal Isua nen inhmatawnin kan lo inkawm a. A mit ka han en chuan keimah zawk hian ka nihna tak ka hrechhuak a. Joba’n, “… ka mitin a hmu che a, keimah ka inten a..” a tih te kha ka hrechhuak a. Lal Isua mit ka han en chuan min lo ten reng reng lo va, hmangaihna tawp nei lo, khawngaihna mak, mawi leh duhawm, lainatna, thutak, rinawmna, chatuan mi nihna ka hmu a, thil tha leh mawi nia ka hriat zawng zawng hi a mitah chuan ka hmu a. Ani chuan, “Min ring tlattute tanpui tur hian khawvel pumpuiah ka mit hi ka len ruai ruai thin,” tiin min hrilh a. Lalpa mit meng mawi leh a hmel ka hmu a, ka lung a awi ta.