Tirhkohte Thiltih Zirlai 11-na. Tirhkohte 2:22-24 –Dr. A. Zothansanga

TIRHKOHTE 2:22-24 MIZCLBSI

Nangni Israel mite u, ngaithla teh u; in hriat ṭheuh angin Pathianin Nazaret Isua hmangin thil ropui tak tak te, thil mak te leh chhinchhiahna te in zîngah ngei tiin a mi ruat a nihzia chiang takin a tihlan kha. [23] Ani chu Pathian tum lâwk leh rêl lâwk angin in hnênah pêk a ni a. Nangnin hnam dang mite hmangin krawsah in khêngbet a, in tihlum a. [24] Nimahsela, ani chu thihna chelh hlen rual a nih loh avângin Pathian chuan thihna phuarnate chu a phelh a, a kaitho ta a.

Sawi Zauna : Petera hian ni hnuhnunga Pathian thiltih tur zawlnei Joela lo hril lawk a sawi a (2:17-21).  Chu Pathian thil tum chu Isua hmanga  hlen chhuah a lo ni ta, tiin a sawi chhunzawm ta a ni. Hei hi chanchin tha laimu chu a ni: Isua hi tunge a nih, enge a tih, a hnathawhin enge a hlen chhuah? tih hi. An sawi thin; Christianity hi tih tur bik enge maw nei pawl, awm dan tur, tih dan bik neihna, sakhua a ni lo va, Isua hi a ni. (Christianity is not a religion, it is a person; Jesus Christ.)  

Sual thuin bul tan a ni lo va, mi fel tluantling kan awm lo va, Pathian anchhe dawng vek kan ni, tih hi a bul a ni hek lo. A nihna takah chuan kan dik loh zia leh tlin loh zia hi Pathian mi lo chuan a hmu fiah tak tak thei lo. Pathian Thu hian kan fel lohna leh tlin loh zia a hai lang a, Isua kan mamawh zia min hrilh thin zawk a ni. Isua hi Pathian ruat a ni tih a sawi ta zawk a ni. Heta a tawngkam hman hi ordained tih leh accredited by God tih a ni. Pathianin Isua inhlanna a pawm hi a pawimawh lai tak a ni. Thil engkimah min ruattu, min pawmtu, i tling e, min ti tu hi an pawimawh thin khawp mai. Zirtirtu ten min fak a, kan chhanna an pawm ringawt pawh hi a nuam a nia. Isua hi a ruattu leh a hnathawh, a inhlanna pawmtu, credit petu chu Pathian a ni.

Isua krawsa khenbeh a tihhlum a nih kha Pathian lo rel lawk vek a ni. Dik lo taka hek a, sualna nei lo thiam loh chan tir a, mi sualte tih hlum a a awm kha Pathian Thu a thlen dikna, Pathian thil tum hlenchhuahna a ni reng si a. ‘Nimahsela, ani chu thihna chelh hlen rual a nih loh avângin Pathian chuan thihna phuarnate chu a phelh a, a kaitho ta a,’ tih a ni. Isua kaihthawh a nihna chhan kha, Pathian Fapa, engkim tithei a nihna hrim hrim lam aiin a thihna, mihringte chhandam tura a inhlanna vang a ni. Thihna ata kaihthawh a nihna hian a thihna hlut zia leh pawimawh zia, a inhlanna Pathianin a pawm zia a nemnghet a ni. Isua hi Pathian tum, a ruat leh pawm chu a ni tih chhinchhiahna a ni. Mi dang, thil dang engmah Pathian anchhia laka min chhandam thei an awm lo. Sum hian thil tam tak lakah min humin min chhan chhuak thei. Mahsa Pathian hmaa thiam min chan tir theitu chu Isua chauh hi a ni. Chu mi nemnghettu chu a thawhlehna hi a ni.

Ngaihtuah atan:

18. Isua chunga Pathian hnathawh leh mihringte thil tih tar lante hi engte nge, enge a pawimawhna? Dik lo taka mihringte chetna Pathian thil tum lan chhuahna lo ni reng si enge maw thil hriat i nei em?

19. Tun tuma kan thu chhiar atang hian Pathian chungchang, a hnathawh dan engte nge i zir chhuah? Pathian hnathawh dan i hriatthiam dan leh a thu, Bible a inziak i chhiar hi a in mil em?

20. Tu pawm atan nge thil i tih thin, tu faknain nge ti lawm thin che?