Unsung Hero – Dr. KL Biakchungnunga

UNSUNG HERO[1]

• Dr. KL Biakchungnunga

(Thu lakna : 28^th August 2011, Thalaite Thian)

Kan thupui ‘Unsung Hero’ tih hi Mizo tawng chuan, ‘Fak hlawh lo pasaltha’ tihna a ni âwm e. Fak hlawh lo tih takah, miin sermon-a an sawi ka la hre miah lo. Bible-ah pawh hmun khatah chiah a chanchin kan hmu. A chanchin thui tak kan hre lo nâ a, kan hmuh chhun erawh hi chuan belhchian a dâwl khawp mai. Tirhkohte Thiltih 9:10-19-ah a chanchin hi kan hmu a, a hming chu Anania a ni.

Damaska dâiah Paula kha êngin a chhun thlù a, a mitin khua a hmu lo zui ta a nih kha. A mit a vâr leh theih nân, mi pakhat, a hming Anania a rawn kal ang a, a lu chungah kut nghatin a tawngtaisak dâwn tih Pathianin Paula hi a hriattir tih kan hmu. Hetianga Paula hriattir a nih lai hian, Anania erawh hi chuan a tih tûr hi a la hre miah lo. Hei tak hi a ni, Anania ropuina thurûk chu. Amah Anania be-râwn hmasa miah lovin, Pathianin Paula hnênah a lu chunga kut nghata tawngtai türin a rawn kal dâwn tih huai takin a hrilhlâwk diam a ni. Anania hian ti tura a hrilh apiang chu a ti ngei ngei dâwn tih Pathian hian a hre chiang hle tihna a ni. Hrilhlâwk a nih ang chiahin, Anania hian Paula hi a tawngtaisak a, a mit a lo vâr leh ta a ni.

Pathian hian tuemaw hnênah, “Biakchungnunga a rawn kal ang a, Pathian thû a rawn hrilh che ang a, a rawn tawngtai sak ang che, ,” tin a hrilhlâwk ve ngam ang em? Ti tura min hrilh hnial chûng, Pathian min tirhnaa kal duh lo fo thin ka nih chuan, Pathian meuh pawhin ka tih tûr hi a sawi lâwk ngam lo mai thei a ni. Ringtu tam tak hi chu, Pathianin ti tura min hrilh tih duh loh chûng, phùr chânga tỉ, phûr loh huna ti lo, mood fuh châng leh mood off châng nei kan ni fur mai thei. Anania ang hi Pathianin a mamawh a ni.

Kan vêng Sêrkâwnah khian, rawngbawlnaa ka hruai thin Pu Nunmâwia a awm a. Anania ang hi a ni. Kut hnathawka ei zawng a ni a, nupui fanau nei a ni. Amah hrilh hmasa lovin, ka chhûngte hnênah, “Pu Nunmawia nên kan kal ang,” tin ka sawi lâwk fo. Ka sawi lâwk sual ngâi lo. Inhlawhfâkna tha tak a hmuh lai pawh ni se, tihtakzeta ka mamawh thû ka hrilh chuan, a hna thawh lai kalsanin, min zui leh ngê ngê thin. Keimah chang ni lovin rawngbawltu dang pawhin an sâwm chuan, a hna tûl kalsanin, a zui thei deuh zêl a ni.

Gospel singer-Pensy leh Bethsy ka ngaihsânna chhan pawh, program dang pawimawh tak an nei a nih loh chuan, rawngbawlnaa min tawiâwm tura ka sâwma min zui thei zêl thin kha a ni. Khawpui leh thingtlâng an thliar hrang lo. Hetiang mi, kan mamawh huna min phatsan ngai lotu, tawngchhan ngam, vâuchher ngam, a tha zâwnga ‘predictable’ te hi mihring leh Pathian tân an va hlu êm!

[1] Upa Dr. KL Biakchungnunga hi April 23th 1964 ah Rev. KL Vanngaia leh Pi Tlangmawii te inkarah a piang a. Zirnaah hian a graduate hnu-ah Pathian thu lamah pawh sulhnu neiin M.Div a zir zo va, M.A, M.Phil tha taka a zawh hnuah Ph.D pawh tha takin a zo leh a ni. Kum 1996 atangin Baptist Higher Secondary School (BHSS) ah Mizo subject a zirtir a, kum 2003-2008 chhungin Headmaster hna a chelh bawk. A lehkhabu chhuah te zinga mi hriat hlawh zual chu ‘Point of view – Volume I,II,III’ te an  ni.