LERSIA SEPUI  CHI THA

Thil tha tak leh mi tha tak hriat fuh loh hi a awm fo thin. Liandovate khua chuan Lersia an hai a,  Liandovate unauin mi an khawngaih theih avangin malsawmna an dawng. Lersia sepui tha ber chu te tak te, kelpui tiat lek, berh chip chep a ni. Tuaisiala chuan a it thlawt lo. Mahse thla tina no nei, sial lian pui pui thlahtu a ni. Buizova zai thiam  chu a nu pawhin a zai a han hriat chuan, “Min duh ve tak tak lo vang a,” a ti ! A hmel erawh chuti hlauh. Tuikeplung (pearl) hi a mawi hle a, a lo chhuahna chu tuikep  ti hrep hrup,  phar ang mai a ni. Isaac Watts hi Kristiante hla tha ber ber – “Isua kraws mak tak chungah,” tih te, “Khawvel lawm nan a lo kal a,” tih te phuahtu a  ni a, thu pawh thiam tak a ni. A hmel erawh a chhe hle a. Nula hmeltha deuh Elizabeth Singer hian a thiamna hi a ngaisang em em a, Isaac Watts chuan a nupui turin a be ta a. Elizabeth chuan, “Heng thil hlu leh mawi hi a dahkhawmna bawm hian han zir deuh se aw!” a ti ringawt a. Isaac Watts hian nupui a nei lo hlen.

Hetia thil hlutna hre lo, a hmel ringawta hnawl mai thinte hi kan dem mai thei a. Mahse heti zawng hian ngaihtuah ve ila. Pathian ropuizia hriatna eng leh thiltihtheihna chu keimahni hnena mi ni lovin Pathian ta a nih theih zawkna turin chu ro chu hlum belah te kan vawng a ni, tiin Paulan a sawi a. (2 Kor. 4:6,7) Hlum bel hi a pawimawh tih lam aiin a chhunga ro hi a hlutzia a sawina a ni a, a awmna hi hlum bel mai a nih vang hian miin an hai thin a ni. Chanchin Tha, Pathian thiltihtheihna hi engatinge mi hian an ngaihsak loh va an beng khawn loh tih hi ngaihtuah ila, a chhan chu keini ringtute  hi kan hmel that loh em vang hi a ni thei mai lawng maw? Sawina pakhatah chuan, “The worst advertisement for Socialism and Christianity is their  adherents,” tih a ni. Socialism leh Kristianna hmai  tibal ber tu chu a memberte hi an ni, tihna a ni awm e. Mizoramah hnam dang mi lian deuh awm thinte hian kan kristiannaah hian kan pawn lam hmelah ngaihno beina an hmuh loh avangin a chhunga ro hlu hi an hmu thin lo em ni ang le? Mahatma Gandhi-in, ” I like Christ but I do not like Christians” a tih khan keini ringtute hian  Krista hmel mawina kan lo hliah thin em ni ang?

Duhthusamah chuan Lersia sepui tha kha lian pui ni se chu Tuaisiala pawh khan a iai bik lo tur!  Lal Isua mawina hi engtinnge keimah niah a lan chhuah ang le?