LALPA INAH TUNGE LO LUT ANG? (Identification Effect) – Lalchuangliana

Kohhran changtlung tak an ni a, an Biak in pawh a thianghlimin a zahawm hle. Chawlhini  inkhawmah chuan thawmhnaw mawi leh tha ber ber an inbel a, mipa pavalai chung chuan kawrchung emaw, suit emaw, nghawngawrh inhmeh takin an inthuam vek a, hmeichhia pawh an nalh thei khawp mai. Biak in timawi tura thawmhnaw tha leh mawi inbel hi a pawimawhzia pulpit atang pawhin an sawi fo thin.  An Biak in kawngkapui bulah chuan an Upa min, ‘pin-striped suit’ a inchei ngat, sam var vau tawh hi, mi lo lawm tur hian a duty thin a. Inchei thlahdah ngai thei lo tak a ni. (Chutiang deuh biak inah chuan keipawh America ramah ka inkhawm tawh – suit ka lo keng ve hlauh a, hnawk ka ti viau a,  kha mi ni erawh kha chuan ka lo keng lo vang tih ka hlau hle).

Bill-a chu chhungkaw rethei tak atanga lo chhuak a ni a. Inhlawhfa chungin lehkha a zir ve a, kekawr Jean tet phung tawh hi a ha reng a, pheikhawk pawh hlui chhe tak, bal leh rimchhiat hmel deuh hi a bun chawt bawk a. Tum khat chu an College- ah thalai hovin Gospel Campaign an rawn nei a, Bill- an Lal Isua chanchin a hriat chuan a piangthar hlawl mai a. Biak in lian taka Kristian dangte zinga inkhawm chu a chak
e ta em em mai a. Chawlhni a lo thlen chuan kan sawi Biak In hi Bill-a chuan a rawn hmu a, inkhawm
ve tumin a lut ve ta a. Inkhawm an lo tan dawn tawh a, thutna pawh a lo awm tawh lo va. A lo lut an han hmuh chuan thutna han ken hram kha tumahin an tum lo va. An hnar an hup a, an hmel a ner hle hlawm a. Bill-a chuan thutna a hmu ta si lo va, a hma lamah a lo kal zel a, mi tih dan a ni em tih pawh ngaihtuah lo chuan Pulpit zawn chhuat laiah chuan a ke khekhawrhin a zu thu ta ngawt a. Chutah le kawngka bula
an Upa min kha tiang hawlin,  a hma lam chu a rawn pan ta chhat chhat mai a. Midangte chuan an rilruin an upa min chuan chu tlangval chu a zu hnawtchhuak ngei dawn a ni ang an ti rilru a, an lo thlir thap mai a. An upa chu tlangval Bill-a bul chu a lo thleng a, harsa takin a kun a, a tiang chu leiah a dah a, Bill-a bul setah chuan a zuk thusawp ve ta nuaih mai a.

A bula nu pakhat chu a rawn inhnit ta fuih fuih a, a kianga mi dangte pawh chuan rawmawl an phawrh a, a then an tap chhuak bawk, an buai chhe titih ta mai.  Pa hote pawh chu an kun lup mai a. Chutah an Pastor a lo ding chhuak a, “Vawiinah hian sermon dang sawi pawh a ngai lo ve. Sawi pawh ni ila ka thusawi chu in hre reng lo ang a, in thil hmuh erawh hi chu in theihnghilh leh tawh ngai lo vang,” a rawn ti a.

Kan lawina biak inah hian mi thar lo tel ve duh, ‘Inkhawm puan ka lo keng si lo va,’ tia rawn inkhawm thlahrung tlat hi ka hre fo mai. Lalpa ina lut tur hian ‘inkhawm puan’ neih kher hi a lo tul em ni le? Lalpa inah tunge lo lut ang?