WORRY – LUNGKHAMNA ?

Saptawnga ‘worry’ tih hi kan Bible-ah hian ‘lungkham’ tia dah a ni deuh ber a, mahse ‘lungngaih puia neih’ tih deuh duah hi a ni ber zawk awm e. Fiamthu deuhin mi pakhat chanchin an sawi a. Chu mi chuan lungkham hi a ngah em em a, a nui ngai lo va, a kun tlawk tlawk reng mai a. A thianten hnem an tum pawhin an thu a ngaithla duh lo va. Ni khat chu a lo hlim em em a, a lo nui hawk hawk mai a. A thiante chuan engtizia nge nia engtinnge i tih tiin an zawt a. Ani chuan, “Ka lungkham zawng zawng hi min chhawk turin mi pakhat  thla tin cheng sanghnih pek turin  ka ruai a, engmah lungkham ka nei tawh lo,” a ti a. A thiante chuan, “Pawisa pakhat mah i nei si lova, Rs 2000 chu khawi lama mi nge i pek ang?” an ti a. Ani chuan, “Chu chu amahin a lungkham ve tawh mai ang chu,” a ti then a.

Lungkham hi kan buaipui hauh loh tura Pathian ruat a ni a, chuvangin, “Lungkham suh u,” min ti tawk tawk a ni. Lungkham hi naktuk lama thil lo thleng tur kan hriat si loh, tul lova a man kan lo pek lawk thlawn mai a ni an ti bawk thin. Lal Isuan, “Chutichuan a tuk atan lungkham suh u, a tuk chuan ama tan a lungkham chawp dawn si a,” a ti (Mat.6:34) US Senate Chaplain hlui Peter Marshall chuan a tawngtaiin tihian a chham a. “Lalpa, lungkhamna sual lakah hian min chhandam la. Chuti lo chu pumpui na te hi nangmah ka rin ngam lohzia tilangtu a ni dah ang e,” tiin. Keini pawh hei hi kan tawngtaina lo ni ve rawh se.