BAN I PHAR NGAM ANG EM? – Lalchuangliana

Kan fate zinga a naupang ber hian America rama lehkha zir a chak ve tlat mai a, nei leh nei lovin, thiante min puihna leh puk chawpin, scholarship a hmuh ve nual te nen America rama College tha ber pawla an sawi, St Olaf College, Northfield, Minnesota- ah a lut ve rawih a. He College  zaipawl tha tak mai ‘St. Olaf Choir’ an tih chu an hmingthan phah hle a ni.

He zaipawla tel tur hian zai thiam ringawt an thlang lo va, midangte nena aw inrem, zai ho thiam tur hi an thlang a. Tin a tir atangin zaipawla tel tur reng reng chu, an zaipawl hi ngaih pawihmawh hmasak bera nei reng turin an ti bawk a. Hla zir leh ‘rehearsal’ te an ngai pawimawh em em a ni.

An han zai chhin a, rehearsal an neih hian, an zinga tupawhin lo tisual palh se, Conductor in a rawn man lo va, amah a tisualtu zawk khan kut a rawn phar a, ‘Ka tisual a ni,’ tiin a rawn inpuang a, Conductor in tih dan tur dik a hrilh thin. Mihringte hian kan thiltih sual emaw, tih dik loh emaw hi thup kan tum char char a.

America ram zaithiam hmingthang R. Kelly an tih chuan kum tam tak chhung hmeichhe tleirawl hi a lo khuai khemin a lo khawih pawi thin a. A thiltih dik lo an sawi pawhin a sum ngah leh hmingthanna chuan a chhilh bo zel a. A tawpa tawpah kum 30 chuang a sual zep a nih hnuin kum 30 lungin tang turin a chung thu rel a ni ta. “In sual chuan a hmu chhuak ngei ngei ang che u,”( Num.32:23) tih hi a dik leh thin. Pathian thuin kan sualte sima thupha kan chawi chuan Lal Isua chu kan sualte ngaidam turin a rinawmin a fel tih min hrilh. (1 Jn.1:9) Engatinge kan tihsual hi thup talh kan tum le?

Mi dang tumahin hre lo mah se i lo tisual a nih chuan ban i phar ngam ang em?

—–
Pu Lalchuangliana hian India sawrkara a hna, IAS bansanin 1973 atang khan North India-ah Missionary in a thawk a. Kum 2025 khan hun puma Missionary hna chu a chawlhsan ve ta a. A nupui Pi Thansangi nen Zotlang, Aizawlah an cheng mek a ni.