TT Zirlai 3-na : Tirhkohte 1:6-11 – Dr. A. Zothansanga

TIRHKOHTE 1:6-11 MIZOVBSI

[9] Tin, chûng thu chu a sawi zawhin an hmuh reng chungin vâna hruai chhohvin a awm a; tin, chhûmin an hmuh phâk lohvah a hruai bo ta a. [10] Tin, a chhoh laia vân lam an en reng laiin mi pahnih, puan vâr sinin an kiangah an lo ding a; [11] chu mite chuan, “Galili rama mite u, engati nge vân lam ena in din reng? He Isua, in hnên ata vâna hruai chhohva a awm hi, vâna a chho in hmu ang bawk hian amah ngei hi a lo kal leh ang,” an ti a.

Sawi zauna: Chhum hi Pathian ropuina, a chenchilhna, shekinah an tih sawi nan hman a ni thin. Israel fate kha thlalerah Pathian presence, chhumin a hruai thin a, temple an hlan tum khan chhumin temple chhung a khat bawk. Vantirhkoh hian zirtirte hi ‘Galili mite u,’ tiin a ko a. Zirtir 12 zingah hian Juda Iskariota tih loh chu Galili mi vek an ni. (A hunlai khan Israel ram kha province pathum a then a ni; Galili, Samaria leh Judai ram kan tihte.) Mi pahnih, puan var sin, a tihte hi vantirhkoh ni a rin an ni. Lalpa lo kal lehna thu hi Thupuan 1:7-ah chuan, ‘Ngai teh u, ani chu chhûmte nên chuan a lo kal dâwn e; mit tinrêngin an hmu ang a, a chhuntute ngei pawh khân; khawvêla hnam zawng zawngin amah an ṭah bawk ang,‘ ti a ziak kan hmu a ni. Hai theih a ni dawn lo tih a chiang a ni. ‘Vana a chho in hmu ang bawkin amah ngei hi a lo kal leh ang,’ tih hian taksa ngeiin a rawn kal leh dawn tih a ti lang bawk.  

Ngaihtuah zui atan:

5. Vana chho in hmuh ang bawk hian amah ngei hi a lo kal leh ang, tih i chhiar hian Isua lo kal lehna chungchangah eng ngaihdan nge a siam che? Isua lo kal leh ngei tur hian a ti thlamuang che nge a ti hlauthawng che, nge i vei em em lo? Isua lo kal leh hi i nghakhlel em, nge lo kal leh lo pawh ni se pawi i ti em em lo?