TT Zirlai 2-na : Tirthkohte 1:6-8

TIRHKOHTE 1:6-8 MIZOVBSI

Tin, anni chuan an rawn inkhâwmin a hnênah, “Lalpa, tûnah em ni Israel-te hnênah ram i pêk leh dâwn?” an ti a, an zâwt a. [7] Tin, ani chuan an hnênah, “Pain a hun leh a ni, ama thû thûa awma a ruat chu, nangni lo hriat tûr a ni lo ve. [8] Nimahsela, Thlarau Thianghlim chu in chunga a lo thlen hunah thiltihtheihna in la nei ang; tichuan, Jerusalem khuaah te, Judai leh Samari ram khaw tinah te, kâwlkil thleng pawhin ka thuhretute in ni ang,” a ti a.

Sawi zauna : Khang hunlaia Juda-ho khan Rom sawrkar atanga chhuah zalena, khawvela lalram din turin Pathian hriakthih, Mesia an beisei a ni. Isua hian chu chu a hlen chhuak ngei dawnin a zirtirte hian an ring niin a lang. Hemi chungchang hi Isuan a hmaa, ‘Thlarau Thianghlim baptisma in chang ang,‘ a tih nen khan an thlunzawm a ni mahna.

Isuan lalram a rawn din tur hi amah zuitu Judate hian khu Israel ram khu emaw an ti niin a lang. An ram lo mitthla dan leh Lalpa rilru, khawvela a rawn kal chhan hi a in persan viau a ni. Juda-ho tan maia lo kal emaw an tih laiin khawvel chhandamtu a nih zia a rawn lang chho dawn a ni. Anmahni thlirna zimte, an buaina ching fel tur maia an beisei laiin Pathian chuan khawvel pum, mi zawng zawng a lo huam reng mai. Ram chu pein lalram a rawn din dawn teh meuh mai, mahse an beisei leh tum aiin a lian dawn a ni! (Tunlai hunah pawh hian thahnem kan ngaihna hi a zim lutukin Pathian rilru kan pawh pha lo em tih hi in en fiah thin a tha khawp mai.)

Chang 8 a, ‘Nimahsela, Thlarau Thianghlim chu in chunga a lo thlen hunah thiltihtheihna in la nei ang; tichuan, Jerusalem khuaah te, Judai leh Samari ram khaw tinah te, kâwlkil thleng pawhin ka thuhretute in ni ang,‘ tih hi Tirhkohte Thiltihin a tarlan tum ber, a theme a ni tiin zirtute chuan an sawi thin. He ta ‘thiltihtheihna’ tih hi dynamite, chak firfiak, vung tak tihna a ni. Lung chang tak pawh dynamite chuan a ti darh vek thei ang hian Pathian thu, chanchin tha hian thinlung sak ber pawh a ti tuiral thei a. He thiltihtheihna, dynamite ang maia chak, Thlarau Thianghlim an chan huna an neih tur hi chanchin tha darhna tura Isua thuhretu, a witness an nihna kawngah a thawk dawn a ni. Thlarau Thianghlim chuan mi chak lo ber pawh ti chakin, chanchin tha hriltu, mi dangte Isua kawhhmuhtu mi hriam takah a siam thei a ni. Isua thu chu Jerusalema tanin (bung 1-7), Judai leh Samaria ram fanin (bung 8-9), kawlkil tawp a thleng dawn a ni (bung 10-28, Kaisari, Antiokei, Greek, Rom).

An hriat ngai loh tur thil a awm a; a hun leh ni thu, tih tur an nei bawk; Isua thuhretu, a witness nih. He ti laia a hun an hriat tul lo hi Pathianin Israelte ram a pek hun tur a ni. (Lalpa hian a lo ka leh hunte pawh hi kan hriat loh pawi a ti lo a ni ang e, zirtirte a hrilh lo tlat.) Thuhretu, witness hi Greek tawng chuan ‘martus’ tih a ni a. He thumal atang hian martar tih hi a lo chhuak a ni. Isua ringtute mi tamtak chu an thu hriat avangin tihduhdah tuarin, an martar ngam ta zel reng a ni. Mahni ngeiin hmuh leh tawn ngei, neih ngei thil chauhah thuhretu, witness a nih theih. Thuhretu nih hi mi thil hriat leh sawi lo khar chhawn lam a ni lo. Rorelnaah, ‘mi sawi ka hria, kan thenawmpan a hmu,’ tih kha thuhretu ni tura din pui tlak a ni lo. Isua thuhretu ni tur chuan amah hriat chian a, tawn a, amah nen inzawmna neih a ngai. Chu chuan a hminga huaisen taka, a tawp thlenga din theihna chakna a pe thin a ni.

Ngaihtuah zui atan;

4. Lalpan, ‘thiltihtheihna in la nei ang’ a tih hian eng nge an rilruah awm ang le, eng ti turin berin nge chu thiltihtheihna chu an neih ang, i thiltihtheihna hriat thiam dan leh Lalpa sawi thiltihtheihna hi a in ang em? Bomb thawk chak lutuk, dynamite ang mai rinna i kawl tih i in hria em? Isua thuhretu niin i in hria em?