Zirtir Inpumpek (The Radical Disciple) — John Stott – IV

Bung 2: KRISTA ANNA/CHRISTLIKENESS

Kum 2007 April thla khan ka kum 86 na ka lawm a, chutah chuan mipui hmaa rawngbawlna ka chawlhsan thu ka puang nghal bawk a. Chumi hnua thusawi tura sawmna ka dawn zawng zawngte chu hnial vek mah ila ka diary-ah chuan July thlaa Keswick Convention a thusawi tura sawmna erawh ka dahtha khiau a. He Bung hi chuta ka thusawi rinchhana ziak chu a ni.

            Kristian tleirawl te ka nih laia zawhna chhan har ka tih deuh thin kha ka hre reng mai (ka thiante pawhin har an ti). Chu zawhna chu ‘A mite tana Pathianin tih tur a ruat chu eng nge?’ tih hi a ni. Kan han piangthar a, mahse a dawt lehah eng nge kan tih tak ang?

            Westminster Shorter Catechism thu lar tak kha chu kan hre ngei mai, ‘Mihringin a tih tur bulpui ber chu Pathian chawimawia, a lawma awm kumkhua hi a ni.’ Hei aia thu tawi deuh zawk pawh kan khawih zuai tawh kha, ‘Pathian leh i vengte hmangaih rawh’ tih kha.

            Mahse an pahnih hian duhthu an sam zo tlat lo. Chu vangin ka lei hringnun zinkawng tawp lam ka lo thlen takah chuan ka rilruin a kawh tak ber ka han sawi ve duh a. Hei hi a ni: Pathianin a mite chu Krista ang turin a duh, Krista anna hi Pathianin a mite tana a duh chu a ni si.

            Krista ang tura kohna Bible tan chhanin bul ka tan ang a, Thuthlung Thara entirnain a dawt ang a, a pathumnaah ni tin nuna kan tih ve mai theihte ka chhawp chhuak ang.

KRISTA ANG TURA KOHNA BIBLE TAN CHHAN

He tan chhan hi khawi lai thu hlawm khat emaw a ni lo, a chhan chu he tan chhan hi hlawm khata zeh fel mai atan chuan a tam lutuk. Thu hlawm pathum, inhne rem leh tang tlang tur a awm thei ang: Rom 8:29, 2 Korinth 3:18 leh 1 Johana 3:2.

            A hmasa ber chu Rom 8:29 a ni: Pathian chuan (a mite) ‘a hriat lawka te chu ama Fapa ang taka awm turin a ruat lawk a’. Adama suala a tluk khan siama a awmna Pathian anpui nihna tam tak (a zavai chuan a ni lo) a hloh a. Hei hi Pathianin Kristaah a tikhat leh a. Pathian anpui nih awmzia chu Isua anga awm hi a ni mai a, Krista anna pawh hi chatuan atana Pathian ruat lawk leh thil tum chu a ni.

            A dawt leh chu 2 Korinth 3:18 a ni: ‘Chutichuan, keini chu kan zain hmai khuh lovin, darthlalang anga Lalpa chhun enin, ropuina atanga ropui zelin, chumi anpui ngeia awm turin tihdanglamin kan awm thin, Lalpa (Thlarau) ata chu kan hmuh ang zelin.’

            A thlirna tlang a dang leh ta a – hun kal tawh atangin tun hunah; Pathian chatuan ruat lawk atangin tun huna Thlarau Thianghlimin min siamtharna; Pathian chatuan thiltum Krista ang tura min tihna atangin Thlarau hnathawh hmanga Krista anna kawnga min siamtharnaah.

            A pathumna chu 1 Johana 3:2 a ni: ‘Duh takte u, tunah hian Pathian fate kan ni a, engtin nge kan la awm dawn tih erawh chu a la lang rih lo ve; amah a lo inlar chuan amah angin kan awm dawn tih zawng kan hria, amah chu a awm pangngai ang takin kan hmu dawn si a.’ Hei hi Pathian thiltum a nih chuan amah nen thawk dun tura min sawm hi a mak lem lo. “Min zui rawh u,” a ti. “Min zirtu ni rawh u.”

            Tam tak chuan The Imitation of Christ tih lehkhabu kha kan hre tawh awm e, kum zabi sawmpangana tir lama Thomas à Kempis ziak a ni a. Chhuah hrang hrang sang chuang leh lehlin hrang hrang an hralh tawh a, Bible tih lohvah chuan khawvela lehkhabu hralh tla ber a ni hial awm e. A bu chhung thu chu Krista zirtu nihna lam ngawt ni lovin a zau angreng a. A bu hming hi a bu chhunga thu hmasa atanga lak tawp a ni a, a larzia hian he thupui pawimawhzia hi a tichiang awm e.

            Tichuan 1 Johana 3:2 ah khan kir leh ta ila: Kan hre lova, kan hre bawk a; engtin nge kan awm dawn tih kan hre kil kel lo, mahse Krista angin kan awm dawn tih erawh kan hria. A nihna takah chuan hei bak hi hriat belh vak kan mamawh lo. He thudik ropui tak, Krista kiangah Krista angin kan awm dawn tihah hian kan lawm tawk em em a ni.

            Heti hian thlirna tlang pathum (hun kal tawh, tun hun leh hun lo la awm tur) kawh inang vek an lo lang a: Pathian chatuan thiltum (ruat lawk kan ni…); khawvela Pathian hnathawh (tihdanglam kan ni, Thlarau Thianghlimin min siam thar); leh khawvel tawpa Pathian thiltum (amah angin kan awm ang…). Hengte hian Krista anna lam an kawk vek a, a chhan chu Krista anna hi Pathianin a mite tana a thiltum a nih vang a ni.

Kristian kan intih chuan Krista angin kan awm tur a ni.

Krista anna hi Pathianin a mite tana a thiltum a ni tih Bible tan chhante tarlan a ni tawh a, tunah chuan he thudik hi Thuthlung Thar lam atanga entirnate hmangin tihfiah ka duh a ni. Chumi hmain 1 Johana 2:6 thu hi tarlang phawt ang: ‘“Amahah ka awm reng thin” titu chu (Isua) awm ang khan a awm tur a ni.’ Kristian kan intih chuan Krista angin kan awm tur a ni.

(chhunzawm tur)