Tirhkohte Thiltih Zirlai 33-na. Tirhkohte 6:1-7

TIRHKOHTE 6:1-7 MIZCLBSI

Chûng laia zirtîrte an pun zêl lai chuan an ni tin thil semah an hmeithaite an ngaihthah bîk tiin Grik ṭawng hmang Juda-te chu Hebrai-hote chungah an phunnawi a. [2] Sâwmpahnihte chuan zirtîrhote chu an ko khâwm vek a, “Pathian thu hril thlahthlama ni tin khawsakna lam kan buaipui hi a dik lo vang. [3] Chutichuan, unaute u, in zînga mi hming ṭha, Thlarau Thianghlima khat, mi pasarih thlang ula, an hnênah hêng hna hi kan hlân ang e; [4] keini erawh chu ṭawngṭai leh thu rawngbâwlah kan inpumpêk tlat ang e,” an ti a. [5] Chu thu chuan mipui zawng zawng chu a tilâwm a; tichuan, Stefana, ringtu nghet tak leh Thlarau Thianghlima khat leh Filipa te, Prokora te, Nikanora te, Timona te, Parmena te, Nikola, Juda saphun, Antiokei khuaa mite an thlang a. [6] Chûng mite chu tirhkohte hmaah an dintîr a, tirhkohte chuan an lu chunga kut nghatin an ṭawngṭai a. [7] Tichuan, Pathian thu chu a darh zêl a, Jerusalem-ah chuan zirtîr an pung nasa êm êm a, puithiamte zînga mi tam tak pawhin Rinna chu an pawm ve ta a.

SAWI ZAUNA Bung 5 tawp leh bung 6 tanna inkar hi hun engemaw chen a nih a rinawm. Zirtirte an pun tak zelah chuan chhung lam (chang 1-7) leh pawn lamah (6:8-7:60) an tawn ngai loh harsatna a lo thleng ta a. Heng hun tantir lamah hian ringtute hi Juda mi vek an ni. Judate hi chi hnih an awm a: 1. Israel ram pawn a piang leh seilian, Grecian Jews (Helenists) an tih maite. Greek tawng an hmang a, an nun dan pawn Juda aiin Greek a hnaih zawk. 2. Hebrai mi, Hebraic Jews. Hebrai leh Aramaic tawng hmang, Israel rama piang leh seilian. An nun dan zawng zawnga Juda hlang.

Hmeithaite hi enkawltu an neih loh avangin kohhran kutah an awm niin a lang. An sum thawhkhawm hi an zinga mamawhte tan an hmang ber thin niin a lang. Heng hunlai hian thlarau nun chang ni lo, tisa mamawh phuhruk hi tirhkohte kuta awm a ni.

Kut nghata tawngtai: Kut nghah hi Thuthlung Hlui atang tawhin tih thin a ni. A entir thinte chu-

1. Malsawmna. Jacoban Josepha fate kut nghatin mal a sawm (Gen 48:13-20),

2. Thil hlantur chunga a inhlante sualna nghah, transfer. Inthawina ran chunga kut nghah (Leviticus 1:4),

3. Engemaw bik ti tura ruat, thuneihna pekna. Mosian Joshua chunga kut nghatin thuneihna a hlan (Num 27:23)

Thuthlung Thar-ah pawh hman chhunzawm zel a ni.

1. Tihdamna tura kut nghata tawngtai (Tirhkohte 28:8)

2. Malsawmna. Isuan naupangte chungah kut nghatin mal a sawm (Marka 6:10)

3. Nemngheh, ordination, thil ti tura ruat, commision. Tirhkohte (6:6, 13:3)

4. Thlarau Thianghlim neihna tura kut nghah. Tirhkohte 8:17, 19:6

Ngaihtuah zui atan 48. Tirhkohte chunga chona, challenge lo awm hi enge, eng tiangin nge fing taka an chin fel? In kohhranah retheite, harsatna tawk emaw hriat i nei em, chung mite chu i tanpui thin em?

49. Pathian rawngbawl tura neih ngei tur, primary requirement kha enge? (Chang 3) Enge heng neih hi a pawimawhna?

(Sap tawng hian full of Spirit and wisdom tih a ni a. Mihring hian finna wisdom hi zirna, tawn hnem, experience atang tein kan nei thei a ni. Heta finna erawh hi chu Thlarau thilpek, 1 Korinth 12:8 a mi finna kha a ni berin a lang zawk a ni. Pathian atanga chhuak finna, wisdom lo hi chu rawngbawlnan a tangkai vak lo.)

Thlaraua khat si hi fing lo tak, mawl heih a awm theihin i hria em?