Delhi Mizo Inkhâwm Chanchin Tlangpui
Delhi Khawpuia Mizote Inkhâwm Ṭan Dân
Kum 1950 vêl aṭang khân Delhi khawpui-ah Mizote kan awm ve ṭan a. Kan awm khâwmna tawh phawtah chuan keimahni ṭawng leh kan mize mila Pathian biak inkhâwm neih duh ṭhîn kan ni. Delhi-ah hian May ni 7, 1967 (Pathianni) khân mumal deuhin a huhova inkhâwmna hmasa ber neih a ni. June ni 9, 1967 inkhâwm bânah hruaitu inruat a ni a, chungte chu:
Inkhâwm hruaitu : Pu Z.A. Kapmawia
Sum enkawltu : Pu Thangzika
Ziaktu : Pu H. Thangkhuma
Chutih lai chuan mimal inah inkhâwm ṭhin a ni a, an tam ṭumin naupang nên mi sawmhnih sawmthumte an inkhâwm ṭhîn a ni. Delhi-a Mizo awmte hi mi in luaha awm kan ni ber a, inkhâwm thlengtute an insawn chuan inkhâwmna hmun pawh sawn zêl a ngai ṭhîn; hei vâng hian kum 10 chhûngin hmun rukah inkhâwmna sawn a ni. Hming mumal tak nei hran lovin, ‘Mizo Inkhâwm,’ ‘Mizo Kohhran,’ ti tein lam pawlh nawk nawk a ni ṭhîn. Inkhâwm Committee pawh ‘Kohhran Committee’ tih mai ṭhin a ni. Kohhran angin Assam Phaitual Mizo Kohhran awm ṭhîn kha zawm tûr em ni tihte a lo ngaihtuah tawh.
Mission Rawngbâwlna Lam
Atîr aṭangin ramthar rawngbâwlna hi ngaihpawimawh ber a ni a. Ramthar Secretary-te pawh ruat ṭhin a ni. Pu K.C. Lalvunga IFS kha Ramthar Secretary hmasa ber a ni a, ani a chhuah hnuin Dr. Lallâwma’n he hna hi a chelh zui ve leh a ni. Record-a kan hmuh dân chuan 1968 April thla khân Haflong-a Biak In sak ṭanpuina Rs. 31.14 thawn a ni a, 1969 June thla khân NEFA lama rawngbâwlna tûrin Gramaphone Rs. 250/- in leisak a ni bawk.
Inkhâwmna Hmun Bik Neih Ṭan Dân
Kum 1972-a Mizoram Union Territory a lo nih aṭang khân Delhi-a Mizo awm kan pung ta hle a, mimal inah inkhâwm theih a ni ta lo va. Tichuan March ni 5, 1978-ah khân Green Park Free Church-ah inkhâwm ṭan a ni a, May ni 1, 2011 thleng khân he Biak Inah hian Pathianni tin inkhâwm ṭhin a ni.
DMI Lo Din Dân Leh Hruaitu Thlan
Kum 1978 khân kan inkhâwm inkaihhruaina dân, tluangtlam tawi têin siam a ni a, chuta ṭang chuan ‘Delhi Mizo Inkhâwm’ tih hi ‘official’ takin kan hmingah kan pu ta a ni. September ni 3, 1978 (Pathianni) in chu dân hmang chuan inthlanna hmasa ber neih a ni a; a hma zawng hian hruaitute hi a ruata ruat mai an ni ṭhîn. Hruaitu thlan chhuah hmasak berte chu hengte hi an ni.
Chairman : Pu Lalchuangliana
Secretary : Pu P.C. Muanthanga
Treasurer : Pu C. Engliana
Member-te : Pu Lalsawia MP
Pu Rualzakhuma
Dr. Lianzama
Tv. Lalduhthlana
Sunday School Rawngbâwlna
Kum 1978 hi DMI tân kum chhinchhiah tlâk tak a ni. Mimal ina inkhâwm ṭhîn, Biak In pângngaia inkhâwm ṭanna a ni a. Inkaihhruaina dân mumal taka siam kum a ni bawk. Chu mi dân hmanga inthlan hmasa ber chu September ni 3, 1978 khân nomination (mi sâwmpahnih) siamin hruaitu mi pasarih thlan chhuah an ni. Naupang Sunday School pawh Zirtîrtu mumal tak ruata kalpui ṭum khatna a ni. Naupang Sunday School zirtîrtu hmasate chu Pi Raltâwnnêmi leh Pi Hmingpuiite an ni. Sunday School naupangte pâwl hniha in siama pâwl khat ve ve enkawl tûra tih an ni a, zir tûr pawh thlansak an ni. Kum 1983 khân NPSS Superintendent hmasa ber atân Pu R. Rozika ruat a ni. Tûnah chuan naupang pawh kan lo ṭhahnem ta a, Naupang Sunday School kan changtlung chho ta hle a ni. Puitling Sunday School hi kum 1987 aṭang khân thla tin Pathianni vawikhat hmangin neih ṭan a ni a, zirlai hmasa ber chu Genesis 1-35 a ni. Chu mi kuma Puitling Sunday School exam-a ti ṭha ber chu Nl. R. Lalhmingliani a ni.
Beihrual Neih Ṭan Dân
DMI a lo ṭhan chhoh ang zelin rawngbâwlna pêng hrang hrang pawh a phuisui chho zêl a. Kum 1972 khân September thlaah Beihrual hi neih ṭan a ni a, Inrinni zân apianga beihrual hun hman ṭhin a ni. Beihrual hun hmasa ber chu September ni 2, 1972 khân Pu Lalfakzualate in Lodhi Colony-a neih a ni. September thla chhûnga inkhâwm thawhlâwm chu Durtlâng Hospital ṭanpui nan pêk ni se tih a ni a. Inkhâwm hmasa ber ṭum hian Rs. 57.75 hmuh a ni. Pathian zârah kum tinin September thlaah Beihrual kan nei chho ta zêl a, DMI member-ten kan hlut hle a ni.
Hmeichhiate Rawngbâwlna
Kum 1979 August ni 24-26 chhûngin Retreat neih a ni a. Chutah chuan Rev. Dr. R.K. Nghâkliana, BMMF Missionary, Lucknow-a mi chu Speaker a ni. He hun denchhen hian nuho – Pi Sangteii te, Pi Vanlalmawii te, Pi Nemi te, Pi Hmingpuii leh mi dangten an puala Hmeichhe Inkhâwm neih an rawt a. Tichuan inkhâwmnate siamin sumte an peipung a, chutianga lo ṭhang chho zêl chuan vawiina kan Delhi Mizo Hmeichhe Inkhâwm phuisui tak hi a lo kal chho ta zêl a ni.
Ṭhalaite Rawngbâwlna
Atîr tê aṭanga DMI rawngbâwlna kawnga kaihza vêngtu pawimawh tak chu ṭhalaite hi an ni a, Programme engkima kan hma thehte an ni ṭhîn. DMI Pathianni inkhâwmah ṭhalai pualin service a khat tâwka neih ṭhin a ni a. September ni 18, 1988 khân DMI Committee rêl angin Pu Lalchuangliana leh Pu K. Tlanthangate’n ṭhalaite ko khâwmin ṭhalai rawngbâwlna kalpui zêl dân tûr an sawipui a, mi sawmli chuang an kal khâwm a. Chutah chuan ṭhalai hruaitu tûr mi paruk thlan nghâl an ni a, heng mite hi DMṬI rawngbâwlna kawnga hma lo la hmasatute an ni:
Nl. Lalnunpâri (Convenor)
Capt. Lalthlamuani SA
Nl. R. Lalmuanpuii
Tv. Vanlalchhuanga
Tv. K.C. Zoramhluna
Tv. Muanzuala
Serh Leh Sâng
Delhi Mizo Inkhâwm-ah hian Sakrament pahnih, Lalpa Zanriah leh Baptisma hi atîr tê aṭangin neih ṭhin a ni a. Keimahni zingah Ordained Minister an awm hma chuan Kohhran danga mi Ordained Minister kan sâwm mai ṭhîn. Lalpa Zanriah kan kîl ho hmasak ber chu December ni 3, 1967 khân Pu Thangzika ina kan inkhâwm laiin kan nei a, Rev. Joe Smith- an min rawn buatsaihsak a ni. Rev. Dr. R.K. Nghakliana kha kan zînga Ordained Minister awm hmasa ber a ni a, ani lo awm chinah chuan Baptisma, Lalpa Zanriah leh dân chhûng luhte pawh kan nei ta fo va. Kan zînga mi pêm an awm pawhin an duh chuan DMI hmingin pêm lehkha kan pe ve mai a, Kohhran dang pawhin an lo pawm ve zêl mai ṭhîn a ni.
Society Registration
Kum 2005 khân kum rei tak kan sawi hova kan ngaihtuah hnuin India ram dân hnuaia inziah luh (register) a ṭha ang tiin kan rêl thlu ta a. Societies Registration Act, 1860 hnuaiah “The Mizo Christian Fellowship” tih hming puin Government of National Capital Territory, Delhi-in min register fel a, Permanent Account Number (PAN) te neiin Income-tax Act, Sec. 12A hnuaiah ‘charitable religious society’ angin kan in register bawk a ni. Sawrkârin pâwl hminga ‘Delhi’ telh an phal loh avângin Delhi Mizo Inkhâwm ang chuan kan in register thei lo va. The Mizo Christian Fellowship (TMCF) Society anga kan dân siam, Memorandum of Association leh Rules & Regulations angin kan inenkawl a, chu dân hnuaiah chuan dân tê (Bye-laws) kan siam bawk a. Chu Bye-laws-ah chuan TMCF leh DMI inkungkaihna dân hi siam a ni. TMCF Society dân hnuaia kan hruaitu hmasa berte chu hengte hi an ni:
President : Pu K. Tlanthanga
Vice-President : Pu Lalchuangliana
Secretary : Pu H. Thangmawizuala
Joint Secretary : Pu Vanlalzawma MP
Treasurer : Rev. H. Remthanga
Executive Member-te :
Rev. Col. R.L.Darkim
Rev. Vanlalbela
Pu V.L. Luaha
Hmun Thuma Inkhâwm Ṭan
Kum 2011 khân hlim taka Green Park Free Church-a kan inkhâwm ho dial dial laiin a Biak In neituten kan inkhâwm hun lai hian anmahni’n inkhâwm neih ve an duh tiin chhuak tûrin min ti a. Inkhâwm hun dârkârte pawh sawna min tichhuak lo hrâm tûrin kan dil a. CNI Bishop hnênah pawh kan sawi a, mahse a rem thei ta chuang lo a ni. Inkhâwm ho zêl theihna tûr hmun dang kan dap chiam a, remchâng kan hmu zo lo va. Tichuan May ni 1, 2011 (Pathianni) chuan inthlahna ni pahin kan inkhâwmho hnuhnung chu kan hmang ta a ni. Kan hotuten an lo rêl angin hmun thumah kan inṭhen a – East Delhi Mizo Inkhâwm (EDMI), North Delhi Mizo Inkhâwm (NDMI) leh South Delhi Mizo Inkhâwm (SDMI) tiin. NDMI inkhâwmna tûrin Dhaka Methodist Church hman a ni a, SDMI chu Mizoram House Conference Hall-ah an inkhâwm a. EDMI erawh St. Michael & All Angels’ Church, Jangpura leh YMCA, Jai Singh Road-ahte an inkhâwm kual zar zar hnuin Salvation Army Citadel, Green Park-ah an lût ta a, tûn thleng chuan heng hi kan inkhâwmna hmunte chu an ni ta. Hetia hmun thuma kan inkhâwm hran hmasa ber chu May ni 8, 2011 kha a ni. Heng Mizo Inkhâwm pathuma kan hruaitu hmasate chu hengte hi an ni:
East Delhi Mizo Inkhâwm Committee:
Rev. Vanlalmuanpuia Khiangte : Chairman
Pu H. Thangmawizuala : Vice-Chairman
Pu C. Vanlalramsanga : Secretary
Nl. Elizabeth Zadeng : Asst. Secretary
Pu R. Lalremruata : Treasurer
Tv. R. Malsâwmkima : Financial Secretary
Pu David Lalrinsânga : Member
Pu L.H. Shanliana : Member
Pu Robert Lalchungnunga : Member
Pu C.L. Rual : Member
Tv. Lalsangliana Hnamte : Member
Rev. Vanlalsâwma : Member
North Delhi Mizo Inkhâwm Committee:
Rev. Laltharzuala : Chairman
Rev. T.H. Vanlalzauva : Vice-Chairman
Tv. B. Semthanga : Secretary
Tv. Philip Lalzârliana : Asst. Secretary
Nl. Rebecca Lalrindiki : Treasurer
Nl. Lalnunthangi : Financial Secretary
Nl. Zaithangzauvi : Member
Tv. Lalruatpuia Sailo : Member
Tv. John L. Pachuau : Member
Tv. L.V. Lalthantluanga : Member
Pu Lalrikhuma Sailo : Member
Pu F. Lalthanpuia : Member
South Delhi Mizo Inkhâwm Committee:
Pu Lalchuangliana : Chairman
Pu Lalhmingthanga Ngente : Vice-Chairman
Tv. K.L. Biakchungnunga : Secretary
Pu Vanlalfela Chawngthu : Asst. Secretary
Pu Lalruatliana : Treasurer
Pu V.L. Luaha Renthlei : Financial Secretary
Rev. R.L. Darkim : Member
Tv. C. Lalengkima : Member
Nl. Vanhlamawii : Member
Rev. V. Laldingliana : Member
Pi Lalrinsangi Ralte : Member
Pu A. Zothansanga : Member
Golden Jubilee
DMI chuan Pathian hruaina ropui tak changin kum 2017 khân Golden Jubilee hial a lo thleng ve ta a, min hruaitu Pathian chungah kan lâwm tak zet a ni. Golden Jubilee lawmna hi May ni 6, 2017-ah a hawnna inkhâwm Mizoram House, Vasant Vihar-ah neih niin, May ni 7 Pathianni, 2017-ah Siri Fort Auditorium-ah a lawmna ropui taka neih a ni. Hemi kum chhûng hian ‘Krista Min Hruaitu’ tih thupui hmangin kum tluanin Golden Jubilee lawmna hi neih chhunzawm zêl a ni a, November ni 3-5, 2017 khân a khârna hun hman a ni.
Golden Jubilee kan lawm kum hian Souvenir chi hrang hrangte kan siam bâkah, Jubilee Magazine changtlung tak leh lehkhabu ṭha tak ‘Hruaitu’ tih kan chhuah bawk a ni.
Tlângkawmna
Kan rin loh taka harsatna eng emaw kan han tawh pawhin Pathian ṭhatna leh kaihhruaina kan dawng zêl a, Ama zârah DMI hian hma kan sâwn zêl a ni. Lalpa kan Pathian hnênah chawimawina leh ropuina i hlân fo ang u.