Mihring Tisa Châkna Inchuha Indona – Robert L Chongthu IAS

“I ram lo thleng rawh se. I duh zawng vana an tih angin leia mi’n ti rawh se.” – Matthaia 6:10
 
Kristian tam tak chuan Bible thawnthu hi dan bawhchhiatnaa inṭan niin an ngai a. Adama leh Evi kha thing pakhat rah ei lo tura tih an ni a, mahse thu an awih lova, chu vangin khawvelah sual a lo lut ta a ni. Hei hi a dikna chen pawh a awm e, chutih rualin a thawnthu peng khat ve mai a ni a. Genesis-a buaina thu ril zawk hi chu thu awih lohna mai ni lovin mihring tisa châkna kal sual a ni mah zawk. Mihring buaina ril ber chu eng nge ṭha tih hre tura inzir leh mahni finna aia Pathian finna ring thiam tura inzir niin Bible chuan a pho chhuak a ni.
 
Eden Huan kha thil ṭha tinrengin a khat a. Pathian chuan khawvel ṭha tak mai, mawina, intodelhna leh nunnaa khatin a siam a. Thingte chu mit la tak leh a rah pawh ei mi tak niin sawi a ni. Tisa châkna kha buaina bul a ni hran lo. Pathian thilsiamah khan a tel ve reng zawk a. Mihringte hi thilsiama mawina, ṭhatna leh hlutna hmu thiam tura siam pawh kan ni bawk.
 
Buaina bul chu rûlin Pathian nihna dik lo taka a rawn sawi kha a ni zawk. Pathian chuan Adama leh Evi lakah thilphal takin huana thing zawng zawng aṭanga ei a phalsak a, pakhat aṭang chauhin ei a phal lo. Rûl chuan kha a thilphalna kha khuahkhirhna angah a rawn chhuah daih a, an lakah Pathianin thil hlu tak a thup niin a rawn ngaihtir ta daih mai. An vawi khat titina lekah Pathian ṭhatna chu sawi hnawm a ni a, a thiltumte chu hnial kalh an ni a, a finna chu rinhlelh niin mawi lo taka chhuah a lo ni ta daih mai.
 
Thlemna ber pawh thei ei tura tih kha a ni mai lo. Thlemna ber chu Pathianin chhia leh ṭha a hrilh fiah dan kha rintlak a ni lo tih ngaihdan nei tura tihna kha a ni zawk.
 
Hmeichhia chuan thing rah chu ei mi a ni tih leh, mit la tak a ni tih leh, mi tifing turin thing rah itawm tak a ni tih a hria a. A inlaklawn chhoh zel dan hi han en mah teh. Thil ṭha a hmu a, a it a, chu thil chu a neih chuan kim dawnin a inhre ta a nih chu. A hmaa thilpek ni reng kha tunah chuan ban ṭawk ṭawk ngai thil a lo ni ta. A mamawh ang ang pe turin Pathian a ring tawh lova, amaha banin ama’n a la ta a ni.
 
Hetiang kalphung hi mihringte kalphung a lo ni chho ta zel mai.
 
Thil ṭha tak tak hi chu kan hmu reng e – hlawhtlinna, hausakna, inlaichinna, thiltihtheihna, nawmna, hriatna leh larna. Hengte hi anmahni ngawt chuan sual an ni hran lo. Mahse nunna hnar anga ngaihna dik lo tak hi kan lo nei leh tlat ṭhin a. Thil pakhat chauh neih belh leh thei ila, thil pakhat chauh hi ti leh thei ila, chutiang khatiang chuan awm thei ila chuan lungawi tawh turah hian kan inngai tlat ṭhin a.
 
A rah chhuah chu lungawi lohna, intihbuaina leh keh chhiatna a ni leh ṭhin.
 
Adama leh Evi te duhthlanna rah hmasa ber chu hriatna leh finna ni lovin zahna a ni daih. An mit a lo var ta ngei a, mahse Pathian ang nih ahnekin an tlin lohna hlir an hmu ta zawk a. A hmaa an hriat ngai loh hlauhna chuan an rilru a luah ta a. Rinna a bo zo a. Pathian lakah leh anmahni leh anmahni lakah an biru ta chawih chawih mai a ni.
 
He thawnthu bawk hi chhuan kal zelah Bible chuan a sawi nawn fo mai. Ṭam a tlak laiin Abrahama chuan Pathian thutiam ring zo lovin bumna a thlang a. Jakoba chuan malsawmna dawng turin bumna leh lemchanna bawk a hmang ṭangkai a. Ram pumin thiltihtheihna leh an himna tur chu Pathian ni lovin thil dangah an zawng a. Chhia leh ṭha hi mihringte hian kan tisa chakna duh danin kan hrilh fiah nawn awn awn a, chumi avang chuan mahni leh midangte tan tawrhna zakhua kan thlen reng mai a ni.
 
Hei vang hian alawm Bible hi thawnthu lungchhiatthlak ang mai a nih. Chhuan tin mai hian thil ngai reng kan tisual a. Chhuan tin mai hian mahni tihsual kan hmachhawn zawng a nih hi.
 
A thawnthu erawh a la tawp mai lo.
 
Thuthlung Thar chuan Isua hi mihring dik tak niin a sawi a – Adama hlawhchhamnaa rawn hlawhtlinga chu.
 
Baptisma a chan zawh veleh Isua kha thlalera hruai a ni a. Chutah chuan ni sawmli zet chaw a nghei tawh hnua a rilṭam em em laiin Eden huan thangkhawk thlemna a tawng a. Thlemtu chuan Pathian ṭhatna leh Isua nihna a rawn cho leh a. Pathian Fapa a nih tak tak chuan eng vangin nge rilṭam chu a tawrh ang? Eng vangin nge lungte chu chhangah a chantir mai loh ang?
 
Isua chuan mihring nihna chhungril ber dek phak thuin a chhang a:
 
“Mihring hi chhang chauhvin an nung lo vang a, Pathian kaa thu tin chhuakin an nung zawk ang.”
 
Chhang chuan taksa nunna a chelh a, mahse nunna tak tak erawh a pe thei hauh lo. Isua chuan a thiltihah a tisa châkna kha nghawng a neihtir duh miah lo. Chutia tih ai chuan a Pa finna a ring zawk. Adama’n a ban ṭawk ṭawk laiin Isua chu a inpe mai. Adama’n a rinhlelh laiin Isua chuan a ring.
 
Isua hnehna hian mihring nihna tak tak a pho lang a.
 
Kristian nunin a tum ber chu tisa châkna tihbo a ni lova, her danglam a ni zawk. Isua chuan a zuitute chu heti hian ṭawngṭai turin a zirtir a, “I duh zawng…ti rawh se.” Zuitu nihnain a tum ril ber chu kan duh zâwngte Pathian duh zâwng mila min her remtir a ni. Mihring kan nihna tidal zel tur ni lovin titak zel zawk tura tih kan ni – Pathianin kan nihna tura a rilruk hmasak ang mihring chu ni turin.
 
Tlang chunga thusawi khan he tihdanglam mihring hi a pho chhuak a. Hmangaihna chuan huatna a rawn thlak a. Khawngaihna chuan thiam loh chantirna a rawn hliah khuh a. Tlawmna chuan chapona a rawn thlak a. Mahni inpeknain mahni inhai vurna a rawn thlak a. Pathian duh zawng chu kan duh zawng a lo nih chiahin Pathian lalram nun chu a rawn lang ṭan ṭhin a ni.
 
He thu tho hi Galatia-ah khan Paula chuan a rawn sawi leh a. Tisa thiltih leh Thlarau rah te a rawn khaikhin a. Mihring tisa duh zawng thlah zalen chuan thikna, inkhinna, awm hranna, bawlhhlawhna leh duhamna a hring a. Mahse Pathian Thlarau Thianghlimin kan duhnate a tihdanglam tawh chuan a rah chu hmangaihna, hlimna, remna, dawhtheihna, ngilneihna, ṭhatna, rinawmna, ngilneihna leh insum theihna te an ni.
 
Eden Huan thawnthu min hrilh nawn ni pah fawmin Paula chuan a sawi fiahna langsar tak atan thil rah a rawn hmang a. Hmanah mihringten thei rah ei phal loh chu lovin thihna an chhar a. Tunah chuan rah chi dang, nunna min thlen theitu chu Thlarau zarah Pathianin min pe ta zawk a ni.
 
He danglamna hi amaha rawn awm tawp tur a ni lo. Kristiante chanchinah ringtute hian ṭawngṭai, chaw nghei, Pathian pawl leh Bible thu zir te hi mahni inthununna atan an lo hmang ṭhin. Hengte hi Pathian duhsak hlawhna tura ti an ni lo. Mihring thinlung zirtir ṭhat lehna kawng an ni. Hengte hian kan duhnate aia Pathian ring tur leh kan châknate aia Pathian finna ring zawk turin min zirtir thei a ni.
 
A tawp khawkah chuan Bible hian a thilsiamte kalsan duh ngai lotu Pathian chanchin min hrilh a. Mihringten kan châknate hi kal sualpui fo mah ila, Pathian chuan mihringte min rawn zawng reng tho a. Isua kal tlangin mihring dik tak kan nih theihna kawng chu min kawhhmuh thar leh ta a ni.
 
Chu vangin Bible thawnthu hi sual leh ngaihdamna thu mai chu a ni lo deuh. Tisa châkna leh danglamna chungchang pawh a ni. He khawvelah hian thil ṭha tam tak a awm a, mahse Pathian chauh hi nunna hnar a ni tih hriatna chungchang a ni bawk. Chu bakah thinlung leh tihtakzeta “I duh zawng…ti rawh se” tia ṭawngṭai thei mihring nih chungchang a ni.