Tirhkohte Thiltih Zirlai 58-na. Tirhkohte 11:25-26

TIRHKOHTE 11:25-26 MIZCLBSI. Tin, Barnaba chu Saula zawng tûrin Tarsa lamah a kal leh ta a. [26] A han hmuh chuan Antiokei-ah a rawn hruai a, kum khat zet kohhran mite zîngah an tel ve a, mi tam tak an zirtîr ṭhîn a. Antiokei khuaah hian a ni, zirtîrte chu, ‘Kristian,’ an tih hmasak ber ni.

Sawi zauna Engatinge Antiokei khuaa Gentile ringtharte zirtir tur hian Saula kher?  Part-2

Galatia Lehkhathawnah chuan Saulan (Paulan) tihian a ziak a; Tin, Kifa (Petera) chu Antiokei khuaa a lo kal lai khân demawm takin a awm a, a langin hmai chhanah ka khak a. Jentail-te zîngah chaw a ei ve ṭhîn a; mahse, Jakoba tirh mi ṭhenkhat Jentail serhtantîr tumtute chu a hlau va, an lo thlen hnu chuan a tîm a, a inthiarfihlîm ta a. Juda dangte pawh chuan a tih dân chu an zui ve a, Barnaba meuh pawh an tih dân chuan a hruai kawi ta a. An thiltih dân chu Chanchin Ṭha thu nên a inhmeh lo tih ka hmuhin, an zaa hmaah Kifa hnênah chuan, “Nang Juda i ni a, Juda anga awm lovin Jentail-te angin i han khawsa a, chuti chung chuan engtizia nge Jentail-te chu Juda mi anga awmtîr i tum?” ka ti a (Gal 2:11-14). Helai thil thleng hi Jerusalem khawmpui hnu Tirhkohte 15 :30-35, AD 48-50 vel bawr a thil thleng a ni.

Petera hian hmaihnih, double standard a nei niin a lang. Kohhran hruaitu, thuneihna neite zingami a ni. Hruaitu leh hruaitu hmai inzahna tih lan a ngaih chang a awm thin. Petera hian Jakoba hmai zah vangin tih loh tur, Gentile ringtute leh Juda ringtute in then hran theihna thil a ti a ni. (Khawvel thlirna pawha dinhmun tha chelh ringtuten an nihna an hum duhna lamah mi chanchhe zawkte tan Isua hmel hliahtu nih awl chang a awm thin. Kan pawl, kan kohhran, sawrkar thutlukna a nih chuan hruaitu dinhmun chelhtu ka nih miau chuan Pathian thu nena in hmeh chiah lo pawh tih ve a ngaih chang a awm thei ngei ang.)

Paula chuan; heng nihna leh dinhmun tha zawng zawng hi Isua avangin ka chan vek a, hnawmhne ang lekah ka ngai, a ti (Philipi 3:8). Eng nihna mah a chelh ngai loh avangin hmai zah tur pawh a nei lo va, a huaisen em em a ni. Chanchin tha nena inhmeh lo thil an tih chuan, hruaitu lian Petera pawh ni se a zilh mai a ni. Tu mitmei mah a ven a ngaih loh avangin. Gentile-te pawh serh tan tir Juda ringtu tam takin an tum tlat hi thil tul lo lutuk ni a a hriat tlat avangin.

Hei vang hian Antiokei khuaa Gentile ringtharte zirtir tur hian a tha ber a ni.

Note: Paulan nihna, position leh thuneihna khawvel thilah emaw kohhranah emaw a neih ngai loh avang hian ngaihnep leh deuhsawh pawh a tawk nasa ve thin. Chanchin tha a hrilhte ngei pawn a thu an ngaihthlak duh loh chang a awm thin (2 Korinth 3:1). Amah thlangtu, ordain tu hi Pathian a ni tih hi a chiang e mai pawh a. Hei hi a huaisen chhan ber pawh a ni. Tu pawmna, khawi kohhran emaw lehkha, recommendation mamawhin a in hre tlat thin lo hi.

Ngaihtuah zui atan 58/1. Kristian tih hi ringtute an in phuah a ni lo va, Pathianin in ni a tih pawh a ni lo. Midang, ringlo miten an koh dan, an phuah a ni. Antiokei khaw rura tak maiah hian engkim mai hi an sawi chhiain, hmuhsitawm takah an chhuah thiam thin viau a ni awm e. Kristian tih pawh hi an hmuhsitna tawngkam a ni e, an ti. Christianity hi tih tur, ei tur, hun-hmun serh bik neiha sakhua, religion anga kal pui chi a ni hian ka hre lo tulh tulh mai a. Entirnan; chawlhnia kan inkhawm thinte hi a ni (Saturday, Sunday) leh a hmun, biakin, hall ai hian ringtute Pathian hmingin kan inpawl khawm, kan fellowship a ni tih hi a pawimawh zawk fein ka hria. (Ram roreltute hian Monday leh Tuesday zawk hi chawlh tur a ni ti ta se, Tuesday hian phur taka ka inkhawm theih mai ka ring. Sunday a kan inkhawm nen a danglam dawnin ka hre tlat lo.)