TIRHKOHTE 10:9-23 MIZOVBSI Tin, a tûkah chuan, an kal laia khaw kiang an thlen dâwnin, Petera chu ṭawngṭai tûrin, chawfâk hun laiin in chungah a lâwn chho va; [10] tin, a ril a lo ṭâm a, chaw ei a duh ta a; nimahsela, ei tûr an siam lai chuan englovin a zêl ta a. [11] Tin, vân inhawngin englo bâwm, puan lian tak ang, a kil lia hlina leia uai thlain a hmu a; [12] chumi chhûngah chuan fuliafa leh rannung leh chunglêng sava tinrêngte an awm a. [13] Tin, a hnênah awin, “Peter, tho rawh; talh la, ei rawh,” a rawn ti a. [14] Nimahsela, Petera chuan, “Lalpa, ni lo ve; thiang lo leh bawlhhlawh eng mah rêng ka ei ngai lo ve,” a ti a. [15] Tin, aw chuan a vawi hnihnaah, “Pathianin a tihthianghlim tawh chu nangin thiang lo ti suh,” a ti a. [16] Chutiang hlîr chuan vawi thum a lo awm a; tin, bâwm chu vâna khai chhohvin a awm leh ta nghâl a.
[17] Tin, Petera chuan mumang anga a hmuh chu a ngaihna hre lova a mangan laiin, Kornelia mi tirhte chuan Simona in chu an lo zâwt chhuak tawh a, kawngkhâr bulah an lo ding a, [18] an au va, Simona, Petera an tiha chu, chutah chuan a thlen leh thlen loh an zâwt a.
[19] Tin, Petera chuan a mumang ang thu chu a ngaihtuah laiin Thlarauvin a hnênah, “Ngai teh, mi pathumin an zawng a che. [20] Chutichuan, tho la, chhuk la, eng mah ringhlel lovin anmahni zui rawh; anni chu ka tirh an ni e,” a ti a. [21] Chutichuan, Petera chu, chu mite hnênah chuan a chhuk a, an hnênah, “In zawn hi ka ni e; eng nge in rawn kal chhan?” a ti a. [22] Tin, anni chuan, “Vântirhkoh thianghlim pakhatin Kornelia, sipai za hotu, mi fel tak, Pathian ṭih, Juda hnam zawng zawng zînga mi hmingṭha hnênah chuan i thusawi a hriat nân, a inah nangmah ko tûr chein a hrilh a ni,” an ti a. [23] Chutichuan, mite chu a ko lût a, a riahtîr ta a. Tin, a tûkah chuan Petera chu a tho va, an hnênah a kal a, Joppa khuaa mi unau tute emaw pawh a hnênah an kal ve a.
Sawi zauna Pathianin a hriatthiam dan, a tih dan thin pela Petera a hman dawn avangin a rilru a buatsaih a ni. Juda pachal a nih avangin a thil pawm danah a nghet khawp ang. An hunlai atanga chhutin kum 2000 kalta khan Pathianin an pu Abrahama a lo ko chhuak tawh a, kum 1500 vel kal tawhah khan Pathianin hmaichhan ngeiah Mosia biain dan leh thupek, ei thiang leh thiang lote a lo hrilh tawh a ni. Petera hian a thil hriatah a chiang em em anga, a pawm dan, a tih dan thinah a nghet khawp ang. Chung chu thiah a ngai a ni.
Sa ei thiang leh thiang lo hi chipchiar takin Leviticus 11-ah ziak a ni. Gentile-te hian Juda dan an zawm ve loh avang hian Juda-te hian bawlhhlawh, thiang lo, unclean tiin an sawi bawk thin. Gentile-te an kawm ngai lo va, an inah pawh an lut ngai lo a, chaw pawh an ei pui ngai lo. Josepha hunlai pawh khan chaw an ei naah a unauten kha a hrangin an thuttir a ni. Sa ei chungchanga Aigupta mite nen ei thiang leh thiang lo an tih a in an loh vang a ni, an ti (Genesis 43:32).
Ngaihtuah zui atan 52/1. Pathianin a tih thianghlim tawh chu nangin thiang lo ti suh, tih Pathian tawngkam hian eng tiangin nge tisa leh thlarau lamah a nghawng che?
52/2. Petera hi englovin a zel a, van inhawng a hmu a, Pathian aw a hre bawk a. Chumi tichiang/nemnghet tur chuan Kornelia mi tirhte chu an rawn thleng nghal bawk a. Pathian hnathawh dan, a thupek a nemngheh dan i hmu thei em?
Petera leh Kornelia Pathianin a puahchah, a prepare dan atang hian enge i zir chhuah, i nuna thil thleng, i tum ni miah lo thilte Pathian hmanrua a ni theiin i hria em, a ni thin em?
Discover more from NUN HRUAITU
Subscribe to get the latest posts sent to your email.