Tiam Tlat E (I Married You) XXXIV– Walter Trobisch

Bung 9 Chhunzawmna

Daniel-a chu Maurice-a car bulah a han indah ve a. Ingrid-i a chhuk vat a, Fatma-i chu duat leh hre thiam takin a va kuah a. Chutah chuan Fatma-i pawh a insum ta bik lova, Ingrid-i awmah chuan a hmai phumin a ṭap ta hliam hliam mai a. 

‘Hun kan la ngah em?’ tiin Daniel-a chu ka zawt a.

‘Dar sawmpakhat a ri tawh a. Darkar chanve velah chuan an ko tawh mai ang che u.’

‘A nih chu. Daniel, kan hun tawp lam mah ni se i thawk ho zel teh ang u. He’ngte hi kan ticket a ni a. Maurice-a leh Timothy-a te hian kan suitcase lian deuh hi an lo va dah thei ang em? Tin, nang leh Esther-in kan bag khaite hi gatethlengin min lo kensak thei ang em?’

Midangten kan bungrua nen a tihfelna hmun an pan lai chuan Ingrid-i nen chuan Fatma-i chu innghahna room lamah kan va hruai hrang a. Mi an lo tam khawp a, a ri nuaih nuaih mai lehnghal. Ṭhutna awl pathum kan va hmu hlauh a.

‘Mak i ti em, pastor?’ tiin Fatma-i chuan min zawt a.

‘Aih, ka lawm zawk.’

‘Lawm a?’

‘Aw, a chhan chu mi sual pakhat sim avang hian vana mi an lawm hle asin.’

Kan dem lo a ni tih a hriat chuan Fatma-i chu a thawl huai mai. ‘Ngaihdam theih ka niin in hria em?’ a ti leh a. 

‘Aw,’ tiin ka chhang a. ‘Mahse i lehkhathawn kha keimahni hnenah ni lovin Pathian hnenah i thawn a ni tih i hriat hmasak erawh a ṭha ang. Keini te chu i thu hriatpuitu mai kan nia.’

‘Aw, ka hria alawm.’

‘A nih kan ngaihdamna thu hi Pathian ngaihdamna thuah i pawm thei em?’

‘Pawm thei e.’

‘A nih chuan khawngaihin i lehkhathawn paragraph tawp ber kha chhiar nawn leh teh.’ Envelope chu ka pe a, a mal chungah lehkha chu a han keu a.

‘Paragraph tawp ber hma deuh aṭang hian chhiar ka va duh,’ a ti a.

Hriat tham lekin fiah fel takin a chhiar a: ‘Hre reng chungin Pathian thupek zawng zawng ka bawhchhia a. Ka nu leh pate thu zawm lovin ka bum a. Uire ka nih bakah tualthattu ka ni. Ka rila rah ka fa ka tihlum a…’

A hnuk a ulh a. A rawn ṭap chhuak feih a, a taksa pum nghing khawpin a khur a. ‘Nunna ka la tih hi in hre thiam em?’ a ti ṭuau a. ‘Nau tihtlak hi tualthahna a ni, engti zawng pawhin sawi mah se. Chu chu engtin nge ka siam ṭhat leh theih ang?’

Ingrid-i chuan a kut veilamin Fatma-i chu a kuah a, heti hian a ti a: ‘Fatma, thil tam tak kan siam ṭhat leh theih hauh lo hi an awm alawm. Kraws bula dah tawp mai hi kan tih theih chu a ni.’

Tichuan Fatma-i pawh a thaw huai a, a chhiar zawm leh a: ‘…keimah pawh hi intihhlum ka duh. Pathian hremna hi ka phu hle a ni tih ka inhria. Mahse Pathian hnenah ngaihdam ka dil. Ka chakna ngawt chuan ka inti zalen zo lo. Mahse kan tan pawh Krista a thih tawh avangin a tan ka nung ve thei a ni tih ka ring. Bul ṭan ṭhat leh ka duh a ni. Khawngaih takin ka puan in hi min kaihpui leh r’u.’

Fatma-in lehkhathawn chu envelope-ah chuan a han dah lut leh a. Chu chu a mal chungah, a kut pahnih inkarah a zep a. A maimitchhing a, a lu a kun deuh a. Kei chuan a ṭawngṭai a ni tih ka hre thiam.

Thil mak tak a ni. Mite an zi nuaih nuaih a. Ṭhenkhat chuan min en a, ngaihdan pawh an nei thiam lo ang. Au rinnaah chuan thlawhna lut leh chhuak an puang zut zut bawk a.

Keini lah chuan kan chheh vel chu kan hre chang lo. Pathian chenchilhin kan awm a. Biak Inah chauh hian a awm lova. Airport-ah te pawh a awm vek a ni.

Fatma-i kut chungah chuan ka kut veilam ka nghat a, Ingrid-in a kut dinglam a rawn nghat ve leh a, a kut veilam chuan Fatma-i chu a la kuah reng tho.

‘Lalpa, ka sualte min ngaihdam avangin leh chu ka thil dawn chu midangte pawh ka pek chhawn ve theih avangin lawmthu ka hrilh a che,’ ka han ti a.

Tichuan Fatma-i lu chungah ka kut dinglam ka nghat a, heti hian ka ti a:

‘Lalpa chuan heti hian a ti: Fatma, hlau suh. Fatma, ka chhandam tawh che. Fatma, i hmingin ka ko che. Fatma, ka ta i ni. I sualte chu sen lar angin awm tawh mah sela, vur angin a var ang; sen duk angin sen tawh mah sela, beram hmul angin a awm ang. Chak takin awm rawh, Fatma; i sualte chu ngaihdam a ni ta. Kal la, tisual leh tawh suh. Tu pawh thil tisual apiang sual bawih a ni. Chutichuan Fapain bawih a ban che u chuan in chhuak tak meuh ang.’

Ingrid-in a lo tuihnih a: ‘Jeremia 3:14 hi mimal taka pek che ka duh Fatma: Aw, ka fa rinawm lo, lo kir leh rawh, Lalpa thuchhuak chuan a ti; I pasal ka ni a…’

Che chang lovin maimitchhing rengin Fatma-i chu a ṭhu a. A taksa chu a rawn khur der der a. Tichuan heti hian a rawn ti a:

‘Tunah chuan Pathian puan inah ka awm tiraw?’

‘Aw, hei hi i awmhmun chu a ni. Ingrid-in a sawi ang khan Pathianin a nei tawh che.’

‘Zaninah John-a in aṭangin ka bungrua ka la ang.’

‘Esther-i hruai ve ang che.’

‘Hruai ang. An hnenah kar eng emaw zat chu ka la awm rih ang. Awmhmun chungchanga i thil hrilh kha min hrilh chhawng a. Daniel-an ka awmna tur min zawnsak dawn a.’

Au rinnaah chuan kan thlawhna chhuah tur thu an rawn puang a.

‘Thil pahnih chauh Fatma,’ ka ti a. ‘Tunah chuan zalen i ni tawh, engkima zalen. I hun kal tawh chu Pathianin a theihnghilh tawh. I sual ngaihdam tawhte rit taka i la phurh zel chuan sual tharah i tlu leh mai ang.’

‘Ka hre thiam e.’

‘Pahnihnaah chuan Pathian khawngaihna hi room thima eng lo lut ang hi a ni a. Mahse hei hi thil kal mek reng a ni. Vawiina i hmuh thiam loh i nuna thim chhah tak tak laite nakinah i la hmu chhuak zel a ni mahna. Chutiang hunah chuan beidawngin chau mai lo la. Pathian engah i nun chu hai lan a ni tihna a ni ve mai.’

‘Ka lawm e.’

Kan lam panin Daniel-a a lo tlan a: ‘In lo kal nghal a ngai. Hei in boarding card. Mite chu thlawhnaah an lut ṭan tawh a nia, nangni chu passport endikna pawh in la pal tlang ve lo lehnghal.’

‘Kan thlawhna chhuah tur an puang chauh sia.’

‘An vawi hnih puanna a nih kha. A vawi khatna in hre hman lo a ni ang.’

Rang takin kan tho a, Daniel-a chu kan zui nghal a. Kan passport endik tura ka pek lai chuan Fatma-i pawh Ingrid-i bulah a la ding a.

‘Engtin nge i awm, Fatma?’ tiin Ingrid-i chuan a zawt a.

A han ngaihtuah vang vang hnuah: ‘Ka awm dan hi a mak, malin ka awm a mahse ka khua a har miah lo.’

‘Chu’ng tur chu a nia. Mahnia awm theite chauh hian nupui pasal neih tur niin ka ngai ve tlat. Pathianin mahni infiah turin a duh che a nih kha.’

Ingrid-i chu a passport ka pe a, Miriam-in boarding card a lo endikna gate lam panin kan tlan leh nghal a.

Esther-i leh Daniel-a ten kan bag min lo pe a. Keini chu kan inkhai bawr tak em avangin kan ṭhiante chuan min kuah ta ngawt mai a.

‘Pathianin in pahnihin a hmang che u a ni,’ Daniel-a chuan a tia.

‘Kan tling lo chung chungin,’ tiin ka chhang a.

Maurice-a mangṭha ve tura a lam ka hawi chuan zawhna pakhat min zawh duh a la nei tih ka hre chhuak a.

‘I zawhna kha lo ziak thla mai ta che,’ ka ti a.

‘Ka ziak tawh alawm,’ tiin ka jacket ipteah chuan envelope a rawn thun zauh a.

Gate chu kan lut a, midangte chu kan kalsan ta vek mai a. Miriam-i chauh chu thlawhna thlenga min zui thei awm chhun a ni ta.

A tihdan ṭhin ang bawkin pehhel awm lem lovin heti hian min zawt a: ‘I hnena lehkha ka rawn thawn hmasak bera ka hlauhna, Timothy-a laka ka rilru puthmang hi innei tur khawpin a thuk lovin ka hria ka tih kha i la hre reng em? Mipa aiin hmeichhiain hetiang hi an hre fuh duh tiin ka rilru awm dan ngaichang tawp turin min ti a nih kha. Tuna ka ngaihtuah leh tak chu, engkim lo fel thlup ta se, chu’ngte leh zel pawh chu mipa aiin hmeichhia hian kan hre fuh zawk ṭhin em?’

‘Eng nge i rin dan, Miriam?’

Min chhang mai lo. Thlawhna lawnna step zahve vel kan kai tawh hnuah chuan min rawn au a:

‘A nih ka ring!’

A rin ang chu ka pawmpui tih entir nan ban ka zu phar a. Thlawhnaa lut hnuhnung ber kan ni. Kan ṭhutnaa kan va ṭhut fel a, seat belt kan hren fel meuh chuan a thawktuten thlawhna kawngka an khar fel ve nghal deuh mai. Kar lovah thlawhna chu a che chhuak a, thlawk turin a inpeih ta der a.

Ingrid-in ka kut a rawn dawm a.

‘Tukin avang khan ka zak a, pawi ka ti khawp mai,’ a ti a. ‘A chang hian i pen ruala pen ve thei lo nia inhriatna hi ka nei ṭhin a. I hre thiam em?’

‘Chapo lo tura kan invenna ṭha tak a ni,’ tiin ka chhang a. ‘Nakinah nupa dangte harsatna kan hriat thiam zawk nan Pathian hian he’ng kawng ruamte hi min zawhtir ṭhin niin ka hria.’

Thlawk chhuak turin thlawhna chu a tlan ṭan tawh a. A tlanna kawngte chu an ral zel a. Lei pawh a lang thei ta lo. Thlawhna chuan van boruak zau tak lam a pan chho ta.

Keini pawh zin kawngah kan awm leh ta – unterwegs, en route.

‘Tinge Maurice-a lehkhathawn kha i chhiar loh?’ Ingrid-i chuan a ti a.

‘Eng chungchang nge a nih i rin – inpuanna dang a ni ang em?’

‘Thil dang daih a nih ka ring.’

‘Engtin nge chutiang ngaihdan i neih theih? Hmeichhe rin thu a ni maw?’

‘Aw.’

‘Ka hawn hmain min han hrilh teh.’

‘Airport kan pan dawna a car-ah Fatma-i chuang tura kan tih laia Maurice-a hlim hmel kha i lo hmu ve lo em ni?’

‘Chuti lam chu maw?’

‘Hawng la en ang.’

Chutiang lam ka lo ngaihtuah reng reng lo. Envelope chu ka hawng a, ka chhiar a:

‘Pathian hi tuah remtu a ni ve tho em ni? Leilawna Fatma-i i titipui laia kei ka lo ṭawngṭai khan aw fiah tak mai ka hria a: “Saw nu, Walter-an a biak lai mek saw i nupui a la ni ang” tiin.

‘Mak tak a ni. Ka la hmu ngai hauh lova, tu nge a nih pawh ka hre lova, eng ang hmel pu nge a nih pawh ka hre lo. Thim thamah khan a pian zia awm ang deuh kha ka rawn hmu vuai vuai a ni mai.

‘Hei hi Pathian aw a ni thei ang em? Khawngaihin in chawlh remchanna hmasa berah Aw nge Aih tih telegram hmangin min lo thawn teh.’

‘Nang leh i hmeichhe rin thu hi a,’ tiin thik takin ka nupui lam chu ka hawi a.

‘A har hleinem,’ a ti sam et a.

‘Maurice-a chu ka khawngaih mang e,’ ka ti a. ‘Nula thianghlim nupui atan neih a duh ve tehreng nen. Fatma-i a chang ta si a.’

Ingrid-in min lo kalh a: ‘Mahse a thianghlim alawm, Walter. Tihthianghlim a ni tawh alawm – Krista mo a nih angin. “Bal lai awm lo. Chuar lai awm lo. Bawlhhlawh lai awm lovin.” ’

Ni e, Ingrid-i hian a tidik chiah.

Thawktu nula pakhat chu ka ko a, pilot chu airport lam nen an la inbe reng em tih ka zawt a.

‘Aw,’ a ti a, ‘mahse mimal thil chu a thawn theih loh.’

‘In airline a thawk ve tho mi pakhat tan thu pawimawh deuh thawn tur ka nei a.’

A tum phawt tur thu min tiam a. Miriam-i hming ka hrilh hnuah: ‘Hei hi ka thu thawn duh chu a ni. Thumal tlem te: “Maurice-a kha Aw tih lo hrilh rawh.” ’ Ngawi rengin kan ṭhu dun a. A hnu deuhah Ingrid-i chuan ka lam a lo hawi a, min en a.

‘Eng nge i ngaihtuah?’ tiin ka zawt a.

‘Ka nei che hi ka lawm ngawt mai,’ nui chungin a ti a.

‘Kei pawh.’

The End