Tirhkohte Thiltih Zirlai 18-na. Tirhkohte 3:17-26

TIRHKOHTE 3:17-26 MIZCLBSI :Tûnah hian unaute u, nangni leh in hotute pawhin in thiltih kha in hre tak tak lo a ni tih ka hria e. Krista chuan a tuar tûr a ni tih [18] Pathianin a zâwlnei zawng zawng hmanga a lo sawi lâwk kha hetiang hi a thlentîr dân a lo ni. [19] Chuvângin, in sualte sim ula, hawi kîr leh rawh u. [20] Chutichuan, Lalpa hnên ata harhtharna hun a lo thleng ang a, in tâna a ruat Mesia, Isua chu, a rawn tîr ang. [21] Amaherawhchu, engkim siam thar hun a thlen hma chuan vânah ani chu a awm rih tûr a ni; siamtharna thu chu Pathianin a zâwlnei thianghlimte kâa hmasâng ata a sawi daih tawh kha. [22] “Mosia pawh khân, ‘Lalpa in Pathianin keimah ang hi in unaute zînga mi, zâwlnei pakhat a dinsak ang che u; eng pawh in hnêna a sawi apiang in zâwm tûr a ni. [23] Chu zâwlnei thu ngaithla lo apiang chu Pathian mite zîng ata tihboral zêl tûr a ni,’ a tih kha. [24] Samuela leh a hnua zâwlnei zawng zawngte khân tûnlai chanchin hi a ni an lo hrilh lâwk ni. [25] “Zâwlneite thu leh in thlahtute hnêna thuthlung rochungtute in ni asin. Abrahama hnênah chuan, ‘I thlahah chuan khawvêla hnam tinin malsâwmna an dawng ang,’ a tih kha. [26] Pathianin a chhiahhlawh chu a thlang a, in sualte hawisantîr ṭheuh tûr che u leh malsâwm tûr che uin in hnênah a rawn tîr hmasa a nih hi,” a ti a.

Sawi zauna : A hma khan Petera khan, ‘Isua hminga thiltihtheihna leh chu hming rinna chuan in hmuh leh in hriat ṭhina hi a tidam ta a; amah rinna avâng chuan he mi hi in zaa in hmuh ang hian a dam ta viah a,’ tih thu a sawi a. Isua avangin kebai chuan damna a chang a, ‘Kea kala zuangin Pathian fak chung zêlin Tempulah chuan an rualin a lût ve ta a, tih a ni. Damna famkim taksa, rilru leh thlarau damna- siam tharna a chang a ni.

Tuna kan chhiarah hian Petera hian chu mihring damna famkim chu Isua avanga lo thleng a nih zia Thuthlung Hlui hmangin a sawi fiah a ni. ‘Siamtharna thu chu Pathianin a zâwlnei thianghlimte kâa hmasâng ata a sawi daih tawh kha,’ (21) tiin Pathianin Mosia, Samuela, Abrahama leh zawlnei dangte hmangin Isua avanga mihringte siam thar an nih tur thu a lo puan tawh thu a sawi a ni. “Pathianin a chhiahhlawh (Isua) chu a thlang a, in sualte hawisantîr ṭheuh tûr che u leh malsâwm tûr che uin in hnênah a rawn tîr hmasa a nih hi,” tiin, Judate hnena chanchin tha a thlen hmasak tak thu Petera hian a sawi ta a ni.

‘Chuvângin, in sualte sim ula, hawi kîr leh rawh u. Chutichuan, Lalpa hnên ata harhtharna hun a lo thleng ang a, in tâna a ruat Mesia, Isua chu, a rawn tîr ang,’ tiin.

Pentecost ni a Petera chet dan leh a thusawi, mipuite dawnsawn dante in anna tam tak a awm a:

1. Petera hian thilmak thleng, Thlarau Thianghlim lo thlen a tawng hriatloh a tawng leh kebai damleh te hi sawifiahin mite sima Isua ring turin a ti a.
2. A thusawiah hian Isua thawhlehna leh tih ropuia a awm thu a uar hle a. Pathianin a chawimawi thu a sawi a ni.
3. Thil thlengte chu Thuthlung Hlui hrilhlawkna a lo thlen dikna a ni, tiin a sawi a. Isua hi Pathian ruat, a hriak thih, Mesia lo kal tur Mosia leh zawlneiten an lo sawi lawk kha a ni a ti a.
4. Mesia in khengbet a ni, tiin sim turin a ti a. Chu chu ngaihdamna leh malsawmna kawng awmchhun a ni, a ti a.  Isua hminga thilmak leh damna lo thleng a nih zia a uar hle a. Isua hminga Thlarau Thianghlim hnathawh Pentecost Ni leh kebai dam ta atang hian a lang chiang hle a ni.
5. A lo ngaithlatute Juda deuh vek an ni a. Thuthlung Hlui an lo hriat thiam dan nasa takin sawi danglam a ni a. Pentecost Ni-ah mi 3000, tun tumah hian mi 5000  nun a danglam a, Isua an zui ta a ni.

Ngaihtuah zui atan:

31. Kebai kutdawh kha kum 40 chhung kea kal thei lovin a lo awm tawh a. Petera leh Johana kha kal tlang ta mai se, emaw pawisa pe ta ringawt se Isuaa nun thar a nei dawn lo tihna a ni. I tih tur ti lovin mite i kal pel thinin i hria em, pawisa emaw thil enge maw an taksa mamawh mi i pek hian tawk i ti mai thin em (nang leh i peka chuan tawk in ti maithei.)? Mi i hriat ngai loh pawh i hun sengin, amah ngaihsakin i tawngtaisak tawh em?

(Mihring tum ruhna, willpower hian nun eng eng emaw (habits, lifestyles) danglamna chu a thlen ve thei teh meuh mai. Mahse tuman thlarau damna siamin, Pathian laka mihring thi tawh kan ti dam thei lo. Pathian khawngaihna Isuaa lo lang rinna lo chuan tuman Pathiana damna famkim an chang thei lo. Thlarau Thianghlim-in Isuaa min tih nun hma chu tanpui ngai kanni satliah mai lo va, mitthi kan ni.)